Lumwekesho 6 - KNTP

Tuteetesho

¹ Kabiji namwene aye Mwana Mukooko byo ashinkwile katetesho kamo ka atwa tuteetesho tutanu na tubiji, kabiji naumvwine umo wa mu boba bomi bana kasa amba na jiwi nobe ja kilulumo amba, “Iya!”

² Ponkapo namwene, mbili utoka, ne aye waikajileepo wajinga na buta bwa mukanda, kabiji bamupele ne munchinya. Wayilenga na kushinda amba akashinde.

³ Kabiji byo ashinkwile kateetesho ka bubiji, naumvwine awa mumi wa bubiji amba, “Iya!”

⁴ Ponkapo mbili mukwabo uchila, walupukile. Kabiji aye waikalapo wapeelwe luusa amba, afumye mutende pano pantanda, amba bantu beipaye bene na bene. Kabiji bamupele ne mpoko ikatampe.

⁵ Kabiji byo ashinkwile kateetesho ka busatu, naumvwine awa mumi wa busatu amba, “Iya!” Kabiji namwene, mbili ufiita. Ne aye waikalapo wajinga na shikelo mu kuboko kwanji.

⁶ Kabiji naumvwine nobe jiwi pakachi ka aba bomi bana amba, “Kipimo kimo kya wichi kipotwe pamutengo wabaya wa ndenali imo, ne bipimo bisatu bya mbaale nabyo bipotwe pamutengo wabaya wa ndenali imo, pakuba manyi ne binyu kechi wibyonaune ne!”

⁷ Kabiji byo ashinkwile kateetesho ka buna, naumvwine jiwi ja awa mumi wa buna amba, “Iya!”

⁸ Kabiji namwene mbili watubuluka. Ne aye waikalapo, jizhina janji wajinga Lufu, ne Kalunga ka bafu kamulondejile panyuma. Kabiji bebapele luusa lwa pa lubaji lumo lwa pa lubaji luna lwa pano pantanda, lwa kwipaya na mpoko, ne na nzala, ne na mwalo, ne na banyama bakaji ba pano pantanda.

⁹ Kabiji byo ashinkwile kateetesho ka butanu, namwene munshi ya kyakusokelapo byakufutumuna myeo ya boba bo baipayile na mambo a byambo bya Lesa, ne na mambo a kulama bukamonyi bwabo.

¹⁰ Kabiji babijikile na jiwi jikatampe amba, “Anweba Nkambo, wazhila ne wa kine, myaka inga yo mukabula kwituchibila mambo ne kushinkanya naabo bekala pantanda na mambo mashi etu?”

¹¹ Ponkapo bebapele bonse bivwalo bitoka, kabiji bebambijile amba, mukikokoloke kakimye, poso nambala ikafikile ya bakwenu ba mu mwingilo ne balongo benu bakepayiwe pamo nobe anweba.

¹² Kabiji byo ashinkwile kateetesho ka butanu na bumo, ponkapo namwene kitentanshi kikatampe, ne juba jaalukile ke jifiita nobe jisaka ja boya, ne ng'ondo yense waalukile nobe mashi.

¹³ Ne tubangabanga twa mwiulu twaponene panshi, pamo nobe mukuyu ukunta makuyu anji abishi byo bamusunkenya ku kipuupu kikatampe.

¹⁴ Kabiji jiulu ja abene ne kuuba nobe pepala walepa ye bavunga, ne mitumba yonse ne makuji onse byafuminepo po byajinga.

¹⁵ Kabiji ne bamfumu ba pano pantanda, ne bakulumpe ba mu byalo, ne bene bakulumpe ba bashilikale, ne banonshi, ne bilobo, ne bazha ne baana ba bene bonsetu, bafyamine mu mayengo ne mu mabwe a ku mitumba.

¹⁶ Kabiji ba ambijile mitumba ne mabwe amba, “Tuponenai, mwitufye ku meso a yewa waikala pa jitanda, ne ku bukaji bwa Mwana Mukooko!

¹⁷ Mambo juba jikatampe ja bukaji bwabo jafika, kabiji ng'anyi wakonsha kwimana?”