Lumwekesho 7 - KNTP

Bena Isalela 144,000

¹ Pakupita bibye, namwene bamalaika bana kasa baimana ku makonka ana a pano pantanda, kasa bakwata luvula luna lwa pano pantanda amba, kafwako luvula nangwa lumo lupuupe pano pantanda, nangwa pa kalunga, nangwa pa bichi ne.

² Kabiji namwene ne malaika mukwabo kasa akanjila kufuma ko jiseelela juba, kasa aji na kayukilo ka Lesa mumi. Ponkapo aye wabijikile na jiwi jikatampe kwi aba bamalaika bana bo bapeele kwiyuba bibi ntanda ne kalunga

³ amba, “Kechi mwiyube bibi ntanda nangwa kalunga, nangwa bichi ne, poso tukapwishe kubiika kayukilo pa bilungi bya bakalume ba Lesa wetu.”

⁴ Kabiji naumvwine nambala ya bobabikilepo kayukilo, bajinga 144,000 bo babikile kayukilo ba mu mikoka yonse ya bena Isalela.

⁵ Bamu mukoka wa Yuda bo babikilepo kayukilo bajinga biumbi jikumi na bibiji, mu mukoka wa Lubenyi nabo bajinga biumbi jikumi na bibiji, bamu mukoka wa Gadi nabo bajinga biumbi jikumi na bibiji,

⁶ ne bamu mukoka wa Ashela nabo bajinga biumbi jikumi na bibiji, ba mu mukoka wa Nafitali nabo bajinga biumbi jikumi na bibiji, mu mukoka wa Manase nabo bajinga biumbi jikumi na bibiji.

⁷ Ne bamu mukoka wa Shimeona nabo bajinga biumbi jikumi na bibiji; bamu mukoka wa Levi nabo bajinga biumbi jikumi na bibiji, ne bamu mukoka wa Isakala nabo bajinga biumbi jikumi na bibiji.

⁸ Ne bamu mukoka wa Zebuluna nabo bajinga biumbi jikumi na bibiji, bamu mukoka wa Yosefwa nabo baji biumbi jikumi na bibiji, bamu mukoka wa Benjamina nabo bajinga biumbi jikumi na bibiji babikilwe kayukilo.

Jibumba jikatampe ja kukankalwa kubala

⁹ Pakupita bibye, ponkapo namwene jibumba jikatampe, jo babula kukonsha kubala nangwa ku muntu umo ne! Bafuma mu mikoka yonse ne mu bisaka byonse ne mu mitundu yonse ne njimi yonse ya bantu, kasa baimana ku meso a jitanda ne ku meso a Mwana Mukooko, kasa bavwala bivwalo bitoka, ne mapambo a bisonga mu maboko abo.

¹⁰ Kabiji babijikile na jiwi jikatampe, amba, “Lupulukilo lufuma kwi Lesa wetu waikala pa jitanda, ne kwi Mwana Mukooko!”

¹¹ Ne bamalaika bonse kasa baimana, bazhokolokele jitanda, ne aba bakulumpe ne aba bomi bana. Kabiji baponene panshi kinkuvumene ku meso a jitanda, ke bapopwele Lesa,

¹² amba, “Amena! Lutakaiko, ne lukumo, ne maana, ne sante, ne buneme, ne bulume, ne bulobo, bikale kwi Lesa wetu myaka ne myaka! Amena!”

¹³ Kumvwa umo wa aba bakulumpe wangipwizhe amba, “Bano bavwala bivwalo bitoka, bo ba ng'anyi, kabiji bafuma pi?”

¹⁴ Amiwa namukumbwile namba, “Nkambo, anweba mwayuka.” Ne aye wang'ambijile amba, “Bano bo boba bafuma mu oa malwa akatampe, ne kovwa baovwa bivwalo byabo, ne kwibitokesha mu mashi a Mwana Mukooko.

¹⁵ Onkao mambo baji ku meso a jitanda ja Lesa, kabiji bamwingijila mute ne bufuku monka mu nzubo yanji. Ne aye waikala pa jitanda ukebavweta aye mwine.

¹⁶ Kechi bakomvwa nzala jibiji ne, nangwa kumvwa kilaka ne, ne mute nangwa kyuya kechi bikebakatazha ne,

¹⁷ mambo aye Mwana Mukooko uji mukachi ka jitanda ukekala kafunga wabo, kabiji ukebatangijila kuji masulo atupauka a mema a bumi. Ne aye Lesa ukashiimuna mipolo yonse ku meso abo.”