Lumwekesho 3 - KNTP

Nkalata ku kipwilo kya ku Saladisa

¹ “Kabiji kwi aye malaika wa mu kipwilo kya mu Saladisa unembe amba; “Aye uji na mipashi itanu na ibiji ya Lesa, ne atwa tubangabanga tutanu na tubiji, wa amba bino amba, nayuka mingilo yobe, ne byo uji na jizhina nobe wi mumi, bino wi mufu!

² Kasa ukenkenta, ukoseshe bintu byashalaapo, biji pepi kufwa! Mambo kechi namona mwingilo obe nangwa umo walumbuluka ku meso a Lesa wami ne.

³ Vuluka byo wafunjishiwe ne byo waumwvine, wibilame, ne kulapila. Umvwe wabula kulaba ne kukenkenta, nkeya nobe ngivi, kabiji kechi ukayuka kimye kyo nkeshilamo kwi obewa ne.

⁴ Bino uji na mazhina amo acheche mu Saladisa a baabula kubipisha bivwalo byabo. Abo bakendanga ne amiwa kasa bavwala bitoka, mambo bo bafwainwa.

⁵ Aye ushinda ukavwala bivwalo bitoka, ne amiwa kechi nkazhimang'anya jizhina janji mu buku wa bumi ne, kabiji nketaba jizhina janji ku meso a Bataata ne ku meso a bamalaika babo.

⁶ “Aye uji na matwi, omvwe byamba Mupashi ku bipwilo!”

Nkalata ku kipwilo kya ku Filadelifya

⁷ “Kabiji kwi aye malaika wa mu kipwilo kya Filadelifya unembe amba: “Aye wazhila wa kine, ye uji na kii wa Davida, aye umvwe washinkula kafwako wakonsha kushinka ne, kabiji umvwe washinka kafwako wakonsha kushinkula ne, wa amba bino amba.

⁸ Nayuka mingilo yobe. Pano umvwa! Na kushinkwila kibelo kyashi ku meso obe, kafwako wakonsha kwikishinka nangwa umo ne. Nayuka namba, obewa uji na ka bulume kacheche, kabiji wakookela mafunjisho ami, ne kukana jizhina jami ne.

⁹ Umvwa! Ba mu shinagoga ya Satana, bonka beteela amba bo Bayudea, bino kechi ibo ne babepa, amiwa nkebalengesha namba bakeye na kupopwela ku maulu obe. Bakayuke amba amiwa nakutemwa.

¹⁰ Byo wakookejile mukambizho wami wa kutekanya, ne amiwa nkakulama ku kyokya kimye kya lweseko, kyonkakya kikeeya pano pantanda ponse, kya kwibeseka bonse bekala pano pantanda.

¹¹ Abo ngiya bukiji. Kwachisha akya kyo uji naakyo, namba kafwako nangwa umo akwangate munchinya wobe ne.

¹² Aye ushinda, nkamwalula ke jishiki ja mu nzubo yazhila ya Lesa wami, kabiji kechi ukalupukamo ne. Ne amiwa nkanemba pe aye jizhina ja Lesa wami, ne jizhina ja muzhi wa Lesa wami, ye Yelusalema mupya, ufuma mwiulu kwi Lesa wami, ne jizhina jami jipya.

¹³ “Aye uji na matwi, omvwe byamba Mupashi ku bipwilo.

Nkalata ku kipwilo kya ku Laodikea

¹⁴ “Kabiji kwi aye malaika wa mu kipwilo kya mu Laodikea unembe amba: “Aye Amena, kamonyi wakishinka ne wa kine, ye ntendekelo ya bilengwa bya Lesa, wa amba bino amba,

¹⁵ nayuka mingilo yobe, byo wabula kuuba munyango nangwa kuuba kyuya. Nasaka namba inge waji kuuba munyango nangwa kuuba kyuya!

¹⁶ Byonkabyo byo waubatu kyambaazhi, ne kuuba kyuya nangwa munyango ne, amiwa nkakulasa mu kanwa kami!

¹⁷ Mambo byo wa amba amba, ‘Amiwa ne munonshi, namona bya bunonshi byavula, kechi nakajilwa kintu nangwa kimo ne.’ Bino kechi wiyuka obewa mwine amba, wi wa mu malwa, wiulenga lusa, wi muyanji, wi mpofu, ne wa bwamba ne.

¹⁸ Nakubuula namba, upote kwi amiwa ngolode yasungululwa mu mujilo, namba wikale ke munonshi, upote ne bivwalo bitoka namba wivwike, bumvu bwa bwamba bobe kechi bumweke ne, ne muchi wa kushinga pa meso obe umonenga.

¹⁹ Bonse bo natemwa, nebalengulula ne kwibajimuna. Onkao mambo kasa uteshakotu muchima ne kulapila.

²⁰ Umvwa! Naimana pa kibelo kasa nkonkonsha, umvwe muntu waumvwa jiwi jami ne kunshinkwilako, amiwa nkatwela mo aji ne kuja nanji, ne aye ne amiwa.

²¹ Aye ushinda, amiwa nkamupa namba ekale ne amiwa pa jitanda jami, byonka byo nashinjile ne amiwa, ne kwikala naikala ne Bataata ponka pa jitanda jabo.

²² “Aye uji na matwi, omvwe byamba Mupashi ku bipwilo.”