Lumwekesho 18 - KNTP

Kupona kwa Babilona

¹ Pakupita bibye namwene malaika mukwabo kasa ekila mwiulu. Wajinga na luusa lukatampe, ne lukumo lwanji lwapaine kyeya pantanda ponse.

² Kabiji wabijikile na jiwi jikatampe amba, “Wapona! Babilona mukatampe wapona! Pano wa aluka ke mwa kwikala bademona, ke mwa kulamina bapashi bonse babipa, ne mwa kulamina bang'onyi bonse babipa ne banyama babipa ba muzhilo.

³ Mambo mikoka yonse ya bantu yatoma binyu bya lusako lwa bulalelale bwanji. Ne bamfumu ba pano pantanda baubile nanji bulalelale, ne basulu ba pano pantanda mo bamwenejile bunonshi monka mu lunkumbwa lwanji lukatampe.”

⁴ Ponkapo naumvwine jiwi jikwabo jafumine mwiulu amba, “Anweba bantu bami, lupukaimo mwi aye! Kechi mumvwang'ane nanji mu bya bundengamambo bwanji ne, kuchiina amba mwakeya kukwatankana nanji pamo mu bya bubi bwanji, ne kumanyikwa naji pamo na myalo yanji!

⁵ Mambo bubi bwanji bwafika ne mwiulu, ne aye Lesa wavuluka bibi byanji.

⁶ Mubilai monka moebobijile bakwabo, mubwezhezhai pabiji monka mwayila mingilo yanji. Mu katomeno moavwangijile, muvwangilaimo pabiji, byonka byoebobile bakwabo.

⁷ Monka mo etumbijikiile mwine ne kuuba bya kusakasaka kwanji bya bono mo mukamupela lumanamo ne mabingo. Mambo wa amba mu muchima wanji amba, ‘Amiwa ne mfumu! Kechi ne wafwilwa ne, kabiji kechi nkamona bya kujila mabingo nangwa pacheche ne!’

⁸ Onkao mambo, myalo yanji ikamufikila mu juba jimotu, ne lufu, ne kujila mabingo, ne kipowe kya nzala. Kabiji ukapya na mujilo, mambo aye Nkambo Lesa wamuzhachisha, ye kilobo.”

⁹ Ne bamfumu ba pano pantanda, baubile nanji bulalelale ne kwikala nanji mu bya lunkumbwa bwa kusakasaka kwanji, bakamujila na mabingo, byo bakatala bwishi bwa kupya kwanji.

¹⁰ Bakemana kwaleepa na mambo a kuchiina kumanama kwanji. Ne kwamba amba, “Mamoo! Mamoo! Awe muzhi mukatampe Babilona, muzhi wakosa! Mu awala umo kuzhatwa kobe kwafika!”

¹¹ Kabiji ne basulu ba pano pantanda nabo bamujila na mabingo, mambo kafwako muntu ukipota bintu byabo ne,

¹² bipe bya ngolode, ne bya siliva, ne mabwe a buneme, ne bamangalite, ne kisapi kya linenyi kyawamisha, ne kyachiluluka, ne kya shilika, ne kyachijisha, ne mapulanga a mutengo mukatampe, ne bijilo byonse byalengwa na meno a ba nzovu, ne bijilo byonse byo basonga ku bichi byawamisha, ne bya lubemba, ne bya kapotwe, ne bya mabwe a myalamyala,

¹³ ne kinamonyi, ne binunka bulongo, ne byakufutumuna, ne manyi a kushinga, ne libona, ne binyu, ne manyi a olivi, ne bukula bwalamba, ne wichi, ne bang'ombe, ne mikooko, ne bambili, ne makalaki, ne bazha, kokuuba amba ne myeo ya bantu.

¹⁴ “Ne bipangwa, byo wasakile mu muchima obe bya kunyema ne byonse byanekena ne kuwama byaonaika ko uji, ne bantu kechi bakebimona jibiji ne.”

¹⁵ Basulu ba bino bintu, bamwenejile bunonshi kwi aye, bakemana kwalepa na mambo a kuchiina kumanama kwanji, kasa bajila ne kuuba mabingo,

¹⁶ amba “Mamoo! Mamoo! Muzhi mukatampe, wavwajile kisapi kya linenyi kyawamisha ne kyachiluluka ne kyachijisha, ne kwikobaika bya ngolode ne mabwe a buneme ne bamangalite!

¹⁷ Mambo mu awala umo abwe bunonshi bwaonaika!” Ne bonse bakulumpe ba maato, ne bonse benda mu maato, ne bonse mobavujila bamwena mali abo mu mwingilo wa pa mema, baimene kwalepa,

¹⁸ ne kujila byo bamwene bwishi bwa kupya kwanji, amba, “Ng'anyi muzhi mukatampe wapashang'ana na uno?”

¹⁹ Ponkapo bepukwile lukungu mu mitwe yabo, kasa bajila ne kuuba mabingo, amba, “Mamoo! Mamoo! Muzhi mukatampe! Mo bamwenejile bunonshi bonse baji na maato pa kalunga, na mambo a busulu bwanji bukatampe! Waonaikatu mu awala umo!”

²⁰ Sekela na mambo anji obewa jiulu, ne anweba bazhijikwa, ne anweba batumwa, ne anweba bangauzhi! Mambo Lesa wimuzhachishishaye!

²¹ Kabiji malaika wakosa washikwile jibwe nobe jibwe jikatampe ja kupelapo ne kwijitaya mu kalunga, ne kwamba amba, “Byonka bino byo bikatayiwa panshi Babilona, awa muzhi mukatampe, na kinya kikatampe, kabiji kechi ukamweka jibiji ne.

²² Kabiji ne mawi a ba byansa ne a bang'omba ne a bemba binkungubele ne a bemba matolompita kechi akomvwanyika jibiji nangwa pacheche mwi obewa ne! Kabiji ne basendwe nangwa ba byepi kechi bakamweka jibiji mwi obewa nangwa umotu ne, kabiji ne jiwi ja jibwe ja kupelapo bunga najo, kechi jikomvwanyika jibiji nangwa pacheche mwi obewa ne!

²³ Ne kyeya kya lampi nakyo, kechi kikateema jibiji nangwa pacheche mwi obewa ne, ne jiwi ja musongoshi nangwa ja musongwa najo, kechi jikomvwanyika jibiji nangwa pacheche mwi obewa ne. Mambo basulu bobe bajinga bene bakatampe ba pano pantanda mambo mikoka yonse ya bantu yajimbaikilwe na bung'anga bobe bwa lubuko!”

²⁴ Kabiji mwi aye mwatainwe mashi a bangauzhi, ne a bazhijikwa, ne a bonse baipayilwe pantanda.