Lumwekesho 4 - KNTP

Bupopweshi bwa mwiulu

¹ Pakupita bibye, namwene kibelo kyashinkuka mwiulu, kabiji ne jiwi jitanshi jo naumvwine, jaubile nobe ja ntolompita, kasa jing'ambila amba, “Kanjila kuno, nkubuule bintu bikamweka kulutwe.”

² Ponkapotu naji mu Mupashi. Kabiji mwiulu mwajinga jitanda, ne umo kasa aikala ponka.

³ Ne aye waikajileepo pa kumutala, wamwekele nobe jibwe ja yasipa ne ja salajasi, ku jitanda kwazhokolokele ne kakongolo, kamwekele nobe emalode.

⁴ Kabiji ku jitanda kwazhokolokele bipona makumi abiji ne bina, kabiji pa byobya bipona namwene bakulumpe makumi abiji ne bana, kasa baikala bavwala bivwalo bitoka, ne pa mitwe yabo pajinga minchinya ya ngolode.

⁵ Kabiji ne mu jitanda mwalupukile kubeesha, ne mawi, ne bilulumo. Ne malampi atanu ne abiji a mujilo atemenenga ku meso a jitanda, yo mipashi itanu na ibiji ya Lesa.

⁶ Kabiji ku meso a jitanda, kwamwekele nobe kalunga ka kilola, kyapasha jibwe ja kilishitala. Ne ku jitanda kwazhokolokele bomi bana bakumbana meso, kulutwe ne kunyuma.

⁷ Kabiji aye mumi mutanshi wapashang'ene nobe bokwe, ne aye mumi wa bubiji nobe mwana ng'ombe, ne aye mumi wa busatu wajinga na kilungi nobe muntu, ne aye mumi wa buna wamwekele nobe mpungu ubena kupita mwiulu.

⁸ Ne abo bomi bana, bonse bajinga na byapi bitanu na kimo, bakumbene ne meso monse monse, kabiji kechi bakokoloka mute nangwa bufuku ne, kasa bamba amba, “Wazhila, wazhila, wazhila, Nkambo Lesa, Wa bulume bonse, ye wajingapo, ye ujipo, kabiji ye ukekalangapo.”

⁹ Kabiji aba bomi bimye byo bapana lukumo, ne buneme, ne sante, kwi aye waikala pa jitanda, kwi aye wikala myaka ne myaka,

¹⁰ aba bakulumpe makumi abiji ne bana baponena mu kyenyi kya yewa waikala pa jitanda, kabiji bamupopwela aye wikala myaka ne myaka, ne kutaya minchinya yabo ku meso a jitanda amba,

¹¹ “Mwafwainwa anweba Nkambo yetu Lesa wetu, kutambula lukumo, ne buneme, ne bulume. Mambo anweba yenu mwalengele byonse, kabiji na mambo onka a kyaswa muchima wenu obyaikajile, obyalengejilwe.”