Lumwekesho 5 - KNTP

Buku ne Mwana Mukooko

¹ Kabiji namwene buku mu kuboko kwa kilujo kwa yewa waikala pa jitanda, wanembwa mukachi ne pangye, ye bashinkisha na tuteetesho tutanu na tubiji.

² Ponkapo namwene ne malaika wakosa kasa abijika na jiwi jikatampe amba, “Ng'anyi wafwainwa kushinkula uno buku, ne kukasulula tuteetesho tujipo?”

³ Kabiji kafwamo mwiulu, nangwa pano pantanda, nangwa munshi ya ntanda, wakonsheshe kumushinkula awa buku ne, nangwa kutalapo ne.

⁴ Ne amiwa najijile bingi, mambo kafwako wamwekele wafwainwa kumushinkula awa buku ne, nangwa kutalapo ne.

⁵ Ponkapo umo wa aba bakulumpe wang'ambijile amba, “Kujila ne. Tala! Aye Bokwe wa mu mukoka wa Yuda, mwine muzhazhi wa Davida ye washinda, ye wakonsha kushinkula awa buku ne tuteetesho tutanu na tubiji tujipo.”

⁶ Kabiji namwene jitanda ne aba bomi bana, ne aba bakulumpe ne mwana mukooko kasa aimana mukachi, wamweka nobe waipayilwe, wajinga na nsengo itanu na ibiji, ne meso nao atanu na abiji, yo mipashi itanu na ibiji ya Lesa, yatumwa pano pantanda ponse.

⁷ Ponkapo aye waishile na kutambula buku mu kuboko kwa kilujo kwa yewa waikajile pa jitanda.

⁸ Kabiji byo atambwile awa buku, ponkapo aba bomi bana ne aba bakulumpe makumi abiji ne bana, baponene mu kyenyi kya aye mwana mukooko, bonse kasa baji na byansa pa muntu pa muntu, ne michiba ya ngolode yayula byakufutumuna, yo milombelo ya bazhijikwa.

⁹ Kabiji baimbile lwimbo mupya amba. “Anweba yenu mwafwainwa kutambula buku ne kushinkula tuteetesho tujipo. Mambo anweba mwaipayilwe, kabiji mwamupotejile Lesa na mashi enu bantu ba mu bisaka byonse, ne ba mu njimi yonse, ne ba mu mitundu yonse, ne ba mu mikoka yonse.

¹⁰ Ne kwibalula kwikala ke bufumu ne bang'anga kwi Lesa wetu; kabiji bakekala bamfumu pantanda.”

¹¹ Kabiji namwene, ne kumvwa naumvwine jiwi ja bamalaika bavula bingi! Bazhokolokele jitanda ne aba bomi ne aba bakulumpe. Kabiji pa kwibabala bajinga jibumba jikatampe ja kukankalwa kubala,

¹² kasa bamba na jiwi jikatampe amba, “Aye Mwana Mukooko waipayilwe ye wafwainwa kutambula bulume, ne bunonshi, ne maana, ne ngovu, ne buneme, ne lukumo, ne lutakaiko!”

¹³ Ne bilengwa byonse biji mwiulu, ne pano pantanda, ne munshi ya ntanda, ne pa kalunga ka mema, ne byonse byumi, nebyumvwine kasa byamba amba, “Kwi aye waikala pa jitanda, ne kwi aye Mwana Mukooko, kwikale lutakaiko, ne buneme, ne lukumo, ne bulobo, myaka ne myaka!”

¹⁴ Ne aba bomi bana ba ambile amba, “Amena!” Ponkapo ne aba bakulumpe baponene panshi na kupopwela.