Mako 1 - KNTP

Busapwishi bwa Yoano Mubatishi

¹ Ntendekelo ya Mambo Awama a Yesu Kilishitu, Mwana Lesa.

² Byonka byo kyanembwa mu buuku wa Isaya ngauzhi amba, “Tala! Mbena kutangizha muluwe wami kulutwe yobe ukanengezha jishinda jobe.

³ Jiwi ja umo ubijika mungye amba, nengezhezhai jimo jishinda ja Nkambo, ololai mashinda anji!”

⁴ Yoano waishile kasa abatizha mungye ne kusapwila mambo a lubatizhilo lwa lulapilo lwa lulekelo lwa mambo.

⁵ Kabiji bamu kyalo kyonse kya Yudea ne bena Yelusalema bonse bayilenga konka ko aji. Kabiji ba batizhilwe kwi aye mu mukola wa Yodano, kasa besolola mambo abo.

⁶ Yoano wavwajile bivwalo byalengwa na boya bwa ngamela, kabiji wanyingile ne mukwandala wa kiseba mukifuka kyanji, kabiji wa janga nzhiye ne buki bwa mungye.

⁷ Ne aye wasapwijilenga amba, “Panyuma yami pa bena kwiya umo wankila bulume. Mikanda ya makwabilo anji kechi nafikilamo kubandama ne kwiikasulula ne.

⁸ Amiwa nemubatizha na mema, pakuba aye ukemubatizha na Mupashi Wazhila.”

Lubatizhilo ne kwesekwa kwa Yesu

⁹ Mu oa moba Yesu wafumine ku Nazala muzhi wa mu Ngalilea, ne kubatizhiwa kwi Yoano mu Yodano.

¹⁰ Kabiji ponkapotu pa kutuntuka kufuma mu mema, wamwene jiulu kasa jibena kushinkuka ne Mupashi kasa a mwikijila nobe nkunda.

¹¹ Kabiji mwafumine jiwi mwiulu amba, “Yobe Mwanami yenatemwa, mo namwena lusekelo.”

¹² Kabiji ponkapotu aye Mupashi wamutwajile mungye.

¹³ Ne aye waikajile mungye moba makumi ana, kasa bamweseka kwi Satana. Kabiji waikajilenga na banyama bamungye, ne bamalaika bamwingijilenga.

Kwitwa kwa baana banji babwanga batanshi

¹⁴ Kabiji Yoano byo bamukwachile, Yesu waishile mu Ngalilea kasa asapwila Mambo Awama a Lesa amba,

¹⁵ “Kimye kyafika kala, ne bufumu bwa Lesa bwafwenya ke pepi! Lapilai ne kwitabila mu Mambo Awama.”

¹⁶ Kabiji Yesu byo a sezhezhenga kizhiba kya Ngalilea, wamwene Shimona ne Andeleo mulongo wanji kasa bata bukonde mu mema, mambo baingilanga mwingilo wa kukwata masabi.

¹⁷ Ne Yesu wibambijile amba, “Ndondelai, kabiji amiwa nkemwalula ke bamwingilo wa kukwata bantu mu kwi bapulusha.”

¹⁸ Ne ponkapotu bashiile makonde abo ke bamulondele.

¹⁹ Kabiji byo a endeleko pacheche wamwene Yakoba ne Yoano baana ba Zebede, kasa baji mu bwato na kununga makonde.

²⁰ Kabiji ponkapo wibechile, ne abo bashiile shabo Zebede mu bwato naba mingilo ke bamulondele.

Kubukwa kwa muntu wajinga na bapashi babiipa

²¹ Kabiji batwelele mu Kapenama, ponkapo mu juba ja Sabado watwelele mu shinagoga kafunjishe.

²² Kabiji bakuminye bingi kufunjisha kwanji, mambo wafunjishenga na luusa, kechi pamo nobe banembeshi ne.

²³ Kabiji ponkapotu mu Shinagoga mwaji muntu wajinga na mupashi wabiipa, kabiji wabijikile.

