Lumwekesho 14 - KNTP

Mwana Mukooko ne bantu banji

¹ Kabiji namwene Mwana Mukooko kasa aimana pa mutumba wa Ziona, na bantu 144,000, bajinga na jizhina janji ne jizhina ja Shanji, anembwa pa bilungi byabo.

² Kabiji naumvwine jiwi jafumine mwiulu, nobe jiwi ja mema avula, kabiji nobe jiwi ja kutatauka kwa mvula. Kabiji ne jiwi jo naumvwine jaji nobe jiwi ja bang'omba babena kwimba pa byansa byabo.

³ Kabiji baimbilenga lwimbo mupya ku meso a jitanda, ne ku meso a aba bomi bana ne aba bakulumpe, kafwako muntu nangwa umo wakonsheshe kufunda awa lwimbo ne poso aba ba 144,000, bakujilwe pano pantanda.

⁴ Bano bo boba babuula kwibipisha na banabakazhi, mambo bo bakatanda babuula kusambakanapo na wa mukazhi. Bano bo boba balondela aye Mwana Mukooko konse ko aya. Bakujilwe mu bantu, amba bekale ke bya nsomo kwi Lesa ne kwi aye Mwana Mukooko.

⁵ Kabiji mutunwa twabo kechi mwajinga bubela ne, kechi bajipo na kibi mwi abo ne.

Bamalaika basatu

⁶ Kabiji namwene malaika mukwabo kasa apita pakachi ka jiulu, kasa aji na Mambo Awama a myaka ne myaka a kusapwila ku bekala pantanda, ne ku mikoka yonse ne ku bisaka byonse ne ku njimi yonse ne ku mitundu yonse ya bantu.

⁷ Ne aye wa ambile na jiwi jikatampe, amba, “Akamwai Lesa ne kumupa lukumo! Mambo kimye kya kije kyanji kyafika. Mupopwelai aye walengele mwiulu ne ntanda ne kalunga ne masulo a mema atupauka!”

⁸ Ne mukwabo malaika wa bubiji, walondejile ne kwamba amba, “Wapona! Babilona mukatampe! Yenkaye watomesha mikoka yonse ya bantu binyu bya bukaji bwa bulalelale bwanji!”

⁹ Ne malaika mukwabo wa busatu, wibalondejile ne kwamba na jiwi jikatampe amba, “Umvwe muntu upopwela awa lukinyama ne kipashang'ano kyanji, ne kutambula kayukilo pa kilungi kyanji nangwa pa kuboko,

¹⁰ aye naye ukatoma ku binyu bya bukaji bwa Lesa, byo baitulwila jimo byo babula kuvwangakanya na bikwabo mu katomeno ka bukaji bwanji! Ne aye ukamanyikwa na mujilo ne kibiliki ku meso a bamalaika bazhila, ne ku meso a Mwana Mukooko.

¹¹ Ne bwishi bwa kumanama kwabo bufutumuka myaka ne myaka, kabiji kechi bakokoloka mute nangwa bufuku ne, aba bapopwela lukinyama ne kipashang'ano kyanji, ne aba batambula kayukilo ka jizhina janji.

¹² Byonkabyo bazhijikwa bafwainwa kwikala bakosa, abo balama mikambizho ya Lesa, ne lwitabilo lwa Yesu.”

¹³ Kabiji naumvwine jiwi kufuma mwiulu amba, “Nemba amba, batokwa bafu bafwila mwi Nkambo kufuma ku jino juba ja lelo!” Ne aye Mupashi wa ambile amba, “Ee kine, bakakokoloke ku mingilo yabo yakosa, mambo byubilo byabo bibalondela.”

Kunowa kwa panopantanda

¹⁴ Kabiji namwene jikumbi jitoka, ne pa jikumbi namwene umo kasa aikala nobe mwana muntu, ne pa mutwe wanji pajinga munchinya wa ngolode, ne kikwakwa kyatwa mu kuboko kwanji.

¹⁵ Ne malaika mukwabo walupukile mu nzubo yazhila, kasa abijika na jiwi jikatampe kwiyewa waikala pa jikumbi amba, “Tuma kikwakwa kyobe unowe, mambo kimye kya kunowa kyafika, mambo bya kunowa bya pano pantanda byapya!”

¹⁶ Ne aye waikajile pa jikumbi watayile kikwakwa kyanji pano pantanda, ne pano pantanda panowenwe.

¹⁷ Kabiji malaika mukwabo walupukile mu nzubo yazhila iji mwiulu, ne aye naye wajinga na kikwakwa kyatwa.

¹⁸ Ne malaika mukwabo walupukile mu kyakusokelapo byakufutumuna, ye uji na luusa lwa pa mujilo. Ne aye wabijikile na jiwi jikatampe kwiyewa wajinga na kikwakwa kyatwa amba, “Tuma kikwakwa kyobe kyatwa, uchibe bizanze bya mung'anzang'anza wa pano pantanda, mambo mang'anzang'anza anji apiisha kala!”

¹⁹ Ponkapo aye malaika watayile kikwakwa kyanji pano pantanda, ne kuchiba bya mung'anzang'anza wa pano pantanda, ne kwibitaya mu kya kufiinamo binyu, kyonkakya kikatampe kya bukaji bwa Lesa.

²⁰ Ne kya kufiinamo binyu, kyanyantawijilwe pangye ya muzhi, kabiji mwalupukile mashi mu kya kufiinamo binyu, afikile nobe kimino kya ku ntambo ya bambili, ne mu bula misinso ya makilomita 300.