Lumwekesho 19 - KNTP

¹ Pakupita bibye naumvwine nobe jiwi jikatampe ja jibumba jikatampe mwiulu, amba, “Aleluya! Lupulukilo, ne lukumo, ne bulume byo bya kwa Lesa wetu!

² Mambo bunchiba mambo bwanji bo bwakine ne bwaoloka! Mambo awa pite mukatampe wamuzhachisha, yenkaye wabipishenga ntanda na bulalelale bwanji. Aye Lesa washinkanya nanji na mambo a mashi a bakalume banji o aichijile na maboko anji.”

³ Kabiji babijikile jibiji amba, “Aleluya! Ne bwishi bwanji bufutumuka myaka ne myaka!”

⁴ Ponkapo abo bakulumpe makumi abiji na bana ne aba bomi bana balambile panshi ne kupopwela Lesa waikala pa jitanda amba, “Amena! Aleluya!”

Kijiilo kya masongola a Mwana Mukooko

⁵ Ponkapo jiwi jafumine ku jitanda amba, “Totai Lesa wetu, anweba bakalume banji bonse, anweba bamwakamwa, bacheche ne bakatampe!”

⁶ Kabiji naumvwine jiwi nobe ja jibumba jikatampe, kabiji nobe jiwi ja mema avula, kabiji nobe jiwi ja kutatauka kukatampe kwa mvula amba, “Aleluya! Mambo Nkambo Lesa wetu, wa bulume bonse waikala ke Mfumu!

⁷ Tusekele ne kusangalala kukatampe, tumutumbijike aye! Mambo kusongola kwa Mwana Mukooko kwafika ne mukazhanji winengezha kala.

⁸ Kabiji kyamupelwe amba avwale kisapi kya linenyi kyalamba, kyatokesha ne kuwama.” (Mambo kisapi kya linenyi kyalamba, byo byubilo byaoloka bya bazhijikwa.)

⁹ Kabiji aye malaika wang'ambijile amba, “Nemba amba, batokwa aba baitwa ku kijiilo kya masongola a Mwana Mukooko.” Kabiji wang'ambijile amba, “Bino byo byambo bya kine bya Lesa.”

¹⁰ Ponkapo naponene panshi ku maulu anji, namba namupopwele, bino aye wang'ambijile amba, “Kileke! Amiwa ne mukwenu wa mu mwingilo umo pamo na bakwenu balama bukamonyi bwa Yesu. Popwela Lesa!” Mambo bungauzhi bwa Lesa bwaimena pa kusolola bukamonyi bwa Yesu.

Mbili utoka

¹¹ Ponkapo namwene jiulu jashinkuka, kabiji namwene mbili utoka. Aye waikajilepo jizhina janji amba Wakishinka ne Wakine, kabiji aye uchibila mambo monka mu bololoke, mo mo alwila ne nkondo.

¹² Kabiji meso anji auba nobe lubebe lwa mujilo, ne pa mutwe wanji pajinga tubondo twavula. Kabiji wajinga na jizhina janembwa jo abula kuyuka muntu nangwa umo ne, poso aye mwine yenka.

¹³ Kabiji wavwajile kivwalo kyo batuumpa mu mashi. Ne jizhina janji, “Mambo a Lesa.”

¹⁴ Ne mazhita a mwiulu amulondejilenga pa bambili batoka, kasa bavwala kisapi kya linenyi kyalamba, kyatokesha ne kuwama.

¹⁵ Kabiji monka mu kanwa kanji mwalupukile mpoko yatwa, amba epayeko mikoka ya bantu. Kabiji ukebalama na kamama ka kapotwe, kabiji ye ukanyantaula mu kya kufiinamo binyu bya bukaji bwakatazha bwa Lesa wa bulume bonse.

¹⁶ Kabiji pa kivwalo kyanji ne pa jimbwata janji panembelwe jizhina amba, “Mfumu wa ba mfumu ne Nkambo wa ba nkambo!”

¹⁷ Ponkapo namwene malaika kasa aimana pa juba. Ne kubijika wabijikile na jiwi jikatampe, ne kwibambila bang'onyi bonse bapita mwiulu amba, “Iyai, mupwile ku kijiilo kikatampe kya Lesa!

¹⁸ Iyai muje nyama ya bamfumu, ne nyama ya bakulumpe ba bashilikale, ne nyama ya bilobo, ne nyama ya bambili ne ya benda pa bambili, ne nyama ya bantu bonse, baana ba bene ne bazha, bacheche ne bakatampe!”

¹⁹ Kabiji namwene ne awa lukinyama, ne bamfumu ba pano pantanda, ne mazhita abo, kasa bapwila pamo amba, tulwe nkondo na yewa waikala pa mbili ne nzhita yanji.

²⁰ Ne aye lukinyama wakwachilwe, ne aye ngauzhi wa bubela naye pamo, yenkawa waubilenga biyukilo ku meso anji. Byo ajimbaikilengako aba batambwile kayukilo kayewa lukinyama ne aba bapopwejilenga kipashang'ano kyanji. Abo bonse babiji baelelwe bomi mu kizhiba kya mujilo uteema na kibiliki.

²¹ Kabiji bakwabo baipayilwe ku mpoko ya yewa waikajile pa mbili, yonkaya yalupukile mu kanwa kanji, ne ba ng'onyi bonse baikuchile na nyama yabo.