Luka 9 - KNTP

Yesu wibatuma ba jikumi na babiji

¹ Aye wibechile ba jikumi ne babiji ne kwibapa bulume ne luusa pa bonse bademona ne lwa kubuka bikola,

² ne aye wibatumine na luusa lwa kusapwila mambo a Bufumu bwa Lesa ne kubuka bakolwa.

³ Kabiji aye wibambijile amba, “Kechi musende nangwa kimo pa lwendo ne, mukombo ne, nangwa fukuta ne, nangwa shinkwa ne, nangwa mali ne, kabiji kechi musende bya kuvwala bibiji ne.

⁴ Kabiji mu nzubo monse mo mukatwela, kekalai monka, ne byo mukafumakotu.

⁵ Ne konse ko bakabula kwi mutambwila, byo mukafumamo mu yewa muzhi mukakunte lukungu lwa ku maulu enu bikekale ke kamonyi bya kwibashiina.”

⁶ Ne abo bafumineko ne kupitang'ana mu mizhi, kasa ba sapwila Mambo Awama konse ne kubuka.

Heloda kya mukatazha kuyuka bintu bya mwekelenga

⁷ Kabiji Heloda mfumu waumvwine byonse bya mwekelenga, ne aye wa lubankene maana, mambo kya ambiwenga ku bamo amba Yoano wasanguka mu bafu,

⁸ bamo nabo amba Elaija wamweka, ne ku bakwabo nabo amba umo wa mu bangauzhi baakala wasanguka.

⁹ Heloda wa ambile amba, “Yoano na mwipayile, pakuba uno ye ng'anyi ye mbena kumvwina bino bintu?” Ne aye wakebele ku mumona.

Yesu wajisha bantu biumbi bitanu

¹⁰ Byo babwelele batumwa bamubujile byonse byo baubilenga. Ne aye wibatwajile kwa bunke ku muzhi yebatela amba Betesaida.

¹¹ Kabiji jibumba byo jikiyukile, bamulondejile, ne aye wi batambwijile ne kwibambila mambo a Bufumu bwa Lesa ne kwibabuka aba bakebelenga ku bukwa.

¹² Ne pa kuya na kuzhika juba, ba jikumi na babiji baishile ne kumwambila amba, “Ambilai jibumba baye mu mizhi ne mu majimi bakebe pa kulaala ne bya kuja, mambo muno mungye.”

¹³ Pakuba Yesu wibambijile amba, “Anweba bapai byakuja.” Ne abo ba kumbwile amba, “Tujitu na bashinkwa batanu ne masabi abiji. Kana tuye na kupota kajo ka bano bantu bonse.”

¹⁴ Mambo bajinga pepi biumbi bitanu bya banabalume. Ne aye wibambijile baana banji babwanga amba, “Bekajikai panshi, bilumbiji, bilumbiji, bya bantu makumi atanu, atanu.”

¹⁵ Ne abo baubile byonkabyo, kabiji bebekajikile bonse panshi.

¹⁶ Ne pa kushikula bashinkwa batanu ne masabi abiji, watajile mwiulu ne kwibipesha. Ponkapo wa tebawile bashinkwa ne kwibapa baana babwanga amba, batwale ku mabumba

¹⁷ Ne bonse bajiile ne kwikuta. Ne kutolaula batolawile bya shajilepo, bilukwa jikumi na bibiji bya bashinkwa batebaulwa.

Petelo byo a ambile amba Yesu ye Kilishitu

¹⁸ Juba jimo Yesu byo alombelenga bunke bwanji, ne baana babwanga bajinga nanji. Ne aye wibepwizhe amba, “Nanchi mabumba amba amba yami ng'anyi?”

¹⁹ Ne abo bamukumbwile amba, “Yoano Mubatishi, bino bakwabo amba, Elaija, ne bakwabo amba, umo wa mu bangauzhi bakala wasanguka.”

²⁰ Ne aye wibambijile amba, “Bino anweba mwamba amba amiwa yami ng'anyi?” Ne Petelo wamukumbwile amba, “Yenu Kilishitu wa Lesa.”

