Mako 12 - KNTP

Kishimpi kya bakalume ba bujimi bwa ming'anzang'anza

¹ Ponkapo aye watatwile kwibambila mu bishimpi amba, “Muntu umo wajimine bujimi bwa ming'anzang'anza, wabikileko ne luvimba, wapoyileko ne kya kufiinamo binyu, ne kutungilapo kyamba, ne kwibusha ku bakalama, kabiji wayile ku ntanda ingi.

² Kimye byo kyafikile, aye watumine kalume ku bakalama, amba akatambuleko bipangwa ku bamingilo.

³ Pakuba bakalama bamukwachile ne kumupuma, ne kumwimanya mabokotu.

⁴ Kabiji watumineko kalume mukwabo, kabiji ne aye naye bamulajile mutootole, ne kumulengesha bumvu.

⁵ Kabiji watumine ne mukwabo; ne aye bamwipayile, ne bakwabo bavula, bamo bebapumine, ne bakwabo bebepayile.

⁶ Wakijinga na mwana umo yeatemwisha. Kyapeleleeko watumineko mwananji amba, bakamunemeka mwanami.

⁷ Pakuba abo bakalama ba ambang'ene bene na bene amba, uno ye nswanyi. Twayai tumwipaye, ne buswanyi bukekala ke bwetu.

⁸ Ponkapo bamukwachile ne kumwipaya ne kumutaya pangye ya bujimi.

⁹ “Nanchi mwina bujimi ukooba byepi? Aye ukeya na kwibonauna aba bakalama, ne bujimi ukebupana ku bakwabo.

¹⁰ Nanchi kechi mwatangile kino kinembelo nenyi amba, “‘Jibwe jo basujile bashimika jo jonka jaalukile ke mutwe wa jikonka;

¹¹ Kino kyafumine kwi Nkambo, kabiji kyokya kukumya ku meso etu!’”

¹² Kabiji basakile kumukwata bino bachiine bantu, byo bayukile amba wa amba kino kishimpi mambo a abo. Pakuba bajinga na moyo mambo a jibumba, onkao mambo bamulekele ne kuya kebaye.

Mambo a kupana musonko

¹³ Kabiji batumine Bafaliseo bamo ne bamukipamo kya kwa Heloda kwi Yesu na kumweseka na mepuzho.

¹⁴ Kabiji baishile kwi aye ne kwamba amba, “Mufunjishi twayuka namba mwamba bya kine, kwakubula kuta muchima ku bintu bilanguluka bantu. Kabiji kechi mutala ku kilungi kya muntu nangwa umo ne, pakuba mufujishatu bukine bwa Lesa mwayila kyaswa muchima wa Lesa pa bantu. Tubuulai kana kizhila kupana musonko kwi Kesala nyi? Twafwainwa kupana nyi, inyi ne?”

¹⁵ Bino Yesu wayukile bujimuku bwabo ne kwibakumbula amba, “Mambo ka kyo mubena ku ngesekela? Ndetelai ndenali, ne imone.”

¹⁶ Kabiji bamuletejile. Ne aye wibepwizhe amba, “Lelo akye kipasha ne kinembelo kya kwa ng'anyi?” Ne abo amba, “Bya kwa Kesala.”

¹⁷ Kepo Yesu ebambijile amba, “Panai kwi Kesala bintu bya kwa Kesala, ne bya kwa Lesa kwi Lesa.” Kabiji bamukuminye bingi.

Kwipuzha mambo a lusanguko

¹⁸ Ponkapo kwaishile Basadusea, bonkaba baitaba amba kafwako lusanguko lwa bafu, baishile kwi Yesu ne kumwipzha amba,

¹⁹ “Mufunjishi, Mosesa witunembejile uno mukambizho amba, ‘Umvwe mulongo wafwa bino washa mukazhi kwakubula kusema nanji baana ne, mulongo wayewa mwanamulume wafwainwa kumuswana amba asemenemo baana bayewa wafwa.’

²⁰ Kwajinga banabankazhi batanu na babiji, mubeji wasongwele ne kufwa kwakubula kusemapo baana.

²¹ Kabiji wa bubiji wamuswaine mwanamukazhi, ne aye naye wafwile kwakubula kusemapo baana. Ne wa busatu kyamumwekejile pamo byonkabyo,

²² Ne bonsetu balongo batanu na babibji bamusongwele awa mwanamukazhi bafwile kwakubula kusemapo nanji baana ne. Kumpelo ne mwine mwanamukazhi wafwile.

²³ Pano, byo bakasanguka mu juba ja lusanguko, ukekala ke muka ng'anyi? Mambo bonse batanu na babiji bamusongwele.”

