Mako 14 - KNTP

Kupingila mwa kumwipayila Yesu

¹ Pano kwashajile moba abiji ke Kijiilo kya Lupitailo ne Kijiilo kya Bashinkwa ba kubula Mbizho. Ne bang'anga bakatampe ne banembeshi baumvwang'enenga bya kumukwata mu bufyamfya ne kumwipaya.

² Mambo ba ambile amba, “Kechi kimye kya kijiilo ne, kuchiina kwakekala kiwowo mu bantu.”

Yesu byo bamushingile manyi ku Betani

³ Kabiji byo ajinga mu Betani mu nzubo ya kwa Shimona wa mbumba, kasa aikala na kuja, kwaishile mwanamukazhi na musashi wa alabasita wa manyi a naada, a mutengo mukatampe, ponkapo walajile musashi ne kumwitulwila Yesu pa mutwe wanji.

⁴ Kabiji kwajinga bamo bazhingijile mu michima yabo ne kwamba amba, “Mambo ka kyo a onawina ano manyi byonkabye?

⁵ Mambo ano manyi inge apoteshiwe na mali kukila bitota bisatu bya denali ne kupanwa ku balanda!” Kabiji bamunene bingi.

⁶ Pakuba Yesu wa ambile amba, “Mulekai! Mwamukatezha ka? Aye wangubila mwingilo wawaama.

⁷ Pakuba balanda mukekala naabo moba onse, ne kimye kyonse kyo musaka mwakonsha kwibobila byawama. Pakuba amiwa kechi nkekalanga nenu moba onse ne.

⁸ Aye wauba kyo akonsha kuuba, wanshingila jimo manyi mubiji wami mambo a kunengezhezha jimo kwa kuzhiikwa kwami.

⁹ Kine, nemwambila namba, konse konse ko bakasapwila Mambo Awama pano pantanda ponse, ne kino kyo auba uno mwanamukazhi nakyo kikambiwanga ke kya kumuvulukilako.”

Bukamfutumfutu bwa Yudasa

¹⁰ Ne Yudasa Isakaliota, umo wa mu ba jikumi ne babiji, wayile ku bang'anga bakatampe amba a kamusolole Yesu kwi abo.

¹¹ Ne abo byo bekyumvwine, basekejile kabiji bamulayile kumupa mali. Ne aye wakebelenga mwa kumusolwela bulongo.

Yesu waja Kijiilo kya Lupitailo na baana banji babwanga

¹² Kabiji pa juba jitanshi ja Kijiilo kya Bashinkwa ba kubula Mbizho, byo batapishishe mwana mukooko wa lupitailo, baana banji babwanga bamwipwizhe amba, “Kwepi ko mwasaka atweba tukanengezhezhe jimo po musa kujiila Kijiilo kya Lupitailo?”

¹³ Ponkapo aye watumine baana banji babwanga babiji ne kwibambila amba, “Yainga mu muzhi, mukasambakana mwanamulume wasenda mulondo wa mema. Kamulondelainga

¹⁴ monse mo akatwela, mukamwambile mwina nzubo amba, ‘Mufunjishi wa amba amba, nzubo yami ya bwenyi iji pi, mo nkajiila Kijiilo kya Lupitailo na baana bami babwanga?’

¹⁵ Ne aye ukemumwesha nzubo ikatampe ya peulu yo banengezhezha jimo bulongo monkamwa momo mu ketunengezhezha.”

¹⁶ Ne baana babwanga bayile, bakafikile mu muzhi, bakataine byonka byo ebabujile, kabiji banengezhezhe jimo kijiilo kya Lupitailo.

¹⁷ Ne byo kyafikile ke mabanga, waishile naba jikumi na babiji.

¹⁸ Kabiji byo baikele na kuja, Yesu wa ambile amba, “Kine, ne mwambila namba umo wa mwi anweba ukansolola, yenka ubena kuja ne amiwa.”

¹⁹ Ne abo batatwile kuuba bulanda ne bonse ke bamwipuzhe umo umo amba, “Lelo amiwa nyi?”

²⁰ Kepo aye ebambijile amba, “Umo wa mu ba jikumi na babiji, yenka ye ntanta nanji shinkwa mu nsanyi.

²¹ Pakuba Mwana Muntu uya monka mo kyamunembelwa, bino malwa kwiyewa umusolola Mwana Muntu! Kyamuwamina awa muntu inge kechi wasemekelwe ne.”

Kijiilo kya Nkambo

²² Byo bajilenga, washikwile shinkwa, ne pa kumupesha wamutebwile ne kwibapa baana banji babwanga, ne kwamba amba, “Tambulai, uno ye mubiji wami.”

