Lumwekesho 11 - KNTP

Batumonyi babiji

¹ Kabiji bampeele jitete nobe mukombo ne kung'ambila amba, “Imana upime nzubo yazhila ya Lesa, ne kyakusokelapo bitapisho, ne aba bapopwelamo.

² Bino lubanza uji pangye ya nzubo yazhila kumupima ne umushepo, mambo wapanwa ku Bangentila, kabiji bakamunyantaula muzhi wazhila na maulu bang'ondo makumi ana ne abiji.

³ Ne amiwa nkapana luusa ku batumonyi bami babiji, bakaulanga moba 1,260 kasa bavwala kisapi kya majilo.”

⁴ “Bano batumonyi babiji byo byobya bichi bibiji bya Olivi ne byobya bitulwapo malampi bibiji, byaimana ku meso a Nkambo wa pano pantanda.

⁵ Kabiji umvwe muntu usaka kwi boba bibi, mujilo ulupuka mutunwa twabo ne kwibasooka balwanyi babo, kabiji umvwe muntu ukasaka kwi boba bibi, aye byobyo akepayiwa.

⁶ Bano baji na luusa lwa kushinka mwiulu, amba mvula kechi anoke mu moba a bungauzhi bwabo ne. Kabiji baji na luusa lwa pa mema, kwalula mema ke mashi, ne lwa kupuma ntanda na myalo yonse, monka mo bakasakila.”

⁷ Kabiji byo bakapwisha kushimuna kwabo, awa lukinyama ufuma mu kalengwa kabuula kupela, ukalwa naabo, ne kwibashinda, ne kwibepaya.

⁸ Kabiji mibiji yabo yafwa ikalaala mu mukwakwa wa mu yewa muzhi mukatampe, yebateela mu kifwanyikizho amba, Sodoma ne Ijipita, mo apopelwe ne Nkambo yabo pa musalabu.

⁹ Kabiji ba mu mitundu ya bantu, ne ba mu bisaka, ne ba mu njimi, ne ba mu mikoka ya bantu, bakamona mibiji yabo yafwa moba asatu ne ja kupelelezha pakachi, ne kuswa amba beizhiike mibiji yabo yafwa mu bilende ne.

¹⁰ Ne bekala pano pantanda bakasekela ne kusangalala na mambo a abo, kabiji baketumina bya bupe abo bene na bene, mambo bano bangauzhi babiji bamanyikile bekala pano pantanda.

¹¹ Kabiji pakupita ao moba asatu ne ja kupelelezha pakachi, mupashi wa bumi kufuma kwi Lesa watwelele mwi abo, ponkapo baimene, ne moyo mukatampe wibakwachile bonse bebamwene.

¹² Ponkapo ba umvwine jiwi jafumine mwiulu ne kwibambila amba, “Kanjilai kuno!” Ponkapo bayile mwiulu mu jikumbi, balwanyi babo kasa bebatala.

¹³ Kabiji mu kyonkakya kimye kwajinga kitentanshi kikatampe, ne lubaji lumo lwa mu lubaji jikumi lwa muzhi lwaponene, kabiji kwafwile bantu 7,000 na kitentanshi, ne bashajilepo baubile moyo, ke batumbijike Lesa wa mwiulu.

¹⁴ Malwa a bubiji apita, talai malwa a busatu abena kwiya bukiji!

Ntolompita ya butanu na bubiji

¹⁵ Ponkapo ne aye malaika wa butanu na bubiji naye waimbile, kabiji kwajinga mawi akatampe mwiulu kasa aamba amba, “Bufumu bwa pantanda bwa aluka ke bufumu bwa Nkambo yetu, ne bwa Kilishitu wanji, ne aye ukekala mfumu myaka ne myaka!”

¹⁶ Ponkapo aba bakulumpe makumi abiji na bana, bekala ku meso a Lesa pa bipona byabo, baponene panshi ne kupopwela Lesa,

¹⁷ amba, “Twimusanchila, anweba Nkambo Lesa, Wa bulume bonse, ujipo, kabiji wajingapo! Mambo mwatambula bulume bwenu bukatampe ne kwikala ke mfumu!

¹⁸ Kabiji ba mitundu ya bantu yazhingijile, mambo bukaji bwenu bwafika, kimye kya kwibachibila mambo bafu kyafika. Ne kya kupana mfweto ku bakalume benu bangauzhi, ne ku bazhijikwa benu, ne bonse baakamwa jizhina jenu, bacheche ne bakatampe. Kimye kya kwibonauna aba bonauna ntanda!”

¹⁹ Ponkapo nzubo yazhila ya Lesa iji mwiulu beishinkwile, kabiji kwamwekele mu nzubo yazhila jikwachi jazhila ja mulaye wanji. Ponkapo ke kubesha, ne mawi, ne bilulumo, ne kitentanshi, ne mvula mukatampe wa mabwe.