Lumwekesho 9 - KNTP

¹ Ne malaika wa butanu naye waimbile. Namwene kabangabanga ka mwiulu kaponejile pantanda, kabiji bamupele kii wa kalengwa kabuula kupela.

² Ponkapo washinkwile kalengwa kabuula kupela, kabiji mu kalengwa mwafutumukile bwishi, nobe bwishi bwa munkinyi mukatampe, ne juba ne monse mwiulu mwafiichile na mambo a bwishi bwafumine mu kalengwa.

³ Kabiji monka mu bwishi mwafumine nzhiye, yaishile pantanda, kabiji beipele bulume pamo na bulume bwa tuminye twa pantanda.

⁴ Kabiji beyambijile amba, kechi yonaune nsono ya pantanda ne, nangwa bikwabo byatalala ne, nangwa bichi ne, poso bonkaba bantu babula kayukilo ka Lesa pa bilungi byabo.

⁵ Kabiji beikainye amba, kechi mwibepaye ne, posotu kwibamanyika bang'ondo batanu. Ne kukola kwayo kwajinga pamo nobe misongo ya kaminye byo kasuma muntu.

⁶ Kabiji mu oa moba bantu bakakeba lufu, bino kechi bakelumona ne, kabiji bakasaka kufwa, pakuba lufu lukebanyema.

⁷ Aya nzhiye ya mwekelenga nobe bambili bo banengezha kuya ku nkondo; ne pa mitwe yayo pajinga minchinya nobe ya ngolode, ne bilungi byayo bya mwekelenga nobe bilungi bya bantu.

⁸ Kabiji yajinga na nsuki yalepa nobe ya banabakazhi, ne meno ayo ajinga nobe meno a mabokwe.

⁹ Kabiji yajinga na bilama kyaji byauba nobe bya kapotwe, ne kululuma kwa byapi byayo kwaubile nobe kululuma kwa makalaki a ku bambili bavula babena kunyemena lubilo ku nkondo.

¹⁰ Kabiji iji na mikila yauba nobe tuminye, ne muna, ne mu mikila yayo mo muji bulume bwa kukozha bantu bang'ondo batanu.

¹¹ Bino baji na mfumu wabo yenkaye malaika wa kalengwa. Jizhina janji mu Kihebelu ja Abadoni, pakuba mu kigiliki namo ja Apolyona. (Kulumbulula amba “Monaushi.”)

¹² Malwa atanshi apita, talai, kwakishala malwa akwabo abiji akeya kulutwe.

¹³ Kabiji aye malaika wa butanu na bumo naye waimbile, ponkapo naumvwine jiwi jafumine ku nsengo ina ya ku kyakusokelapo byakufutumuna kya ngolode kiji ku meso a Lesa.

¹⁴ Kasa jimwambila awa malaika wa butanu na bumo wajinga na ntolompita amba, “Kasulula aba bamalaika bana bakaswa ku mukola mukatampe Ufelata!”

¹⁵ Ne aba bamalaika bana bebakasulwile, bonkaba bo batongwejile jimo akya kimye ne juba, ne ng'ondo, ne mwaka amba, bakepaye lubaji lumo lwa pa lubaji lusatu lwa bantu.

¹⁶ Ne nzhita ya bajinga pa bambili pa kwibabala bajinga bavula bingi.

¹⁷ Kabiji bino byobyo namwene bambili mu kimwesho, ne abo baikajilepo, kasa baji na bilama kyaji bichila nobe mujilo, ne kifufya nobe jiulu, ne kibobo nobe safila. Ne mitwe ya bambili yamwekele nobe mitwe ya mabokwe, kabiji mutunwa twabo mulupuka mujilo ne bwishi ne kibiliki.

¹⁸ Lubaji lumo lwa pa lubaji lusatu lwa bantu lwaipayilwe na ino myalo; ko ku mujilo ne ku bwishi ne ku kibiliki, byafumine mutunwa twabo.

¹⁹ Mambo bulume bwa aba bambili bwajinga mutunwa twabo, ne mu mikila yabo. Mikila yabo yajinga nobe milolo iji na mitwe yo bakozhako bantu.

²⁰ Kabiji ne bantu bashajilepo, babujilwe kwipayiwa na ino myalo, kechi balapijile ku mingilo ya maboko abo amba, tuleke kupopwela bademona, ne bankishi ba ngolode, ne ba siliva, ne ba lubemba, ne ba mabwe, ne ba bichi bibula kumona, ne kumvwa nangwa kwenda ne.

²¹ Nangwa kulapila ku kwipayang'ana kwabo, nangwa ku bya bung'anga bwabo bwa lubuko, nangwa ku bulalelale bwabo, nangwa ku bwivi bwabo ne.