Lumwekesho 15 - KNTP

Myalo itanu na ibiji yapelaako

¹ Kabiji namwene kiyukilo kikwabo mwiulu, kikatampe ne kya kukumya. Bamalaika batanu na babiji kasa baji na myalo itanu na ibiji ikapelaako, mambo mu yoya myalo mo mwapwila bukaji bwa Lesa.

² Ponkapo namwene nobe kalunga ka kilola byavwangakana na mujilo. Kabiji namwene ne aba bashinjile awa lukinyama, ne kipashang'ano kyanji, ne nambala ya jizhina janji, kasa baimana ku kalunga ka kilola, kasa baji na byansa bya Lesa.

³ Kabiji ke bembe lwimbo wa Mosesa kalume wa Lesa, ne lwimbo wa Mwana Mukooko amba, “Anweba Nkambo Lesa, wa bulume bonse, mingilo yenu yo ikatampe ne ya kukumya! Anweba Mfumu wa mikoka yonse, mashinda enu aoloka kabiji a kine.

⁴ Nkambo, ng'anyi ukabula kwakamwa ne kutumbijika jizhina jenu? Mambo anweba yenu yenka Wazhila! Mambo mikoka yonse ya bantu ikeya na kupopwela ku meso enu, mambo byubilo byenu byaoloka byamweka.”

⁵ Pakupita bibye namwene nzubo yazhila ya tente wa lushimuno yashinkwilwe mwiulu.

⁶ Ponkapo mu nzubo yazhila mwalupukile bamalaika batanu na babiji bajinga na myalo itanu na ibiji, kasa bavwala kisapi kya linenyi, kyawama kyabula biko, kasa banyinga ne mikwato ya ngolode pa byaji byabo.

⁷ Ne umo wa boba bomi bana wibapele aba bamalaika batanu na babiji michiba ya ngolode itanu na ibiji yayula na bukaji bwa Lesa, yenka waikala myaka ne myaka.

⁸ Ne nzubo yazhila yayujile bwishi bwa lukumo lwa Lesa, ne bwa bulume bwanji, kabiji kafwako nangwa umo wakonsheshe kutwela mu nzubo yazhila ne, poso aya myalo itanu na ibiji ya bamalaika batanu na babiji ikapwe.