²³ Kabiji washikwile katomeno ne pa kusanta wibapele, ne bonse batomenemo.

²⁴ Kabiji wibambijile amba, “Ano o mashi ami a lulayang'ano, ebechikila bavula.

²⁵ Kine amiwa nemwambila namba, kechi nkatomapo jibiji bino bipangwa bya mung'anzang'anza ne, poso mu jonkaja juba jo nkatoma angi apya mu bufumu bwa Lesa.”

²⁶ Kabiji byo baimbile lwimbo, balupukile ke baye ku Mutumba wa olivi.

Yesu byo a ambijile jimo mambo a kumukana kwi Petelo

²⁷ Ne Yesu wibambijile amba, “Anweba bonse muketuntula, mambo kyanembwa amba, ‘Nkamwipaya kafunga ne mikooko ikapalang'enamo.’

²⁸ Nangwa byonkabyo pa kusangulwa amiwa nkatangilako ku Ngalilea.”

²⁹ Pakuba Petelo wamwambijile amba, “Nangwa bonse baketuntula, amiwa ne.”

³⁰ Kumvwa Yesu wamwambijile amba, “Kine nemwambila namba, buno bufuku bwa leelo, shikombwe kasa akyangye kukookola jibiji, anweba musakunkana jisatu.”

³¹ Pakuba Petelo wa ambishetu na lupata amba, “Amiwa nangwa mfwe nenu, kechi nsa kwimukaana nangwa pachechetu ne.” Kabiji ne bakwabo nabo ba ambile byonkabyo.

Yesu byo alombele mu Ngesemani

³² Kabiji baishile ku mpunzha iteelwa jizhina amba Ngesemani. Kabiji wa ambijile baana banji babwanga amba, “Ikalai pano, byo naya na kulomba.”

³³ Wasendele ba Petelo, ne Yakoba, ne Yoano, watatwile kukaakilwa, ne kunemenwa mu muchima wanji,

³⁴ ne aye wibambijile amba, “Muchima wami waubisha bulanda usaka ne kufwa. Ikalai pano, mulabenga.”

³⁵ Ponkapo waendeleko pacheche, waponene panshi, ne kulomba kalombe amba, “Umvwe kyakonsheka kubiwa, kino kimye kimpitaile.”

³⁶ Kabiji wa ambile amba, “Abba, Taata! Bintu byonse byakonsheka kubiwa kwi anweba. Fumyai kano katomeno kwi amiwa nangwa byonkabyo kechi byo nsaka amiwa ne. Poso kyo mwasaka anweba.”

³⁷ Kabiji wabwelele ne kwibataana kasa balaala mutulo, wamwambijile Petelo amba, “Shimona walalaanyi?” Kechi wakonsha kulaba awala umo nenyi?

³⁸ “Labainga ne kulomba, kuchiina amba mwakatwela mu lweseko. Kine muchima waswa, pakuba mubiji wanekena.”

³⁹ Ne aye wayile jibiji, wakalombele kasa a bweluluka mu byambo bimotu.

⁴⁰ Kabiji wa bwelele jibiji ne kwibataana kasa balaala; mambo meso abo anemene natulo, ne abo kechi bayukile kya kumukumbula ne.

⁴¹ Kabiji waishile jabusatu, ne kwibambila amba, “Ne pano mwakilaala na kukokoloka nyi? Kyawama! Kimye kyafikila! Talai, Mwana Muntu ubena kusololwa mu maboko a bandengamambo.

⁴² Imanai, tuyenga, talai! Wa kunsolola kaji pepi.”

Kusololwa ne kukwatwa kwa Yesu

⁴³ Kabiji ponkapotu, byo akyambilenga, Yudasa waishile, umo wa ba jikumi na babiji, waishile na kiombe, kasa basenda mapanga ne tukonkolo, bafumine ku bang'anga bakatampe ne banembeshi ne bakulumpe.

⁴⁴ Kabiji awa wamusolwele wibabujiile jimo kayukilo amba, “Yenkawa ye nkafyompa i ye, mumukwate. Mumutwale ne kumulama bulongo.”

⁴⁵ Ponkapotu byo afikile waishile kwi aye, ne kumwambila amba, “Laabi!” Kabiji wamufyompele.

⁴⁶ Bamupimpukijile ne kumukwata.

⁴⁷ Bino umo waimene kwipi wasomwene mupanga wanji wa mukapile kalume wa ng'anga mukatampe, ne kumukopola kutwi.

