Lumwekesho 21 - KNTP

Jiulu jipya ne ntanda ipya

¹ Ponkapo namwene jiulu jipya ne ntanda ipya. Mambo jiulu jitanshi ne ntanda itanshi byapita, ne kalunga nako ke kafwako.

² Kabiji namwene muzhi wazhila, Yelusalema mupya, kasa ekila mwiulu kufuma kwi Lesa, wanengezhiwa jimo nobe musongwa wavwajila bulongo mwata wanji.

³ Ponkapo naumvwine jiwi jikatampe jafumine ku jitanda amba, “Tala, kya kwikalamo Lesa kiji mu bantu! Aye ukekala naabo, ne abo naabo bakekala ke bantu banji. Ne Lesa mwine ukekala naabo, ne kwikala ke Lesa wabo.

⁴ Kabiji aye ukashiimuna mipolo yonse ku meso abo. Ne lufu kechi lukekalako jibiji ne, nangwa mabingo, nangwa kujila, nangwa misongo kechi bikekalako jibiji ne. Bintu bitanshi byazhimang'ana.”

⁵ Ne aye waikala pa jitanda wa ambile amba, “Tala, na alula bintu byonse ke bipya!” Kabiji wa ambile amba, “Nemba bino, mambo byo byambo bya kishinka ne bya kine.”

⁶ Kabiji wang'ambijile amba, “Byamweka kala! Amiwa ne Alefwa ne Omega, ne ntendekelo ne mpelo. Aye waumvwa kilaka amiwa nkamupapo kutoma ku nsulo ya mema a bumi atupauka a bupetu.

⁷ Aye ushinda ukaswana bino bintu ne amiwa. Kabiji nkekala ke Lesa wanji, ne aye naye ukekala ke mwanami.

⁸ Pakuba ba moyo, ne bamilengulwila, ne boba bya bunya, ne bambanzhi, ne ba bulalelale, ne bang'anga ba lubuko, ne bapopwela bankishi, ne ba bubela bonse, paabo po pa kizhiba kiteema mujilo ne kibiliki, lo lufu lwa bubiji.”

Yelusalema mupya

⁹ Kabiji kwaishile umo wa mu boba bamalaika batanu na babiji bajinga na michiba itanu na ibiji, basendele yoya myalo itanu na ibiji yapeleleko, ne aye wang'ambijile amba, “Iya kuno, nkumweshe musongwa, muka Mwana Mukooko.”

¹⁰ Kabiji aye wansendele mu Mupashi ku mutumba mukatampe walepa. Aye wammwesheshe muzhi wazhila Yelusalema, kasa ekila mwiulu kufuma kwi Lesa,

¹¹ wajinga na lukumo lwa Lesa. Kubekauka kwanji kwaubile nobe jibwe jakila mu buneme, nobe jibwe ja yasipa, ja kilola nobe kilishitala.

¹² Kabiji wajinga na nsakwa ikatampe yaleepa yajinga na bibelo jikumi na bibiji, ne ku bibelo kwajinga bamalaika jikumi na babiji. Kabiji pa bibelo panembelwe mazhina a mikoka jikumi na ibiji ya bena Isalela.

¹³ Ku musela kwajinga bibelo bisatu ne ku kabeta ka ku buyeke nako bibelo bisatu, ku kabeta ka ku bulenge nako bibelo bisatu, ne ku muzhika nako bibelo bisatu.

¹⁴ Kabiji nsakwa ya muzhi yajinga na bitendekesho jikumi na bibiji, ne ponka pa bitendekesho pajinga mazhina jikumi ne abiji a batumwa jikumi ne babiji ba Mwana Mukooko.

¹⁵ Ne aye wang'ambijilenga wajinga na kipimo kya jitete ja ngolode kya kupimako muzhi, ne bibelo byanji, ne nsakwa yanji.

¹⁶ Ne muzhi wajinga wa makonka ana, mu bula ne mu bwipi monsetu pamo. Ponkapo malaika wapimine muzhi na jitete, ke makilomita 2,400, ne mu bula ne mu bwipi ne kimino monse monse pamotu.

¹⁷ Kabiji wapimine ne nsakwa yanji, ke makyubichi 144, monka mwayila kupima kwa muntu, ko kuuba amba, kupima kwa malaika.

¹⁸ Kabiji nsakwa yanji yashimikilwe na mabwe a yasipa, ne muzhi wajinga wa ngolode yawamisha nobe ya kilola.

¹⁹ Bitendekesho bya nsakwa ya muzhi byanengezhiwe bulongo na misango yonse ya mabwe a buneme. Kitendekesho kitanshi kyajinga kya yasipa, kya bubiji kya safila, kya busatu kya kalesedone, kya buna kya emalode,

²⁰ kya butanu kya sadonisi, kya butanu na bumo kya kanalea, kya butanu na bubiji kya kwanzi, kya butanu na busatu kya mbelilo, kya butanu na buna kya topaze, kya bujikumi kya kisopase, kya bujikumi na kimo kya yakinto, kya bujikumi na bibiji kya amatesete.

²¹ Kabiji abya bibelo jikumi na bibiji byajinga bamangalite jikumi na babiji, bibelo byonse byalengelwe na mangalite umo umo. Mukwakwa wa mu muzhi wajinga na ngolode yawamisha nobe kilola.

²² Kabiji kechi namwenemo nzubo yazhila mu yewa muzhi ne, mambo Nkambo Lesa wa bulume bonse ne aye Mwana Mukooko, yo nzubo yanji yazhila.

²³ Kabiji awa muzhi kechi usaka kyeya kya juba nangwa kya ng'ondo ne, mambo lukumo lwa Lesa lo lwamutokesha, ne aye Mwana Mukooko ye lampi wanji.

²⁴ Ne mikoka ya bantu ikendanga mu kyeya kyanji, ne bamfumu ba pano pantanda bakaleeta lukumo lwabo monka.

²⁵ Kabiji bibelo byanji kechi bakebishinkanga mute ne, mambo bufuku kechi bukekalamo ne.

²⁶ Kabiji lukumo ne buneme bwa mikoka ya bantu bakeileeta amba itwele monka.

²⁷ Bino kechi mukatwela nangwa pachechetu kintu kyatama, nangwa aye uba bya bunya ne kubepa bubela ne, poso bonka banembwa mu buku wa bumi wa Mwana Mukooko.