Lumwekesho 10 - KNTP

Malaika ne ka buku kacheche

¹ Ponkapo namwene malaika mukwabo wakosa waikijilenga kufuma mwiulu. Kasa avwala jikumbi ne kakongolo pa mutwe wanji, ne kilungi kyanji kyamwekelenga nobe juba, ne maulu anji nobe mimbulungwa ya mujilo.

² Kabiji mu kuboko kwanji mwajinga ka buku ko bazhikula. Ponkapo watujile kulu kwanji kwa kilujo pa kalunga, ne kwa kipiko nako pa mushiji,

³ ne kubijika na jiwi jikatampe nobe bokwe wimba, kabiji aye byo abijikile, ne bilulumo bitanu na bibiji byasanswile mawi abyo.

⁴ Kabiji byo byaluluminenga abya bilulumo bitanu na bibiji, nasakile kunemba. Ponkapo naumvwine jiwi jafumine mwiulu amba, “Shiinka na kateetesho abya bintu byo waumvwa byaamba bilulumo bitanu na bibiji, kabiji kechi wibinembe ne!”

⁵ Ne aye malaika ye namwene kasa aimana pa kalunga ne pa mushiji wasuntwile kuboko kwanji kwa kilujo kwiulu,

⁶ kamuchipe awa wikala myaka ne myaka, aye walengele mwiulu ne bintu bijimo, ne ntanda ne bintu bijipo, ne kalunga ka mema ne bintu bijimo amba, “Kechi kwakishala kimye kikwabo kya kubanda ne!

⁷ Pakuba pa kimye kya jiwi ja malaika wa butanu na bubiji, byo akasaka kwimba ntolompita, ponkapo kyafyamika kya Lesa kikapwa, monka mwayila Mambo Awama o ebabujile bakalume banji bangauzhi.”

⁸ Ne jonkaja jiwi jo naumvwine mwiulu, nejumvwine kasa jing'ambila jibiji amba, “Yanga ukatambule awa buku ye bazhikula uji mu kuboko kwa yewa malaika waimana pa kalunga ne pa mushiji.”

⁹ Ponkapo nayile kuji aye malaika, ne kumwambila amba, ampe aka ka buku, kumvwa aye wang'ambijile amba, “Tambula, uje, kasa kwalula munda mobe ke mwalula, pakuba mu kanwa kobe musa kutobala nobe buki.”

¹⁰ Ponkapo natambwile ka buku mu kuboko kwa aye malaika ne kuja, kabiji mu kanwa kami mwatobele nobe buki, pakuba byo napwishishe kuja, munda mwami mwalujile,

¹¹ Kabiji bang'ambijile amba, “Kyafwainwa obewa kwaula jibiji na mambo a mitundu ne mikoka ne njimi yavula ya bantu, ne a bamfumu bavula.”