Mako 16 - KNTP

Kusanguka kwa Yesu

¹ Kabiji pakupita juba ja Sabado, Maliya waku Magadala ne Maliya inaji Yakoba, ne Salome bapotele binunka bulongo amba bakayeko bakamushinge.

² Ne pa juba jitanshi ja mulungu abo baimene lukelokelo, pa kuseela juba kebaye ku kilende.

³ Ne abo ba ambang'enenga bene na bene amba, “Ng'anyi usa kwitwalumwinako jibwe ku kibelo kya kilende?”

⁴ Kabiji pa kutalako bamwene, jibwe jaalumukako kala, pakuba jajinga jikatampe bingi.

⁵ Kabiji pa kutwela mu kilende bamwene nsongwalume kasa aikala ku kilujo, kasa avwala kivwalo kyalepa kitoka, ne abo baumvwine moyo.

⁶ Ne aye wibambijile amba, “Kuchiina ne. Nayuka namba mubena kukeba Yesu wa ku Nazala ye bapopele. Wasanguka! Kechi uji muno ne. Talai pantu po bamulajikile!

⁷ Pano yainga mukebabule baana banji babwanga, ne Petelo, amba watangilako ku Ngalilea. Akwa ko mukamumona, byonka byo emubujile.”

⁸ Ne byo balupukile banyemeneko ku kilende, mambo bazakaminenga ne kukumya bingi, ne kwamba kechi ba ambile kintu nangwa kimo ku muntu ne, mambo baubile moyo.

Byapelaako bya ku ano Mambo Awama 16:9-20 Yesu wamweka kwi Maliya waku Magadala

⁹ Kabiji byo asangukile lukelokelo pa juba jitanshi ja mulungu, wamwekele patanshi kwi Maliya wa ku Magadala, yeapangilemo bademona batanu na babiji.

¹⁰ Aye wayile na kwibabula a ba baendanga ne Yesu. Byo bajijilenga ne kuuba mabingo,

¹¹ bino abo pakumvwa amba mumi, waji kumweka kwi aye, balengulwile.

Yesu byo amwekele ku baana babwanga babiji

¹² Bino byo byapichile, wamwekele mu musango ungi, ku babiji bakwabo byo ba endelenga mu jishinda kuya mu kyalo.

¹³ Kabiji ne abo babwelele na kwibabula bonse, ne abo nabo kechi be betabile ne.

Yesu byo amwekele ku ba jikumi na umo

¹⁴ Kabiji palutwe wamwekele ku ba jikumi na umo byo baikele na kuja, ne aye wibanenene mambo a kubula lwitabilo ne kukosa kwa michima yabo, mambo kechi baitabile a ba bamumwene byo asangukile ne.

¹⁵ Ne aye wibambijile amba, “Yainga pantanda ponse, mukasapwile Mambo Awama ku bilengwa byonse.

¹⁶ Aye waitabila ne kubatizhiwa ukapuluka, pakuba awa wabula kwitabila ukazhatwa nao.

¹⁷ Ne bino biyukilo bikebalondelanga baitabila. Mu jizhina jami bakapangilangamo bademona, bakambanga na njimi ingi,

¹⁸ bakashikula milolo, kabiji nangwa batoma bya bulembe kechi bikebalengela kukolwa ne; kabiji bakabiika maboko abo pa bakolwa, ne abo baka bukiwa.”

Kuya kwa Yesu mwiulu

¹⁹ Byo apwishishe Nkambo Yesu kwamba naabo, watwajilwe mwiulu ne kwikala waikajile ku kilujo kya Lesa.

²⁰ Baana babwanga bayile na kusapwila konse konse, ne Nkambo waingijilenga naabo mukufikizha ne kwikajika aa mambo na biyukilo bya londankene na byambo byabo.