²⁴ Amba, “Leelo mwasaka kuubaka ne atweba, Yesu mwina Nazala? Leelo mwaiya na kwitonauna atweba nyi? Nemuyuka anweba byo muji, anweba mwi Wazhila wa Lesa!”

²⁵ Bino Yesu wamukainye amba, “Zhindama, fumamo mwi aye!”

²⁶ Ne mupashi wabiipa, wamusunkakenye ne kubijika na jiwi jikatampe, kabiji wafuminemo mwi aye.

²⁷ Kabiji bonse bakuminye bingi, ne kwiipuzha abo bene na bene, ne kwamba amba, “Leelo kino kintu ikika? Lufunjisho lungi, lwa na luusa! Aye ukambizha ne bapashi babipa ne abo bamukookela.”

²⁸ Ponkapo ne nkuwa yanji yakumbene mu kyalo kyonse kya Ngalilea ne mumande a kubwipi.

Kubukwa kwa bantu bavula

²⁹ Kabiji Yesu pa kulupuka mu Shinagoga pamo na baana banji babwanga, bakatwelele ne Yakoba ne Yoano mu nzubo ya ba Shimona ne Andeleo.

³⁰ Bino inanjivyala Shimona walaajile pa mwanya mambo wakolelwe kikola kya mashika, ne abo bamubujile mambo a kikola kyanji.

³¹ Kepo aishile kumukwata pa kuboko, ne kumwimanya. Ponkapotu ne kikola kyamulekele, ne kwingila ke ebengijile.

³² Kabiji mabanga pa kuzhika juba, bamuletejile bonse bakolwa ne banonkwa na bademona.

³³ Ne bonse ba mu muzhi bapwijile konka ku kibelo kya nzubo.

³⁴ Ne aye wabukile bavula bakolelwenga bikola bya misango ne misango, kabiji wapangilemo bademona bavula mu bantu. Kechi wibaswishishe bademona amba bambe ne, mambo bamuyukile.

Kusapwila kwa Yesu mu Ngalilea

³⁵ Kabiji bufuku pa kutwala kumakya, aye wabuukile ne kulupuka mu nzubo, ne kuya mungyetu, mo aka lombelenga.

³⁶ Bino Shimona ne boajinga nabo, bayile na kumukeba,

³⁷ kabiji byo bamutaine ba mwambijile amba, “Bonse babena kwimukeba.”

³⁸ Kepo aye wibakumbwile amba, “Twafwainwa kuya mu mizhi ikwabo iji ku bwipi na uno, amba namo nkasapwile monka, pakuba o mambo o naishila.”

³⁹ Ne aye wayile mu Ngalilea monse, kasa asapwila mu mashinagoga ne kupangamo bademona mu bantu.

Kubukwa kwa muntu wa mbumba

⁴⁰ Kabiji kwaishile muntu wa mbumba ko aji, kasa a musashijila ne kumufukamina panshi, ne ku mwambila amba, “Umvwe mwaswa, mwayuka kumbuka.”

⁴¹ Ponkapo wamubijile lusa, watanyikile kuboko kwanji ne kumukwata amba, “Naswa, mubukiwe.”

⁴² Kabiji ponkapotu mbumba ya mulekele, ne kubukwa wabukilwe.

⁴³ Ne Yesu wamufunjile kyakosa, kepo a mwimenye ka ye,

⁴⁴ ne ku mwambila amba, “Talai, kechi mubulepo nangwa muntu umo ne, yainga mukemweshe anweba bene kwi ng'anga wa Lesa mukalambule byakambizhe Mosesa bya kubukwa kwenu, kikale ke kiyukilo ku bantu.”

⁴⁵ Pakuba aye walupukile ne kutatula kwi kitayila mbila, ne kukumbanya konse ao mambo. Onkao mambo Yesu kechi wasakile kutwela mu muzhi ku meso a bantu ne. Kepo aikajile mungyetu, ne bantu baishilenga ko aji kufuma konse konse.