⁴⁸ Ne Yesu wibambijile amba, “Anweba mwaiya na mapoko ne na tukonkolo na kunkwata nobe kapondo nyi?

⁴⁹ Amiwa na kelelwenga nenu moba onse mu nzubo ya Lesa kasa mfunjisha, ne anweba ne kunkwata ne. Bino kino kyamweka amba, binembelo bifike.”

⁵⁰ Kabiji bonse bo ajinga naabo bamushiile ne kunyema.

⁵¹ Nsongwalume umo wamulondejilenga, kasa ekumbakanyatu kisapi kya linenyi kyonka pa mubiji ne aye naye basakile kumukwata,

⁵² pakuba aye wibaposomokele, washiile kisapi kya linenyi, ne kunyematu bwamba.

Yesu byo aimene mukije

⁵³ Ponkapo Yesu bamutwajile ku nzubo ya ng'anga mukatampe. Ne bonse bang'anga bakatampe ne bakulumpe ne banembeshi bapwijile pamo.

⁵⁴ Ne Petelo walondejilenga katwezhimina kufika ne mu kipango kya ng'anga mukatampe. Waikele na bakalama nakoota mujilo.

⁵⁵ Kabiji bang'anga bakatampe ne bena kije bonse bakebele kya kumushiina Yesu amba, bamwipaye, kabiji kechi bekimwene ne.

⁵⁶ Mambo bavula bamushinawijilenga bya bubela, bino byambo byabo kechi byaijilenga mumo ne.

⁵⁷ Ne bamo baimene ne kumubepela bubela amba,

⁵⁸ “Twamumvwine kasa amba amba, ‘Nakonsha ku kundula ino nzubo ya Lesa ya shimikwa na maboko, ne mu moba asatu nkashimika ikwabo, ya kubula kushimika na maboko.’ ”

⁵⁹ Kabiji nangwa byonkabyo bukamonyi bwabo kechi bwaijile mumo ne.

⁶⁰ Ponkapo ng'anga mukatampe waimene mukachi kabo, ne kumwipuzha Yesu amba, “Lelo obewa ne kukumbulapo pa bino bintu byo bakushiina nenyi?”

⁶¹ Pakuba aye wazhindaminetu ne kumukumbula ne. Ne ng'anga mukatampe wa mwipwizhe jibiji amba, “Yobe Kilishitu Mwana Lesa Utotwa nyi?”

⁶² Kumvwa Yesu amba, “Ye amiwa bano, kabiji mukamona Mwana Muntu kasa aikala ku kuboko kwa kilujo kwa Bulume, kasa eya mu makumbi a mwiulu!”

⁶³ Ponkapo ng'anga mukatampe watabawile bivwalo byanji, ne kwamba amba, “Tukisakilaka bakamonyi!

⁶⁴ Mwaumvwa mwenga wanji. Pano mwalanguluka, amba ka?” Ne bonse bamufwishishe nao, amba wafwainwa kufwa.

⁶⁵ Ponkapo bamo batatwile kumushipila mate, ne kumuvweta pa meso, ne kumupuma binkonyi, kabiji ne kumwambila amba, “Aulanga!” Ne bakalama bamusendele ne kumupuma mapi.

Petelo byo amukaine Yesu

⁶⁶ Kabiji Petelo byo ajinga munshi mu kipango, kwaishile kamwale muzha wa ng'anga mukatampe,

⁶⁷ ne pa kumumona Petelo kasa ota mujilo, wamutajile ne kwamba amba, “Ne anweba mwajinga nanji awe Yesu mwina Nazala.”

⁶⁸ Pakuba aye wa kaine amba, “Amiwa kechi nayuka, nangwa kumvwisha byo wa amba ne.” Ponkapo walupukile mu bukonde ne shikombwe wakokweele.

⁶⁹ Ne awa kamwale wamumwene kabiji watatwile kwibambila aba baimene konka amba, “Uno ye umo wabo.”

⁷⁰ Pakuba aye wakaine jibiji. Kabiji pakupita kimye kicheche kikwabo, aba baimene konka ba mwambijile Petelo amba, “Kine obewa wi mwina Ngalilea.”

⁷¹ Pakuba aye watatwile kwifinga ne kuchipa amba, kechi namuyuka uno muntu ye mubena kuteela ne.

⁷² Ponkapotu shikombwe wakokweele ke jibiji. Ne Petelo wavulukile kyambo kya mwambijile Yesu amba, “Shikombwe kasa akyangye kukookola jibiji usakunkana jisatu.” Ne pa kwikilanguluka wajijile bingi.