Mako 15 - KNTP

Yesu ku meso a Pilato

¹ Ponkapotu pa kukya lukeelo bang'anga bakatampe bapwijile pamo na bakulumpe ne banembeshi ne bonse bamukije. Ne Yesu bamukashile, kabiji bamutwajile ne kumupana kwi Pilato.

² Ne Pilato wamwipwizhe amba, “Yenu mfumu wa Bayudea nyi?” Ne aye wamukumbwile amba, “Mwafikilapotu.”

³ Ne bang'anga bakatampe bamushinawijile bintu byavula.

⁴ Ne Pilato wamwipwizhe jibiji amba, “Anweba ne kukumbulapo nangwa pacheche nenyi? Talai byo byavula byo bemushiina.”

⁵ Pakuba Yesu kechi wakumbwilepo nangwa na kintu kimo ne, onkao mambo Pilato wakuminye.

Yesu byo bamuzhachishe amba afwe

⁶ Bino pa kijiilo kyonse aye Pilato wakelwanga kwibakasulwila kaili umo ye basakile abo bene.

⁷ Kabiji kwajinga umo jizhina janji Balabasa, wakashilwe na bakwabo mo basatukijile. Abo bantu pakusatuka kwabo, baipayang'ene.

⁸ Ponkapo jibumba jaishile ne kutatula kumwipuzha Pilato kwibobila byonka byo akelwanga kwibobila.

⁹ Ne aye Pilato wibepwizhe ne kwamba amba, “Mwasaka nemukasulwile mfumu wa Bayudea nyi?”

¹⁰ Pakuba aye wayukile amba, bang'anga bakatampe bamufikizha kuno na mambo a kichima.

¹¹ Bino bang'anga bakatampe bakolomwene jibumba amba, ebakasulwileko Balabasa.

¹² Kepo Pilato ebambijile jibiji amba, “Pano nanchi ikika kyonsa kumuba aye yemuteela amba, mfumu wa Bayudea?”

¹³ Ponkapo babijikile amba, “Mupopai!”

¹⁴ Ne Pilato wibambijile amba, “Nanchi ng'anyi kintu kyatama kyo auba?” Pakuba abo kepo ke babijikishetu bingi amba, “Mupopai!”

¹⁵ Ponkapo Pilato byo asakile kutokesha jibumba pa muchima, wibakasulwijile Balabasa, pakuba Yesu byo amututawile wamupaine amba, apopwe pa musalabu.

Yesu byo bamwendelekele ku bashilikale

¹⁶ Kabiji bashilikale bamutwajile mu kipango kya ndamakyalo Pilato (kyo batongola amba, Peletoliuma), kabiji baichile bonse bamu kiombe kyabo.

¹⁷ Ne abo bamuvwikile kisapi kyachiluluka, ne kumulukila munchinya wa miba, ne kumumvwika ku mutwe wanji.

¹⁸ Kabiji batatwile kumwimuna amba, “Mutende, Mfumu wa Bayudea!”

¹⁹ Ke bamupume ku mutwe na jitete, ne kumushipila mate, ne kufukama panshi na kumupopwela.

²⁰ Ne pa kupwisha kumwendeleka, bamuvujile kivwalo kyachiluluka, ne kumuvwika bivwalo byanji mwine, ke bamutwale na kumupopa pa musalabu.

Yesu byo bamupopele pa musalabu

²¹ Kabiji bakanjikizhe umo wapichilenga, Shimona mwina Kilene, wafuminenga mungye, (shabo Alekizanda ne Lufusa) amba, “Tuye ne obewa usende musalabu wanji.”

²² Ne kumuleeta kuntu ko batongola amba, Ngolongota (pa kulumbulula ko kuuba amba kuntu kwa kiboyongolo.)

²³ Kabiji bamupele binyu byo bavwangankanya na moola, bino Yesu kechi wibitomene ne.

²⁴ Kabiji bamupopele pa musalabu ne kwiabenya bivwalo byanji, kasa bataaya bubale pakuyuka byo basa kwibitambula, au kyanji au kyanji.

