Lumwekesho 16 - KNTP

Michiba ya bukaji bwa Lesa

¹ Kabiji naumvwine jiwi jikatampe jafuma mu nzubo yazhila, kasa jibambila aba bamalaika batanu na babiji amba, “Yainga, muketulwile aya michiba itanu na ibiji ya bukaji bwa Lesa pa ntanda!”

² Ponkapo mutanshi wayile, nakwitulwila muchiba wanji pa ntanda. Ponkapo bilonda byakatazha ne bya misongo bibafikijile bantu baji na kayukilo kayewa lukinyama, ne bapopwela kipashang'ano kyanji.

³ Kabiji wa bubiji waitulwijile muchiba wanji pa kalunga. Ne kalunga kaalukile nobe mashi a muntu wafwa, ne byonse byumi byajinga mu kalunga byafwile.

⁴ Kabiji wa busatu waitulwijile muchiba wanji pa mikola ne pa masulo a mema atupauka, ne mema aalukile ke mashi.

⁵ Kabiji naumvwine malaika wajinga na luusa lwa pa mema kasa aamba amba, “Mwi waoloka anweba, mujipo kabiji mwajingapo, yenu wazhila, bumutonyi bwenu bo bwaoloka!

⁶ Mambo abo baichijile mashi a bazhijikwa benu ne bangauzhi benu, ne anweba pano mwibapa mashi amba batome. Kyo kibafwainwa!”

⁷ Naumvwine kyakusokelapo byakufutumuna kasa kyamba amba, “Kine, Nkambo Lesa, wa bulume bonse! Bunchiba mambo bwenu bo bwakine kabiji bwaoloka!”

⁸ Ne wa buna waitulwijile muchiba wanji pa juba. Ne juba bejiswishishe kwibasoka bantu butuchila na kyuya.

⁹ Ponkapo bantu basokelwe butuchila na kyuya kikatampe, ke bejineene bya mwenga jizhina ja Lesa, yenka uji na luusa lwa pa ino myalo. Kabiji kechi balapijile amba, bamutumbijike ne.

¹⁰ Ne aye wa butanu waitulwijile muchiba wanji pa jitanda ja yewa lukinyama. Ponkapo mwaubile mfishi mu bufumu bwanji, ne bantu ke besume pa njimi yabo na mambo a misongo,

¹¹ ne kumunena Lesa wa mwiulu bya mwenga na mambo a misongo yabo ne bilonda byabo. Bino kechi balapijile ku mingilo yabo ne.

¹² Kabiji malaika wa butanu na umo naye waitulwijile muchiba wanji pa mukola mukatampe Ufelata. Ponkapo ne mema anji aumine, amba jishinda ja bamfumu bakafuma ku musela jinengezhiwe jimo.

¹³ Ponkapo namwene mu kanwa ka nsung'unyi, ne mu kanwa ka awa lukinyama, ne mu kanwa ka awa ngauzhi wa bubela, ke mulupuke mipashi yabiipa isatu nobe ma bombwe.

¹⁴ Mambo yo mipashi ya bademona, yuba biyukilo. Yo iya ku bamfumu ba pano pantanda ponse, mu kwibapwizha pamo ku nkondo ya aja juba jikatampe ja Lesa, wa bulume bonse.

¹⁵ “Umvwai! Amiwa mbena kwiya nobe ngivi! Watokwa awa ulaba ne kukenkenta ne kulama bivwalo byanji, kuchiina amba wakendanga bwamba, ne bantu bakamona bumvu bwanji!”

¹⁶ Ponkapo bebapwizhizhe pamo konka ko batela mu Kihebelu amba, Amagedonyi.

¹⁷ Kabiji aye malaika wa butanu na bubiji waitulwijile muchiba wanji pa mwela. Ponkapo mu nzubo yazhila mwalupukile jiwi jikatampe, jafumine ku jitanda, amba “Kyaubiwa!”

¹⁸ Ponkapo kwajinga kubeesha, ne mawi, ne bilulumo, ne kitentanshi kikatampe. Kyakuuba, monka mwaikela bantu pano pantanda, kechi kyamwekelepo kitentanshi kikatampe kya bulume bwine kya byonkabyo ne.

¹⁹ Ponkapo ne awa muzhi mukatampe waabenepo jisatu, ne mizhi ya mikoka ya bantu yakundukile. Ne Babilona mukatampe naye bamuvulukile ku meso a Lesa, amba tumupe katomeno ka binyu bya bukaji bwa Lesa bwakatazha.

²⁰ Ne makuji onse azhimang'ene, ne mitumba nayo kumwekana ne.

²¹ Ne mvula wa mabwe akatampe afumine mwiulu ebaponejile bantu. Ao mabwe kunema kwao, jimo kampe pamo na lutalenta. Ne bantu ke bamunene Lesa bya mwenga na mambo a yeo mwalo wa mvula wa mabwe, mambo ao mwalo wajinga mukatampe mwine.