Yesu waambila jimo na mambo a kumanama ne lufu lwanji

²¹ Ne aye wibambijile kyakosa amba kechi bafwainwa kubuulapo nangwa muntu umo kino kintu ne,

²² wa ambile amba, “Mwana Muntu kyamufwainwa kumanama bintu byavula ne kumukana ku bakulumpe ne ku bang'anga bakatampe ne ku banembeshi, ne kwipayiwa, kabiji mu juba ja busatu nkasangulwa.”

Kushikula musalabu ne kulondela Yesu

²³ Ne aye wibambijile bonse amba, “Umvwe muntu usaka kundondela, ekane mwine, ashikule musalabu wanji pa juba pa juba ne kundondela.

²⁴ Mambo awa usaka kupulusha mweo wanji ukamutaya, pakuba yense ukataya mweo wanji na mambo a amiwa ukamupulusha

²⁵ Lelo muntu nangwa wanonka ntanda yonse ukamwenamo ka, umvwe wionauna ne kwitaya aye mwine?

²⁶ Mambo yense ukangubila bumvu amiwa ne mambo ami, aye naye Mwana Muntu ukamubila bumvu byo akeya mu lukumo lwanji ne mu lukumo lwa Shanji ne lwa bamalaika bazhila.

²⁷ Kine nemubuula namba, po baji baimana pano bakabula kumona lufu nangwa pacheche ne, poso bakamone bufumu bwa Lesa.”

Yesu wa aluka ke ungi

²⁸ Pakupita moba pepi atanu na asatu kufuma byo a ambile bibye bintu wasendele ba Petelo ne Yoano ne Yakoba ne kukanjila pa muntumba na kulomba.

²⁹ Ne byo akilombelenga, kumweka kwa kilungu kyanji kwa alukile, ne bivwalo byanji bya bekaukilenga ne kutoka too.

³⁰ Ne ponkapo talai, bantu babiji besambilenga nanji, ba Mosesa ne Elaija,

³¹ abo bamwekele mu lukumo kabiji besambilenga na mambo a lufu lwanji, lwajinga pepi kufikizhiwa mu Yelusalema.

³² Bino Petelo ne boajinga naabo, bannemejilwe natulo, kabiji byo babuukile patulo bamwene lukumo lwanji ne boba bantu babiji baimene pamo nanji.

³³ Ne boba bantu byo a abenenga naabo, Petelo wamwambijile Yesu amba, “Nkambo, kyawama byo tuji pano. Tushimike matente asatu, umo wenu, mukwabo wa kwa Mosesa ne mukwabo wa kwa Elaija.” Kwakubula kuyuka kyo a ambile ne.

³⁴ Kabiji byo akyambilenga bino bintu, jikumbi ja mwekele ne kwibavweta, kabiji baumvwine moyo byo batwelele mu jikumbi.

³⁵ Ne jiwi ja ambile kufuma mu jikumbi, amba “Uno ye Mwanami, wami wasalwa; mukokelai!”

³⁶ Ne jiwi byo jalekele kwamba, Yesu washajiletu kunke bwanji. Ne abo bazhindaminetu nzo, kechi babujilepo nangwa umo mu oa moba nangwa kintu kimo na mambo a kintu kyo bamwene ne.

Kubukwa kwa nsongwalume wajinga na mupashi wabiipa

³⁷ Juba jalondejilepo, byo bakunkulukile kufuma pa mutumba, jibumba jikatampe jamusambakene.

³⁸ Kabiji talai, mwanamulume kufuma mu jibumba wabijikile amba, “Mufunjishi, ne musashijila namba akitalai mwanami, mambo ye yenkatu mwanami.

³⁹ Kabiji talai, mupashi ukelwa kumukwata, ne aye utama muteto. Umwalang'anya panshi ne kuuba kapofu ku kanwa; ne kumukozha kabiji kumuleka bukiji ne.

⁴⁰ Kabiji naji kwibasashijila baana benu babwanga namba bamupangemo, ne abo baji kukankalwa.”