²⁵ Ne juba byo jaubile jakanjila kala bamupopele pa musalabu.

²⁶ Ne kinembelo kya kishiino kyanji kyanembelwepo peulu amba, “MFUMU WA BAYUDEA.”

²⁷ Kabiji bamupopele pamo na batupondo babiji, umo ku kilujo ne mukwabo ku kipiko.

²⁸ Ne kinembelo kyafikile kyaamba amba, “Aye wabajilwa pamo na bampupabizhila.”

²⁹ Ne abo bapichilenga konka bamubilenga mwenga, kasa benauna ku mitwe yabo, ne kwamba amba, “Obewa onauna nzubo yazhila ya Lesa ne kwiishimikulula mu moba asatu!

³⁰ Ipulushe obewa mwine, wikile panshi kufuma pa musalabu!”

³¹ Byonkabyo ne bang'anga bakatampe nabo bamwendelekelenga pamo ne banembeshi ne kwamba amba, “Wibapulwishenga bakwabo, bino mwine kechi wakonsha kwipulusha ne!

³² Ye Kilishitu, Mfumu wa Isalela, pano ekile pa musalabu namba, twitabile!” Ne bapopelwe nanji nabo bamwendelekelenga.

Lufu lwa Yesu

³³ Pa kushinkimana juba kwaishile mfishi yakumbene ponse pantanda, kufika ne pa kulemba juba.

³⁴ Ne pa kulemba juba, Yesu wabijikile na jiwi jikatampe, amba, “Eloi, Eloi, lema sabakatani?” Pa kulumbulula kokuba amba, “Lesa wami, Lesa wami, wandekela ka?”

³⁵ Ne bamo baimene konka byo baumvwine, ba ambile amba, “Talai ubena kwita Elaija.”

³⁶ Ne umo wayile lubilo wakayuzhizhe shipanja na binyu byasasa, wasomekele ku jitete, ne kumupa amba, atome, ne kwamba amba, “Pembelelai, tumone kana Elaija usakwiya na kumwikizhako!”

³⁷ Ne Yesu wabijikile na jiwi jikatampe ne kuleka ku mweo.

³⁸ Ne kipembe kya mu nzubo yazhila ya Lesa kyatabukile ke bibiji, kufuma peulu ne kufika panshi.

³⁹ Kabiji mukulumpe wa bashilikale waimenejile kubwipi pa kumona byo abijikile ne kuleka ku mweo, wa ambile amba, “Kine uno muntu waji Mwana Lesa!”

⁴⁰ Kabiji kwajinga ne banabakazhi kwalepa kasa batajisha. Mwi abo mwajinga Maliya waku Magadala, ne Maliya inanji Yakoba wa mwanyike, ne Yosesa, ne Salome.

⁴¹ Bonka bamulondejilenga byo ajinga ku Ngalilea na kumwingijila, ne bavula banabakazhi bakwabo baishile nanji ku Yelusalema.

Kuzhiikwa kwa Yesu

⁴² Kabiji byo jafikile ke mabanga, byo jajinga juba ja kunengezhezha jimo, (ko kuuba amba, juba ja kunyuma na ja Sabado),

⁴³ Yosefwa mwina Alimatea, kinemanga wa mukije waishile. Aye naye wapembejilenga bufumu bwa Lesa, watwelele mwi Pilato na kuchinchika, ne kulomba mubiji wa Yesu.

⁴⁴ Ne Pilato wa kuminye amba, “Wafwa kalanyi?” Ne aye waichile mukulumpe wa bashilikale ne kumwipuzha amba, “Waji kufwa kalanyi?”

⁴⁵ Pakumvwa kwi aye mukulumpe wa bashilikale amba wafwa, wapaine mubiji kwi Yosefwa.

⁴⁶ Ne aye Yosefwa wapotele kisapi kya linenyi, nepa kumwikizha wamupombele mu kyonkakya kisapi ne kumubika mu kilende kyo basongele mu jibwe kabiji wa alumwijileko jibwe ku kibelo kya kilende.

⁴⁷ Maliya waku Magadala ne Maliya inaji Yosesa bamwene kobamubikile.