Lumwekesho 22 - KNTP

¹ Kabiji aye wammwesheshe mukola wa mema a bumi, a kilola nobe kilishitala, kasa afuma mu jitanda ja Lesa ne ja Mwana Mukooko,

² ne kupita mukachi ka mukwakwa wa mu muzhi. Ku bushiya ne bushiya bwa mukola kwajinga kichi kya bumi, kipanga bipangwa bya misango jikumi na ibiji, kasa kipanga pa ng'ondo, pa ng'ondo, ne mabuula akyo oa kubuka mikoka ya bantu.

³ Kabiji mafingo kechi akekalako jibiji ne. Ne jitanda ja Lesa ne ja Mwana Mukooko jikekala monka, ne bakalume banji bakamwingijilanga.

⁴ Kabiji bakamona kilungi kyanji, ne jizhina janji jikekala pa bilungi byabo.

⁵ Ne bufuku kechi bukekalako ne, kabiji kechi bakasaka kyeya kya lampi nangwa kya juba ne, mambo Nkambo Lesa ukebapa kyeya. Kabiji bakekala mu bufumu myaka ne myaka.

Kwiya kwa Kilishitu

⁶ Kabiji aye malaika wang'ambijile amba, “Bino byambo byo bya kishinka ne bya kine. Ne aye Nkambo, Lesa upana Mupashi wanji ku bangauzhi, watuma malaika wanji mu kwibabuula bakalume banji bintu bisaka kumweka palutwe kacheche.”

⁷ “Kabiji umvwa! Abo ngiya bukiji! Watokwa awa ulama byambo bya mu ye uno buku wa bungauzhi!”

⁸ Ne amiwa Yoano yami nebyumvwine ne kwibimona bino bintu. Kabiji byo naumvwine ne kumona, naponene panshi ku maulu a malaika wambujile bino bintu namba, namupopwele.

⁹ Bino aye wang'ambijile amba, “Kileke! Amiwa ne mukwenu wa mu mwingilo umo pamo ne bakwenu bangauzhi, ne boba balama byambo bya mu ye uno buku. Popwela Lesa!”

¹⁰ Kabiji wang'ambijile amba, kechi ushinke na kateetesho byambo bya bungauzhi bwa mu ye uno buku ne, mambo kimye kya kumpelo ke kiji pepi.

¹¹ Aye uba bibi muleke obengatu bibi byonkabyo ne pano, ne aye wabipisha ekale wabipisha byonkabyo ne pano, ne aye waoloka obengatu byaoloka byonkabyo ne pano, ne aye wazhila ekale wazhila byonkabyo ne pano.

¹² “Umvwa! Abo ngiya bukiji! Ne mfweto yami nji nayo, ya kupana ku bonse, monka mwayila mingilo yabo.

¹³ Amiwa ne Alefwa ne Omega, ne mutanshi ne wapelaako, ne ntendekelo ne mpelo.”

¹⁴ Batokwa bovwa bivwalo byabo, amba bekale na luusa lwa pa kuja ku kichi kya bumi, ne kutwela mu bibelo bya mu muzhi.

¹⁵ Pangye ya muzhi paji bakabwa, ne bang'anga ba lubuko, ne ba bulalelale, ne bambanzhi, ne bapopwela bankishi, ne bonse batemwa kwamba ne kuuba bya bubela.

¹⁶ “Amiwa Yesu, natuma malaika wami akemubuule bino bintu mu bipwilo. Amiwa ne muzhazhi wa Davida kabiji ne wa mu kisaka kyanji, kabiji ne ntaanda wa kumakya watokesha.”

¹⁷ Aye Mupashi ne aye musongwa amba, “Iyai!” Ne yense waumvwa naye, ambe amba, “Iyai!” Ne aye waumvwa kilaka, naye eye, ne aye wasaka naye atambule mema a bumi a bupetu.

Bya kupezhako

¹⁸ Amiwa Yoano nebabujisha bantu bonse bomvwa byambo bya bungauzhi bwa mu ye uno buku namba, umvwe muntu wabikapo ku bino byambo, aye Lesa naye ukamubikilapo myalo yanembwa mu ye uno buku.

¹⁹ Kabiji umvwe muntu waangatako ku byambo bya buku wa bungauzhi buno, Lesa naye ukamwangata kyanji kya ku kichi kya bumi, ne kya mu muzhi wazhila, byanembwa mu ye uno buku.

²⁰ Aye ushimuna bino bintu wa amba amba, “Ee Kine! Abo ngiya bukiji!” Amena. Iyai Nkambo Yesu!

²¹ Bupe bwa Nkambo Yesu bwikale na bantu bonse.