Lumwekesho 2 - KNTP

Nkalata ku kipwilo kya ku Efisesa

¹ “Kwi aye malaika wa mu kipwilo kya mu Efisesa unembe amba; “Aye wakwata tubangabanga tutanu na tubiji mu kuboko kwanji kwa kilujo, ye upitang'ana mukachi ka bitulwapo malampi bya ngolode bitanu na bibiji, wa amba bino amba,

² nayuka mingilo yobe, ne mwingilo wobe wakosa ne butekanye bobe, ne byo wabula kwibaswa babi, kabiji byo wibesekele abo beteela amba, twi batumwa, bino kechi bo batumwa ne, kabiji wibamwene amba ba bubela.

³ Kabiji nayuka namba, obewa wachinchika ne kukoselamo mu jizhina jami, bino kechi wakooka ne.

⁴ Bino nji na kino kyo natala bibi mwi obewa, namba waleka butemwe bowajinga naabo patanshi.

⁵ Byonkabyo vuluka byo waponene! Ulapile ne kuuba mingilo yo waubilenga patanshi. Inge ne, nkeya ko uji ne kukwangata kyobe kitulwapo lampi pantu pakyo, umvwe ne kulapila ne.

⁶ Pakuba kino uji naakyo, kyo washikwa mingilo ya ba Nikolaita, yo nashikwa ne amiwa;

⁷ “Aye uji na matwi, omvwe byamba Mupashi ku bipwilo! “Kwi aye ushinda nkamuswisha kuja ku kichi kya bumi, kiji mu Paladisa wa Lesa.”

Nkalata ku kipwilo kya ku Simulina

⁸ “Kabiji kwi aye malaika wa mu kipwilo kya mu Simulina unembe amba; “Aye mutanshi ne wapelaako, yenkaye wafwile ne kwikala na bumi jibiji, wa amba bino amba,

⁹ nayuka bya malwa byobe, ne buyanji bobe, bino wi munonshi! Nayuka ne mwenga wa abo beteela amba, bo Bayudea bino kechi bo Bayudea ne, bo ba mu shinagoga ya Satana!

¹⁰ Kechi wakamwe byo waya umaname ne. Umvwai! Aye Diabola waya emutaye anweba bamo mu kaleya amba mwesekwe, kabiji mukamona bya malwa moba jikumi. Wikale wakishinka kufika ne ku lufu, ne amiwa nkakupa munchinya wa bumi.”

¹¹ “Aye uji na matwi, omvwe byamba Mupashi ku bipwilo! Awa ushinda kechi ukamona lufu lwa bubiji ne.”

Nkalata ku kipwilo kya ku Pelegamuma

¹² Kabiji kwi aye malaika wa mu kipwilo kya Pelegamuma unembe amba; “Aye uji na mpoko yatwa kubiji wa amba bino amba,

¹³ nayuka ko waikala, konka kuji jitanda ja Satana. Kabiji wakwachisha jizhina jami, ne kukana lwitabilo lwa mwi amiwa ne, nangwa mu moba a Antipasa kamonyi wami, muntu wami wakishinka, ye baipayile mwi anweba, monka mwaikala Satana.

¹⁴ Bino nji na bimo bicheche byonatala bibi mwi obewa, mambo uji na bamo baalama lufunjisho lwa Balamu, ye wafunjishe Balaka kwibata bena Isalela kya kwituntulako kya kuja byo batapisha ku bankishi, ne kyakuuba bulalelale.

¹⁵ Kabiji uji na bamo nabo baalama lufunjisho lwa ba Nikolaita.

¹⁶ Onkao mambo pano lapila! Inge ne, nkeya bukiji ko uji, kabiji nkalwa naabo na mpoko ya mu kanwa kami.”

¹⁷ “Aye uji na matwi, omvwe byamba Mupashi ku bipwilo. Kwi aye ushinda, nkamupapo manna afyamika. Kabiji nkamupa jibwe jitoka, panembwa jizhina jipya, jo babula kuyuka bonse kana yenkaye wijitambula.”

Nkalata ku kipwilo kya ku Tiyatila

¹⁸ “Kabiji kwi aye malaika wa mu kipwilo kya mu Tiyatila unembe amba; “Aye Mwana Lesa, ye uji na meso auba nobe lubeebe lwa mujilo, ne maulu anji auba nobe lubemba ye batubula, wa amba bino amba,

¹⁹ nayuka mingilo yobe, ne butemwe bobe, ne lwitabilo lobe, ne mwingilo wobe wa bukwasho, ne butekanye bobe, ne mingilo yobe yapelaako byo yavula kukila itanshi.

²⁰ Pakuba nji na kino kyo natala bibi mwi obewa, byo wamulekatu awa mwanamukazhi Yezebeli, yenkawa witeela amba, ye ngauzhi. Kabiji aye wibafunjisha ne kwibongola bakalume bami kuuba bulalelale, ne kuja byo batapisha ku bankishi.

²¹ Kabiji namupele kimye namba, alapile, bino aye wakana kulapila ku bulalelale bwanji.

²² Umvwai! Nkamutaya pa mwanya wa misongo, ne aba boba nanji bukende nkebataya mu bya malwa bikatampe umvwe abo ne kulapila ku mingilo yanji ne.

²³ Kabiji baana banji nkebepaya, ne bipwilo byonse bikayuka byo nji ukebakeba byonse byafyamika mu milanguluko ne mu michima. Kabiji nkemupa bonse monka mwayila mingilo yenu.

²⁴ Pakuba kwi anweba bonse mu Tiyatila, babula kwibiyuka byo batela bamo amba, byazhika bya kwa Satana. Kwi anweba naamba namba, kechi nkemutwikapo kisendwa kikwabo ne.

²⁵ Byonkabyo, akya kyo muji naakyo, kikwachishai poso nkeye.

²⁶ Ne aye ushinda, ne awa wiyuba mingilo yami kufika ne kumpelo, amiwa nkamupa luusa lwa pa mikoka ya bantu.

²⁷ Kabiji ukeilama na ndondo ya kapotwe, ukebalalaula byonka byo balalaula bijiilo bya buchimba.

²⁸ Monka mo natambwijile ne amiwa kwi Bataata ne amiwa nkamupa ntaanda wa kumakya.

²⁹ Aye uji na matwi, omvwe byamba Mupashi ku bipwilo.”