Lumwekesho 12 - KNTP

Mwanamukazhi ne nsung'unyi

¹ Kabiji kiyukilo kikatampe kyamwekele mwiulu. Kya mwanamukazhi wavwala juba, ne ng'ondo munshi ya maulu anji, wajinga na munchinya wa tubangabanga jikumi na tubiji pa mutwe wanji.

² Wajinga na jiimi, wajijile bisanso bya kusema, ne misongo ya kusaka kusema.

³ Kwamwekele ne kiyukilo kikwabo mwiulu. Kwajinga nsung'unyi mukatampe uchila kasa aji na mitwe itanu na ibiji, ne nsengo jikumi, ne pa mitwe yanji pajinga tubondo tutanu na tubiji.

⁴ Ne luminzo wanji wakokele lubaji lumo lwa pa lubaji lusatu lwa tubangabanga twa mwiulu, ne kwitutaya pantanda. Kabiji aye nsung'unyi waimene mu kyenyi kya mwanamukazhi, yenkawa wasakile kusema, amba pa kusema mmine mwananji.

⁵ Ne aye wasemene mwana wamulume, ye ukalama mikoka yonse ya bantu na kamama ka kapotwe. Ne mwananji washikwilwe ne kutwalwa kwi Lesa, ne ku jitanda janji.

⁶ Ne aye mwanamukazhi wanyemejile mungye, ko bamunengezhezhe kwi Lesa amba, bakamujiishe konkakwa moba 1,260.

⁷ Ponkapo mwajinga nkondo mwiulu. Mikeela ne bamalaika banji ke balwe ne aye nsung'unyi, ne sung'unyi naye walwile naabo na bamalaika banji,

⁸ bino sung'unyi ne bamalaika banji bashinjilwe, kabiji abo kechi bamwene pa kwikala jibiji mwiulu ne.

⁹ Ne aye nsung'unyi mukatampe waelelwe panshi, yenkaye mulolo wa kala, yebateela amba Diabola ne Satana, mujimbijimbi wa pantanda ponse waelelwe pantanda, ne bamalaika banji nabo baelelwe nanji panshi.

¹⁰ Kepo naumvwine jiwi jikatampe mwiulu amba, “Pano lupulukilo, ne bulume, ne bufumu bwa Lesa wetu, ne luusa lwa Kilishitu wanji, byafika! Mambo awa mushinawishi wa bakwetu waelwa panshi. Yenkaye wibashinawijilenga kwi Lesa wetu mute ne bufuku.

¹¹ Kabiji bamushinjile na mambo a mashi a Mwana Mukooko, ne na mambo a byambo bya kushimuna kwabo, kabiji kechi batemenwe myeo yabo amba twakafwa ne.

¹² Byonkabyo sekelai, anweba meulu, ne anweba mwikalamo! Malwa enu anweba ntanda ne kalunga! Mambo Diabola waikila ko muji, kasa aji na bukaji bukatampe, byo ayuka amba kimye kyanji kyashaala ke kicheche.”

¹³ Kabiji aye nsung'unyi byo amwene amba, watayiwa pano pantanda, wapachilenga awa mwanamukazhi wasemene awa mwana wamulume.

¹⁴ Ponkapo mwanamukazhi bamupeele byapi bibiji bya mpungu mukatampe, amba atumbuke aye mungyetu kuntu kwanji, ko bakamujishanga myaka isatu ne wa kupelelezha pakachi, mu kumufya ku meso a mulolo.

¹⁵ Ne aye mulolo wapaajile mema mu kanwa kanji, nobe mukola mu nyuma ya mwanamukazhi, amba amukumpule ne kumutwala.

¹⁶ Kabiji mushiji wamukwashishe mwanamukazhi, ne mushiji waasamine ne kumumina awa mukola ye apaajile nsung'unyi mu kanwa kanji.

¹⁷ Ponkapo aye nsung'unyi wamuzhingijile bingi mwanamukazhi kaye ne kuya na kulwa naabo bashajilepo ba munkunwa yanji, bonka balama mikambizho ya Lesa, ne kukwachisha bukamonyi bwa Yesu.

¹⁸ Kabiji ne aye waimene pa musenga wa kalunga ka mema.