Lumwekesho 1 - KNTP

¹ Lumwekesho lwa Yesu Kilishitu, lwamupele Lesa amba, akebabuule bakalume banji, bintu bikamweka palutwe kacheche. Kabiji watumine malaika wanji na kumubuula kalume wanji Yoano.

² Yenka washimwine mambo a Lesa, ne byambo bya ambile Yesu Kilishitu, ne bintu byonse byo amwene.

³ Watokwa awa utanga, ne aba bomvwa byambo bya mu uno buku wa bungauzhi, ne kwibikookela abya byanembwamo! Mambo kimye kyafwenya ke pepi.

Lwimu lwa kwimuna bipwilo bitanu na bibiji

⁴ Amiwa Yoano ku abya bipwilo bitanu na bibiji biji mu Asha. Bupe ne mutende bifuma kwi aye ujiipo, kabiji wajingapo, kabiji ukekalangapo, kabiji bifuma ne ku mipashi itanu na ibiji iji ku meso a jitanda janji,

⁵ kabiji bifuma ne kwi Yesu Kilishitu, kamonyi wakishinka, mutanshi kusanguka mu bafu, ye mwine mfumu wa bamfumu ba pano pantanda. Kwi aye witutemwa, ne kwitukasulula ku mambo etu na mashi anji,

⁶ ne kwitwalula ke bufumu amba twikale ke bang'anga ba kwingijila Lesa Shanji. Kwi aye kwikale lukumo ne bulume myaka ne myaka! Amena.

⁷ Talai, aye ubena kwiya na makumbi! Ne meso onse akamumona, pamo ne aba bamwashile. Ne mikoka yonse ya pano pantanda ikajila mabingo na mambo a aye. Byonkabyo, Amena!

⁸ Amiwa ne Alefwa ne Omega, byo a amba Nkambo Lesa, ujiipo, wajingapo, ye ukeya, wa bulume bonse.

Kimwesho kya kumona Kilishitu

⁹ Amiwa Yoano, mulongo wenu, ne wa kushilang'ena nenu mu bya malwa ne mu bufumu, ne mu butekanye, biji mwi Yesu. Najinga pa jikuji jo bateela amba, Patamosa na mambo a busapwishi bwa mambo a Lesa ne bukamonyi bwa Yesu.

¹⁰ Najinga mu Mupashi mu juba ja Nkambo, kabiji naumvwine kunyuma yami jiwi jikatampe, nobe ja ntolompita.

¹¹ Amba, “Byo wamona unembe mu buku ne kutuma ku abya bipwilo bitanu na bibiji. Ku Efisesa, ne ku Simulina, ne ku Pelegamuma, ne ku Tiyatila, ne ku Saladisa, ne ku Filadelifya, ne ku Laodikea.”

¹² Kabiji naalulukile namba mmone ubena kung'ambila, kepo namwene bitulwapo malampi bya ngolode bitanu na bibiji,

¹³ kabiji mukachi ka bitulwapo malampi namwene umo wapashang'ana nobe mwana muntu, kasa avwala kivwalo kyafika ku maulu, kabiji kasa anyinga mukwato wa ngolode mu kyaji kyanji.

¹⁴ Ne nsuki ya ku mutwe wanji yatookele nobe boya bwa mukooko utoka nangwa nobe sino, ne meso anji aubile nobe lubeebe lwa mujilo;

¹⁵ ne maulu anji aubile nobe mukuba ye bawamisha wasungululwa mu nsaka ya mujilo, ne jiwi janji jaubile nobe jiwi ja mema avula.

¹⁶ Kabiji mu kuboko kwanji kwa kilujo mwajinga tubangabanga tutanu na tubiji, ne mu kanwa kanji mwalupukile mpoko yatwa kubiji, ne kilungi kyanji kyaubile nobe juba jasaama mubulume bwajo.

¹⁷ Ponkapo byo na mumwene, naponene ku maulu anji nobe muntu wafwa. Ne aye wantentekele kuboko kwanji kwa kilujo, amba, “Kuuba moyo ne! Amiwa ne mutanshi ne wapelaako.

¹⁸ Ne wa bumi! Bino nafwiile, kabiji tala, ne mumi wa myaka ne myaka, kabiji nji na bakii ba lufu ne ba kalunga ka bafu.

¹⁹ Onkao mambo nemba abya byo wamona, bintu bijipo, ne bikamweka palutwe.

²⁰ Bino akya kyafyamika kya atwa tubangabanga tutanu na tubiji to wajikumona mu kuboko kwami kwa kilujo, ne abya bitulwapo malampi bitanu na bibiji bya ngolode, byo byo bino; atwa tubangabanga tutanu na tubiji bo bamalaika ba byobya bipwilo bitanu na bibiji, kabiji abya bitulwapo malampi bitanu na bibiji byo bipwilo bitanu na bibiji.”