⁴¹ Kabiji Yesu wibakumbwile amba, “Anweba kisemi kyabula lwitabilo, kyaluwankana, bimye binga byo nkekala nenu ne kwimutekenya?” “Muleetai mwanenu kuno.”

⁴² Byo aishilenga, mudemona wamuponeshe panshi ne kumwalang'anya. Bino Yesu wamukainye awa mupashi wabiipa ne kumubuka mwana, kabiji wamupaine kwi shanji.

⁴³ Ne bantu bonse bakuminye pa bulume bukatampe bwa Lesa. Pakuba bantu byo bakitwajijile na kukumya byonse byo a ubilenga, Yesu wa ambile ku baana banji babwanga amba,

Yesu wa amba jibiji na mambo a lufu lwanji

⁴⁴ “Lekai bino byambo bitwele mu matwi enu. Mwana Muntu kaji pepi kupanwa mu maboko a bantu.”

⁴⁵ Pakuba kino kyambo kechi bekyumvwishishe ne. Kyafyamikile kwi abo, pakuba amba babule kwi kyumvwisha. Ne abo bajinga na moyo ku mwipuzha mo kyayila.

Nanchi ng'anyi mukatampe?

⁴⁶ Kabiji mapata abuukile pakachi kabo amba ng'anyi mukulumpe.

⁴⁷ Pakuba Yesu byo ayukile milanguluko ya mu michima yabo, washikwile mwana wa mucheche ne kumubiika ko ajinga

⁴⁸ ne kwibambila amba, “Yense wa kumutambula uno mwana mu jizhina jami wantambula amiwa, ne wantambula amiwa wamutambula ne wantumine. Mambo awa wapelaako mwi anweba ye mukatampe.”

⁴⁹ Yoano wamukumbwile amba, “Nkambo, twamwene muntu kasa apangamo bademona mu jizhina jenu, kabiji twaesekele kumukanya, mambo kechi witulondela atweba ne.”

⁵⁰ Pakuba Yesu wamwambijile amba, “Kumukanya ne, mambo awa wabula kwikala mulwanyi wetu ke wa kwetu.”

Muzhi wa bena Samaliya byo bakaine kumutambula Yesu

⁵¹ Kabiji moba byo a fwenyenye kubwipi kutwalwa mwiulu, watazhizhe kilungi kyanji kuya ku Yelusalema.

⁵² Watumine baluwe kulutwe yanji, bayile mu muzhi wa Samaliya mu kumunengezhezha bintu byonse.

⁵³ Pakuba bantu kechi bamutambwile ne, mambo kilungi kyanji kyatajile ku Yelusalema.

⁵⁴ Ne baana banji babwanga ba Yakoba Ne Yoano byo bekimwene, ba ambile amba, “Nkambo, mwasaka amba, twite mujilo kufuma mwiulu ne kwibasoka nyi?”

⁵⁵ Yesu wa alulukile ne kwibakanya.

⁵⁶ Kebaye ne kuya ku muzhi mukwabo.

Bikebewa pa kumulondela Yesu

⁵⁷ Kabiji byo bayilenga mu jishinda, umo wamwambijile amba, “Nkemulondelanga konse konse ko mukaya.”

⁵⁸ Kumvwa Yesu wamwambijile amba, “Balubwala baji na mimbwa, ne bang'onyi bapita mwiulu nabo baji na binsa, pakuba Mwana Muntu kechi ujipo na pa kushakamina mutwe wanji ne.”

⁵⁹ Wa ambijile ne mukwabo amba, “Ndondelai amiwa.” Bino aye wa ambile amba, “Nkambo, akindekai patanshi nkiye na kuzhiika bataata.”

⁶⁰ Ne Yesu wamwambijile amba, “Balekai bafu bazhiike bafu bakwabo. Pakuba obewa, yanga na kusapwila bufumu bwa Lesa.”

⁶¹ Ne mukwabo naye amba, “Nsa kwimulondela, mwane Nkambo, ndekai patanshi nkashajikepo baji ku nzubo kwami.”

⁶² Yesu wamwambijile amba, “Kapaji muntu ukwata pulao ne kutala kunyuma wafwainwa bufumu bwa Lesa ne.”