Mako 3 - KNTP

Muntu wajinga na kuboko kwapapa

¹ Ponkapo Yesu watwelele jibiji mu shinagoga, mwaji muntu wajinga na kuboko kwapapa.

² Ne abo kebamutale amba bamone kana usa kumubuka mu juba ja Sabado, amba bamone mwa kumushiina.

³ Ponkapo Yesu wamwambijile muntu wajinga na kuboko kwapapa amba, “Iya kuno.”

⁴ Kabiji wibambijile amba, “Lelo nanchi kizhila kuuba kyawama pa juba ja Sabado nyi, inyi kyatama? Kupulusha mweo nyi, inyi kwipaya?” Bino abo bazhindaminetu nzoo.

⁵ Kepo aye wibatajile na bukaji, kasa afichishiwa ku muchima na mambo a kukosa kwa michima yabo, wamwambijile muntu amba, “Tanyika kuboko kobe.” Ponkapo wikutanyikile, ne kuboko kwanji kwabwelele ke kutuntulu.

⁶ Kabiji Bafaliseo balupukile pangye ne ponkapotu bamumvwang'ejile na bena Heloda mwa kumonawina.

Jibumba jikatampe ku kizhiba kya Ngalilea

⁷ Kabiji Yesu wafumineko ne baana banji babwanga bayile ku kizhiba, ne jibumba jikatampe ja ku Ngalilea ne ku Yudea ja mulondejile.

⁸ Ne ba ku Yelusalema, ne ba ku Idumea, ne ba ku bushiya bwa Yodano, ne ba kubwipi na Tila ne Shidona. Jibumba jikatampe byo jaumvwine byonse byo aubilenga jaishile ko aji.

⁹ Mambo jibumba jajinga jikatampe bingi aye wabuujile baana banji babwanga amba bamunengezhezhe bwato bucheche, kuchiina amba ba kamufinankanya.

¹⁰ Ne aye wabukile bantu bavula, onkao mambo mobavujila bajinga na myalo bamufinankenye amba tumukwate pa mubiji.

¹¹ Ne boba bajinga na bapashi babipa byo bamumwenenga, baponenenga panshi mu kyenyi kyanji, kasa babijika amba, “Yenu Mwana Lesa!”

¹² Ne aye wibajimwine javula amba kechi babuule bantu amba ye Mwana Lesa ne.

Kusalwa kwa batumwa jikumi na babiji

¹³ Ponkapo wakanjijile ku mutumba ne kwibeta ko aji abo bo asakile mwine. Kabiji baishile ko aji.

¹⁴ Ne aye watongwele jikumi ne babiji, boatumbile amba batumwa, bakwikala nanji, ne ba kutuma kuya na kusapwila,

¹⁵ ne kwikala na luusa lwa kupangamo bademona.

¹⁶ Watongwele jikumi na babiji, Shimona ye atumbile jizhina amba Petelo;

¹⁷ Ne Yakoba mwana Zebede, ne Yoano mulongo wanji, boatumbile jizhina, ja Boaneje, ja lumbulula amba, kutatauka nobe mvula;

¹⁸ ne Andeleo, ne Filipa, ne Batolomo, ne Mateo, ne Tomase, ne Yakoba mwana Alefesa, ne Tadeusa, ne Shimona mwina Kenana,

¹⁹ ne Yudasa Isakaliota, yenka wamusolwele Yesu.

Yesu ne Belezebuba

²⁰ Kabiji watwelele mu nzubo. Ne jibumba japwijile pamo jibiji, kyakuuba amba bakankelwe ne kuja.

²¹ Ne balongo banji byo bekyumvwine, balupukile amba bakamukwate, mambo ba ambilenga amba, “wakonya.”

²² Kabiji banembeshi bafumine ku Yelusalema ba ambilenga amba, “Wanonkwa kwi Belezebuba,” kabiji amba “Upangamo bademona na mfumu wa bademona.”

²³ Kabiji wibechile ko aji ne kwibambila mu bishimpi amba, “Nanchi Satana wakonsha ku pangamo byepi Satana?”

²⁴ Umvwe bufumu bwialukila bwine abwa bufumu kechi bwakonsha kwikala ne.

²⁵ Kabiji umvwe nzubo yialukila iine, aya nzubo kechi yakonsha kwikala ne.

²⁶ Kabiji umvwe Satana wibuukila mwine wiabanya, kechi wakonsha kwikala ne, nanchi wafika kumpelo.

²⁷ Bino kafwako muntu wakonsha kutwela mu nzubo ya kilobo ne kupukula bintu byanji ne, poso patanshi wamukasa kilobo. Bino akonshe kupukula bya mu nzubo yanji.

²⁸ “Kine ne mwambila namba, mambo aabo onse ake balekelwa baana ba bantu ne bya mwenga byonse byo bamba.

²⁹ Pakuba awa umunena mwenga Mupashi Wazhila, mambo anji kechi akalekelwa myaka yonse ne, mambo wazhatwa nao a myaka yonse.”

³⁰ Mambo ba ambile amba, “Uji na mupashi wabiipa.”

Inanji ne balongo banji Yesu

³¹ Kabiji inanji ne balongo banji baishile. Byo baimene pangye, batumine muntu kwi aye na kumwita.

³² Jibumba jaikele kasa ja muzhokoloka, ba mwambijile amba, “Umvwai bainenu ne balongo benu ba bena kwimusaka pangye.”

³³ Kumvwa aye wibakumbwile amba, “Lelo bamama ne balongo bami bo bang'anyi?”

³⁴ Kabiji pa kwibatalatala aba baikele kasa bamuzhokoloka, wa ambile amba, “Bano bo bamama ne balongo bami!

³⁵ Aye uba kyaswa muchima wa Lesa ye mulongo wami, ye nyenga yami, kabiji ye mama.”