Lumwekesho 17 - KNTP

Pite waya nkuwa

¹ Kabiji kwaishile umo wa mu boba bamalaika batanu na babiji bajinga na michiba itanu na ibiji, wang'ambijile amba, “Iya kuno, nkubuule luzhachisho lwa yewa pite waya nkuwa, waikala pa mema avula.

² Ye wauba bulalelale na bamfumu ba pano pantanda, ne abo bekala pano pantanda bapendwa binyu bya bulalelale bwanji.”

³ Ponkapo aye malaika wantwajile mu Mupashi mungye. Kabiji namwene mwanamukazhi kasa aikala pa lukinyama wachijisha, wajinga na mazhina a mwenga, wajinga na mitwe itanu na ibiji ne nsengo jikumi.

⁴ Ne aye mwanamukazhi wavwajile byachiluluka ne byachijisha, ne kwikobaika bya ngolode ne mabwe a buneme ne bamangalite. Kabiji wajinga na katomeno ka ngolode mu kuboko kwanji kayuula na bya bunya ne byabipisha bya bulalelale bwanji.

⁵ Ne pa kilungi kyanji panembelwe jizhina ja bufyamfya, ja lumbulula amba, “Babilona mukatampe, inanja ba pite ne bya bunya pano pantanda.”

⁶ Kabiji namwene awa mwanamukazhi kasa apendwa na mashi a bazhijikwa, ne mashi a batumonyi ba Yesu. Kabiji pa kumumona nakuminye na kukumya kukatampe.

⁷ Ne aye malaika wang'ambijile amba, “Wakumya ka? Amiwa nsakukubula kyafyamika kya aye mwanamukazhi, ne kya lukinyama wamusenda aye uji na mitwe itanu na ibiji ne nsengo jikumi.

⁸ Awa lukinyama ye wajikumona, wajipo pakuba pano ufwapo, bino pano kasake kufuma mu kalengwa kabula kupela, ne kuya mulonaiko. Ne abo bekala pano pantanda bakakumya, bonse babulwa kunembwa mazhina mu buku wa bumi kufuma ne ku ntendekelo ya pano pantanda, byo bakatala awa lukinyama, byo ajingapo, kabiji pano ufwapo, kabiji ukamweka.”

⁹ “Pa kino pakebewa maana ne kumvwisha. Aya mitwe itanu na ibiji, yo mitumba itanu na ibiji, yo aikalapo awa mwanamukazhi. Bo bamfumu batanu na babiji.

¹⁰ Kabiji bo bamfumu batanu na babiji, batanu bapona, umo ko akiji, mukwabo washalaapo, ukyangye kwiya, kabiji byo akeya, ukekalatu kakimye kacheche.

¹¹ Ne aye lukinyama wajingapo kabiji pano kafwapo, aye ye mwine wa butanu na busatu, kabiji ye wa mu boba batanu na babiji kabiji ubena kuya mulonaiko.”

¹² “Ne yoya nsengo jikumi yo wajikumona bo bamfumu jikumi, bakyangye kutambula bufumu, pakuba abo bakatambula luusa lwa bufumu pamo ne aye lukinyama mu awala umo.

¹³ Bano baji na muchima umo, kabiji bapana bulume bwabo ne luusa lwabo kwi aye lukinyama.

¹⁴ Bano bakalwa ne aye Mwana Mukooko, ne aye Mwana Mukooko ukebashinda, mambo aye ye Nkambo wa bankambo, ne Mfumu wa bamfumu. Ne abo boaji naabo pamo bo bantu baitwa, basalululwa, bakishinka.”

¹⁵ Kabiji aye wang'ambijile amba, “Aa mema o wajikumona, po aikala awa pite, yo mitundu ne mabumba, ne mikoka, ne njimi ya bantu.

¹⁶ Ne aya nsengo jikumi yo wajikumona na lukinyama, bo bakamushikwa pite ne kumonauna ne kumuvuula, kabiji bakaja nyama yanji, ne kumusokatu pelu mu mujilo.

¹⁷ Mambo Lesa ye wabiika mu michima yabo kuuba kyaswa muchima wanji, ne kwikala na muchima umo, ne kupana bufumu bwabo kwi aye lukinyama, poso byambo bya Lesa bikafikizhiwe.

¹⁸ Kabiji awa mwanamukazhi ye wajikumona ye awa muzhi mukatampe, wikala mu bufumu pa bamfumu ba pano pantanda.”