Lumwekesho 20 - KNTP

Myaka kiumbi kimo

¹ Kabiji namwene malaika kasa ekila kufuma mwiulu, wajinga na kii wa kalengwa kabula kupela ne munyololo mukatampe mu kuboko kwanji.

² Ponkapo wakwachile nsung'unyi, awa mulolo wa kala, ye Diabola ne Satana, ne kumukasa wamukashile myaka 1,000.

³ Ne kumutaya mu kalengwa kabula kupela, washinkilepo ne kubikapo kateetesho peulu ya kalengwa, amba kechi ajimbaike mikoka ya bantu jibiji ne, poso aya myaka 1,000 ikapwe. Pakupita ino myaka kyafwainwa akakasululwe kakimye kacheche.

⁴ Kabiji namwene matanda, ne baikajilepo bo bapele luusa lwa kuchiba mambo. Kabiji namwene myeo ya boba batapilwe na mambo a bukamonyi bwa Yesu, ne na mambo a mambo a Lesa. Ne abo babujile kupopwela awa lukinyama, nangwa kipashang'ano kyanji, ne kutambula kayukilo pa kilungi nangwa pa kuboko ne. Baikajile na bumi jibiji ne kwikala na bufumu pamo ne Kilishitu myaka 1,000.

⁵ Bafu bakwabo bashajilepo, kechi baikajile na bumi jibiji ne poso aya myaka 1,000 byo yapwile. Luno lo lusanguko lutanshi.

⁶ Watokwa ne kuzhila awa ukekala mu alwa lusanguko lutanshi. Lufu lwa bubiji kechi luji na luusa pabano ne, pakuba bakekala bang'anga ba kwa Lesa ne Kilishitu, ne kwikala nanji ke bamfumu myaka 1,000.

Kushindwa kwa Satana

⁷ Kabiji pakupwa aya myaka 1,000, Satana ukakasululwa mu kaleya kanji,

⁸ kabiji ukalupuka mu kwiijimbaika mikoka ya bantu ba ku makonka ana a pantanda, ko kuuba amba, Gogi ne Magogi. Mu kwibapwizha pamo ku nkondo, nambala yabo iji pamo nobe musenga wa ku kalunga.

⁹ Ne kuya monse monse mwapela ntanda, ne kuzhokoloka nkambi ya bazhijikwa ne muzhi ye atemwa Lesa. Bino mujilo wafumine mwiulu ne kwibonauna bonse.

¹⁰ Ne aye Diabola, yenkawa wibajimbaikile, waelelwe mu kizhiba kya mujilo ne kibiliki, monka muji aye lukinyama ne aye ngauzhi wa bubela ne abo bakamanyikwanga mute ne bufuku myaka ne myaka.

Kije kyapelaako

¹¹ Kabiji namwene jitanda jikatampe jitoka, ne aye waikajileepo. Jiulu ne ntanda byanyemene kilungi kyanji kabiji kechi byamwene pa kwikala ne.

¹² Kabiji namwene bafu, bakatampe ne bacheche, kasa baimana ku meso a jitanda. Ne mabuku beazhikwile, ne buku mukwabo naye bamuzhikwile, ye buku wa bumi. Kabiji bafu bebachibijile mambo ku byonkabya bintu byanembwa mu oa mabuku, monka mwayila byo baubile.

¹³ Kabiji kalunga kasolwele bafu bajimo. Ne lufu ne kalunga ka bafu byasolwele bafu bajimo. Kabiji bonse bebachibijile mambo monka mwayila byo baubile.

¹⁴ Ne lufu ne kalunga ka bafu byaelelwe mu kizhiba kya mujilo. (Luno lo lufu lwa bubiji, kyo kizhiba kya mujilo.)

¹⁵ Kabiji bonse babujilwe kunembwa mu buku wa bumi, baelelwe mu kizhiba kya mujilo.