²⁴ Yesu wibambijile amba, “Na onka ano mambo o mwalubila, byo mwabula kuyuka binembelo ne bulume bwa Lesa.

²⁵ Pakuba byo bakasanguka mu bafu, kechi bakasongola nangwa kusongolwa ne, bino bakekala nobe bamalaika ba mwiulu.

²⁶ Kabiji na mambo a lusanguko lwa bafu, nanchi kechi mwatangilepo mu buku wa Mosesa, panembwa na mambo a kipuupu, byo a mwambijile Lesa amba, ‘Amiwa ne Lesa wa Abulahama, ne Lesa wa Izaka, ne Lesa wa Yakoba’ nenyi?

²⁷ Aye, kechi ye Lesa wa bafu ne, bino ye wa bomi. Anweba mwalubishatu.”

Mukambizho mukatampe

²⁸ Munembeshi umo waishile ne kumvwa byo be pachikilenga bene na bene, ne pa kumona amba, Yesu wibakumbula bulongo, wamwipwizhe amba, “Nanchi ng'anyi mukambizho wanema kukila yonse?”

²⁹ Yesu wakumbwile amba, “Wanemesha kukila ye ye uno, umvwai anweba bena Isalela! Nkambo Lesa wetu, ye Nkambo umo.

³⁰ Kabiji obewa ukamutemwa Nkambo Lesa wobe na muchima wobe yense, ne na mweo wobe yense, ne na maana obe onse, ne na bulume bobe bonse.

³¹ Wa bubiji amba, ‘Ukamutemwa mukwenu byonka byowitemwa obewa mwine.’ Kafwako mukambizho mukwabo wakila ino ne.”

³² Ne munembeshi wamwambijile amba, “Mwa amba bulongo Mufunjishi! Mwa amba kine amba Lesa ye umo, kabiji kafwako mukwabo ne.

³³ Ne kumutemwa na muchima obe yense ne na maana onse, ne na bulume bonse, ne kutemwa mukwenu pamo byonka byowitemwa obewa mwine, kyakila milambo yonse ne bitapisho.”

³⁴ Kabiji Yesu pakumvwa byo akumbwile bulongo, wamwambijile amba, “Anweba kechi muji kwalepa na bufumu bwa Lesa ne.” Ne kufuma pa kyokya kimye kafwako wachinchikile kwiya na kumwipuzha mepuzho akwabo ne.

Nanchi Kilishitu mwana ng'anyi?

³⁵ Kabiji Yesu byo afunjishenga mu nzubo ya Lesa, waipwizhe jipuzho amba, “Mambo ka banembeshi kyobambila amba Kilishitu ye mwana Davida?

³⁶ Davida mwine, wa ambile na Mupashi Wazhila amba, “‘Nkambo wa ambijile Nkambo yami amba, Ikala ku kilujo kyami, Poso ngalule balwanyi bobe munshi ya maulu obe.’

³⁷ Davida mwine wamutongola amba, ‘Nkambo.’ Nanchi aye ye mwananji byepi?” Ne jibumba jikatampe jatelekelenga kwi Yesu jasekejile.

Lujimuno lwa Yesu na mambo a banembeshi

³⁸ Aye mu kufunjisha kwanji wa ambile amba, “Jimukai na banembeshi, batemwa kupitang'ana mu mikangyo yalepa, ne kutemwa lwimu mu bisankane,

³⁹ ne kutemwa bipona bya buneme mu mashinagoga, ne bifulo bya buneme ku bijiilo,

⁴⁰ Kabiji bangata mazubo a banabakazhi bafwilwa, ne na mambo a kusaka kwimwesha ku bantu amba bawama, balepesha milombelo yabo. Abo bakamona luzhachisho lwakila!”

Mulambo wa mwanamukazhi wafwilwa

⁴¹ Ne Yesu waikajile panshi kwipi na kilambwilo na kutala bantu byo batayilengamo mali monka mu kilambwilo. Ne bavula banonshi batayilengamo avula.

⁴² Ne mwanamukazhi wafwilwa mulanda watailemo tumali tubiji tucheche tulenga kangwe kamo.

⁴³ Ne aye wibechile baana banji babwanga ko aji, ne kwibambila amba, “Kine nemwambila namba, uno mwanamukazhi wafwilwa mulanda wabiikamo byakila bya bonse ba bena kutayamo mu kilambwilo.

⁴⁴ Mambo bonse babiikamo mwayila kuvula kwa bunonshi bwabo, pakuba aye mu buyanji bwanji wabiikamo byonse byo ajinga naabyo mwa kwikajila.”