Mako 11 - KNTP

Yesu byo atwelele mu Yelusalema kasa bamutota

¹ Kabiji byo bafikile kwipi na Yelusalema, ku Betefaji ne Betani, bayile ku Mutumba wa olivi. Yesu watumine baana banji babwanga babiji,

² ne kwibambila amba, “Yainga mu yewa muzhi ye mwatazhapo bilungi byenu. Ne ponkapotu pa kutwelamo musa kutaana mwana mbongolo ye bakasa, ye bakyangye kukanjilapo ku muntu. Mukamukasulule ne kumuleeta kuno.

³ Kabiji umvwe muntu wimwipuzha amba, mambo ka o mubena kubila bibye? Mukamwambile amba, Nkambo wamusaka, kabiji ukamubwezha kuno bukiji.”

⁴ Kabiji bayile bakataine mwana mbongolo ye bakasa pangye ya kibelo pa mukwakwa, ne kumukasulula bamukasulwile,

⁵ kabiji bamo baimene konka be bepwizhe amba, “Mubena kuubaka byo mubena kukasulula mwana mbongolo?”

⁶ Ne abo bebakumbwile monka mo ebambijile Yesu, kabiji bebalekele amba bayenga.

⁷ Kabiji bamuletele mwana mbongolo kwi Yesu, ne kumukupika bivwalo byabo, ne Yesu waikelepo.

⁸ Ne bavula ba anshikile bivwalo byabo mu jishinda, ne bakwabo ba anshikile mabuula a bichi byo bachimwinenga mu majimi.

⁹ Ne abo batangijileko, ne balondejilenga panyuma babijikilenga amba, “Hosana! Atotwe awa wiya mu jizhina ja Nkambo!

¹⁰ Butootwe abwa bufumu bwiya bwa mushakulu wetu Davida! Hosana mwiulu mwine!”

¹¹ Kabiji byo atwelele mu Yelusalema, wapitaijiletu kutwela mu nzubo ya Lesa. Byo atajiletajile pa bintu byonse, ne kimye kyaubile ke mabanga, walupukile ne kuya ku Betani naba jikumi ne babiji.

Mukuyu wabujile kupanga bipangwa

¹² Pa juba jalondejilepo byo babwelelenga kufuma ku Betani, Yesu waumvwine nzala.

¹³ Ne pa kumona kichi kya mukuyu kwalepa kasa kiji na mabuula, wapichile konka amba, kana nsakutaanako bipangwa. Kabiji byo afikileko watainekotu mabuula onka, mambo kechi kyajinga kimye kya makuyu ne.

¹⁴ Ponkapo aye wikyambijile amba, “Kafwako muntu nangwa umo ukajako bipangwa kwi obewa myaka yonse ne.” Ne baana banji babwanga bekyumvwine.

Yesu byo atokesheshe nzubo ya Lesa

¹⁵ Kabiji bafikile ku Yelusalema, ne kutwela mu nzubo ya Lesa watatwile kwibapangamo bapoteshenga ne bapotelenga mu nzubo ya Lesa, ne kwalumuna matebulu a bapimpwilenga mali ne bipona bya boba bapoteshenga ba nkunda.

¹⁶ Kabiji kechi waswishishe nangwa muntu umo kupisha kijiilo mu nzubo ya Lesa ne.

¹⁷ Kabiji wibafujishenga ne kwibambila amba, “Nanchi kechi kyanembwa amba, nzubo yami ikatelwa amba, nzubo ya milombelo ya mikoka yonse ya bantu nenyi? Pakuba anweba mwiyalula ke jiyengo ja ba tupondo!”

¹⁸ Kabiji bang'anga bakatampe ne banembeshi bekyumvwine, bakebelenga mwa kumonawina. Bino bamuchiine mambo jibumba jonse ja kuminye kufunjisha kwanji.

¹⁹ Kabiji pakufika mabanga balupukile mu muzhi.

Byakufunda ku kichi kya mukuyu

²⁰ Kabiji lukeelo byo bapichilenga, bamwene akya kichi kya mukuyu kyauma kufika ne ku mizhazhi.

²¹ Ne Petelo wavulukile ne kumwambila amba, “Laabi, talai! Akya kichi kya mukuyu kyo mwafingile kyauma!”

²² Ne Yesu wibakumbwile amba, “Ikalai na lwitabilo mwi Lesa.

²³ Kine nemwambila namba, awa ukamwambila uno mutumba amba, ushikulwe ne kutayiwa mu kalunga ka mema, ne kuzhinauka mu muchima wanji ne, kasa aitaba amba, akya kyo naamba kikamweka, kikamubilwa.

²⁴ Onkao mambo amiwa nemwambila namba, bintu byonse byo musaka, pa kulomba kasa mwitaba amba, twibitambula, kabiji bikekala ke byenu.

²⁵ Kabiji mu bimye byonse byo mwimana na kulomba, sa mulekela mambo umvwe muji na mambo na mukwenu, namba shenu wa mwiulu emulekele mambo enu.”

²⁶ Pakuba umvwe anweba ne kulekela mambo ne, aye shenu wa mwiulu naye kechi akemulekele mambo enu ne.

Byo baipwizhe Yesu mambo a luusa lwanji

²⁷ Kabiji baishile jibiji ku Yelusalema. Ne byo apitang'enenga mu nzubo ya Lesa, bang'anga bakatampe ne banembeshi, ne bakulumpe baishile ko aji,

²⁸ ne kumwipuzha amba, “Na ng'anyi luusa mo ubena kuubila bino bintu, kabiji ng'anyi wakupa luno luusa lwakuuba bino?”

²⁹ Kumvwa Yesu wibambijile amba, “Ne amiwa nsa kwimwipuzha jipuzho jimotu, kana mumbuule, ne amiwa nsa kwimubuula luusa mo ngubila bino.

³⁰ Nanchi lubatizhilo lwa kwa Yoano lwafumine kwiulu nyi, inyi lwafumine ku bantu? Mbulai.”

³¹ Ponkapo baambang'ene abo bene na bene amba, “Umvwe twambe namba lwa mwiulu, aye usa kwamba amba, mambo ka o mwabujile kumwitabila?

³² Pakuba umvwe twambe namba, lwa bantu,” (bachiine bantu mambo bonse bayukile amba Yoano wajinga ngauzhi wa kine.)

³³ Ponkapo bamukumbwile Yesu amba, “Kechi twayuka ne.” Kumvwa Yesu naye wibambijile amba, “Nanchi ne amiwa kechi nemubuule luusa lo ngubilamo bibye ne.”