Lumwekesho 13 - KNTP

Babinyama babiji

¹ Ponkapo namwene lukinyama kasa atuntuka mu kalunga. Wajinga na nsengo jikumi ne mitwe itanu na ibiji, kabiji ne pa nsengo yanji pajinga minchinya jikumi, ne pa mitwe yanji pajinga jizhina ja mwenga.

² Awa lukinyama ye namwene wamwekelenga nobe kisumpa, ne maulu anji nobe maulu a mbeyala, ne kanwa kanji nobe kanwa ka bokwe. Ne aye nsung'unyi wamupele bulume bwanji, ne jitanda janji, ne luusa lukatampe.

³ Mutwe wanji umo wamwekele nobe bamukozhezhe ne kufwa, bino mutootole wanji wa lufu wapwile. Ne ba pantanda bonse bamukuminye bingi ne kumulondela ao lukinyama.

⁴ Kabiji bamupopwejile nsung'unyi mambo wapaine luusa lwanji kwi aye lukinyama. Bapopwejile ne aye lukinyama ne kwamba amba, “Ng'anyi waesakana nanji uno lukinyama? Kabiji ng'anyi wakonsha kulwa nanji?”

⁵ Ponkapo lukinyama bamupele kanwa ka kwamba bikatampe ne bya mwenga, kabiji bamupele ne luusa lwa kwikala bang'ondo makumi ana ne bang'ondo babiji.

⁶ Ne aye waasamine na kumunena Lesa bya mwenga kasa aneena bya mwenga jizhina janji, ne nzubo yanji yazhila, ne bekala mwiulu.

⁷ Kabiji aye bamupele kya kulwa na bazhijikwa ne kwibashinda, kabiji bamupele ne luusa lwa pa bisaka byonse, ne mitundu yonse, ne njimi yonse, ne mikoka yonse ya bantu.

⁸ Ne bonse bekala pano pantanda bakamupopwela, bonse babulwa kunembwa mazhina abo, kufuma ku ntendekelo ya pano pantanda, mu buku wa bumi wa aye Mwana Mukooko, yenkaye waipayilwe.

⁹ Umvwe muntu uji na matwi, omvwe!

¹⁰ Inge umo ye wa kuya mu buzha, mu buzha i mo moakaya, umvwe muntu ye wa kwipayiwa na mpoko, ku mpoko koko akepayiwa. Onkao mambo bazhijikwa bafwainwa kukosa mu lwitabilo ne kutekanya mu bya mwalwa.

¹¹ Kabiji namwene ne lukinyama mukwabo kasa afuma panshi. Wajinga na nsengo ibiji nobe mwana mukooko, bino wa ambilenga nobe nsung'unyi.

¹² Ne aye uba bintu na luusa lonse lwa awa lukinyama mutanshi konka ku meso anji. Kabiji aye ulengela ntanda ne bekalamo ke bamupopwele awa lukinyama mutanshi, yenkawa wajinga na mutotole wapwile.

¹³ Kabiji aye uba biyukilo bikatampe, ne kya kulenga mujilo kufuma mwiulu ne kuponena panshi ku meso a bantu.

¹⁴ Ne aye wibajimbaikile bekala pantanda na biyukilo byo bamupele amba obe ku meso a yewa lukinyama mutanshi. Ne kwibambila bekala pano pantanda amba, mulengelai kinkishi kyapashang'ana nanji awa lukinyama wajinga na mutotole wa mpoko, kabiji waikala na bumi.

¹⁵ Kabiji bamuswishishe awa lukinyama kwikipa muuya, akya kipashang'ano kya lukinyama, amba, kipashang'ano kya lukinyama kyambenga, kabiji amba, bonse mobavujila babula kupopwela akya kipashang'ano kya lukinyama bepaiwe.

¹⁶ Ne aye wibalengejile bonse, bacheche ne bakatampe, ne banonshi ne balanda, ne baana ba bene ne bazha, amba batambule kayukilo pa maboko abo a kilujo, nangwa pa bilungi byabo.

¹⁷ Amba kafwako muntu nangwa umo wakonsha kupota nangwa kupotesha ne, poso bonka baji na kayukilo, jo jizhina ja yewa lukinyama, nangwa nambala ya jizhina janji.

¹⁸ Pano pakebewa maana. Aye uji na maana, abale nambala ya lukinyama, mambo ayo nambala ke nambala ya muntu. Ne nambala yanji ke 666.