Lumwekesho 8 - KNTP

¹ Kabiji byo ashinkwile kateetesho ka butanu na bubiji, ponkapo mwiulu mwazhindamine pepi awala wa kichika.

Matolompita

² Kabiji namwene aba bamalaika batanu na babiji bemana ku meso a Lesa, kabiji bebapele matolompita atanu na abiji.

³ Kabiji malaika mukwabo waishile na kwimana ku kyakusokelapo byakufutumuna, wajinga na kambabula ka ngolode. Bamupele byakufutumuna byavula, amba avwange na milombelo ya bazhijikwa bonse pa kyakusokelapo byakufutumuna kya ngolode kyajinga ku meso a jitanda.

⁴ Ne bwishi bwa byakufutumuna bwafutumukile na milombelo ya bazhijikwa ku meso a Lesa kufuma ku kuboko kwa aye malaika.

⁵ Kabiji aye malaika, byo ashikwile kambabula, wikayuzhizhe na mujilo wa pa kyakusokelapo byakufutumuna ne kumusukumwina pano pantanda. Ponkapo kwajinga kilulumo, ne mawi, ne kubeesha, ne kitentanshi.

⁶ Ne aba bamalaika batanu na babiji bajinga na matolompita atanu na abiji benengezhe kwiemba.

⁷ Malaika mutanshi waimbile, ponkapo ke mvula wa mabwe ne mujilo, byavwangakana na mashi, byaelelwe pantanda. Ne lubaji lumo lwa pa lubaji lusatu lwa pantanda lwapiile, ne lubaji lumo lwa pa lubaji lusatu lwa bichi nabyo lwapiile, ne nsono yonse yatalala nayo yapiile.

⁸ Kabiji malaika wa bubiji naye waimbile, ponkapo kyaubile nobe mutumba mukatampe uteema na mujilo waelelwe mu kalunga. Ne lubaji lumo lwa pa lubaji lusatu lwa kalunga lwaalukile ke mashi,

⁹ ponkapo lubaji lumo lwa pa lubaji lusatu lwa bilengwa byajinga na bumi mu kalunga byafwile, kabiji lubaji lumo lwa pa lubaji lusatu lwa maato nao aonaikile.

¹⁰ Ne malaika wa busatu naye waimbile, ponkapo mwiulu mwaponene kabangabanga kakatampe, kasa kateema nobe nsoko, kaponejile pa lubaji lumo lwa pa lubaji lusatu lwa mikola, ne pa masulo patupauka mema.

¹¹ (Ne jizhina ja kabangabanga jo ja “Kulula.”) Ne lubaji lumo lwa pa lubaji lusatu lwa mema a alukile ke alula, ne bantu bavula bafwile na oa mema, mambo aalukile ke alula.

¹² Ne aye malaika wa buna naye waimbile. Ne lubaji lumo lwa pa lubaji lusatu lwa juba lwapuminwe, ne lwa ng'ondo, ne lwa tubangabanga; amba lubaji lumo lwa pa lubaji lusatu lwabyo byaluke ke bifiita, ne juba kechi jube mute lubaji lumo lwa pa lubaji lusatu lwajo ne, ne bufuku nabo byonkabyo.

¹³ Kabiji namwene ne kumvwa mpungu umo kasa apita pakachi ka jiulu, kasa abijika na jiwi jikatampe amba, “Malwa! Malwa! Malwa! Aboba bekala pano pantanda, na mambo a kuvuma kwa oa matolompita a boba bamalaika basatu, bakyangye kwimba!”