Luka 4 - KNTP

Kwesekwa kwa Yesu

¹ Ne Yesu, kasa ayulwa na Mupashi Wazhila, wabwelele kufuma ku Yodano watangijilwe na Mupashi mungye,

² moba makumi ana, na kwesekwa kwi Diabola. Kabiji kechi wajiilepo kintu nangwa kimo mu oa moba ne. Byo apwile aa moba, waumvwine nzala.

³ Kepo Diabola wamwambijile amba, “Inge wi Mwana Lesa, ambila aje jibwe jaluke ke shinkwa.”

⁴ Kumvwa Yesu wamukumbwile amba, “Kyanembwa amba, muntu kechi ukamwena bumi mu shinkwa yenka ne.”

⁵ Kepo Diabola wamutwajile ne peulu ne kumumwesha bufumu bonse bwa pano pantanda mu kakimye kacheche.

⁶ Kabiji Diabola amba, “Obewa nsakukupa luusa lonse ne lukumo lwa bino byonse, mambo byapewa kwi amiwa, ne amiwa nakonsha kumupa yenka ye nasaka.

⁷ Byonkabyo inge obewa waswa, kumpopwela amiwa, byonse bikekala ke byobe.”

⁸ Ne Yesu wamwambijile amba, “Kyanembwa amba, ‘Ukamupopwela Nkambo Lesa wobe, ne ku mwingijila aye yenka!’ ”

⁹ Kabiji aye wamutwajile Yesu ku Yelusalema. Kabiji wamubiikile peulu ya jikonka ja nzubo ya Lesa ne kumwambila amba, “Umvwe wi Mwana Lesa, witaye obewa mwine panshi kufuma pano,

¹⁰ mambo kyanembwa amba, ‘Ukakambizha bamalaika banji, bakakulama obewa,’

¹¹ amba ‘Bakakusenda mu maboko abo, kuchiina amba waketuntula kuulu kobe ku jibwe.’ ”

¹² Kabiji Yesu wamwambijile amba, “Kyanembwa amba, ‘kechi weseke Nkambo Lesa wobe ne.’ ”

¹³ Ne Diabola byo apwishishe kumweseka lweseko lonse, wamulekele moba amo.

Yesu byo atatwile mwingilo wanji mu Ngalilea

¹⁴ Ne Yesu wabwelele mu Ngalilea, na bulume bwa Mupashi Wazhila, ne nkuwa yanji yayile konse konse mumande.

¹⁵ Kabiji wibafunjishenga mu mashinagoga abo, kasa atakaikwa ku bonse.

Yesu byo bamukaine ku Nazala

¹⁶ Kabiji waishile ku Nazala, konka ko akomejile. Kabiji byonka byo akelwanga kuuba, wayile ku shinagoga mu juba ja Sabado, ne kwimana waimene amba atange.

¹⁷ Ne kumupa bamupele buku wa ngauzhi Isaya, wavungulwile muvungilo ne kutaana po kyanembwa amba,

¹⁸ “Mupashi wa Nkambo uji pe amiwa, mambo wanshinga manyi amba usapwile Mambo Awama ku balanda. Wantuma kusapwila mambo a bupokolweshi ku bakaswa, ne kutambula meso bampofu, Ne kwibakasulula bamanyikwa,

¹⁹ ne kusapwila amba mwaka wa Nkambo wafika.”

²⁰ Ponkapo Yesu wa muvungile buku ne kumupana kwi kalama ne kwikala waikele panshi. Ne bonse bajinga mushinagoga bamuzanzhile meso.

²¹ Ne aye watatwile kwibambila amba, “Lelo kino kinembelo kyafikizhiwa mu matwi enu.”

²² Kabiji bonse bamutakaikilenga ne kukumya byambo bya bupe byafuminenga mu kanwa kanji. Ne kwamba amba, “Nanchi uno kechi ye mwana Yosefwa nenyi?”

²³ Ne aye wibambijile amba, muka ng'ambila kino kishimpi amba, “Obewa ng'anga ibuke obewa mwine,” abya byo twaumvwine byo mwaubile mu Kapenama, mwibyube ne muno mu muzhi wenu.

²⁴ Ne aye wa ambile amba, “Kine nemwambila namba, kafwako ngauzhi witabilwa mu muzhi wanji mwine ne.

²⁵ Kine nemwambila namba, mwajinga banabakazhi bafwilwa bavula mu Isalela mu moba akwa Elaija, byo bashinkile mwiulu myaka isatu ne bang'ondo batanu na umo, ne kipowe kyakumbene ntanda yonse,

²⁶ ne Elaija kechi bamutumine, nangwa ku umo mu Isalela ne, kana ku Zelefwata, mu kyalo kya Sidona, ku mwanamukazhi wafwilwa.

²⁷ Kabiji mwajinga bambumba bavula mu Isalela mu moba akwa Elisha ngauzhi, kafwako nangwa umo wabukilwe ne, poso Nemani mwina Silya.”

²⁸ Byo baumvwine bino bintu, bonse bajinga mushinagoga baubile bingi bukaji.

²⁹ Ne kwimana baimene ne kumupanga mu muzhi ne kumutwala kwapela mutumba patungilwe muzhi wabo, amba bamutaye munshi ya mutumba.

³⁰ Pakuba aye wapichile mukachi kabo, kaye.

Muntu wajinga na mupashi wabiipa

³¹ Kabiji wakunkulukile ku Kapenama, muzhi wa mu Ngalilea. Ne aye wibafunjishenga mu juba ja Sabado,

³² ne abo bakuminye bingi kufunjisha kwanji, mambo aye wafunjishenga na luusa.

³³ Kabiji mu shinagoga mwajinga muntu wajinga na mupashi wabiipa, ne kubijika wabijikile na jiwi jikatampe amba,

³⁴ “Mamo! Leelo musaka kuubaka ne atweba, Yesu mwina Nazala? Leelo mwaiya na kwitonauna atweba nyi? Nemuyuka byo muji, anweba mwi Wazhila wa Lesa.”

³⁵ Bino Yesu wamukainye amba, “Zhindama, fumamo mwi aye!” Ne demona wamuponeshe panshi mukachi kabo, ne kufuma wafuminemo, ne kumukozha nangwa pachechetu ne.

³⁶ Ne bonse bakuminye ne kwambang'ana bene na bene amba, “Ng'anyi musango wa bino byambo? Mambo na luusa ne na bulume ukambizha ne mipashi yabipa, nayo ifumamo!”

³⁷ Ne nkuwa ya Yesu yakumbene konse konse mu kyokya kyalo.

Yesu wa buka bantu bavula

³⁸ Ne aye waimene ne kulupuka mu shinagoga ne kutwela wakatwelele mu nzubo ya kwa Petelo. Ne muko wanji Shimona wakolelwe kikola kya mubiji mashika, ne abo bamusashijile na mambo a aye.

³⁹ Kabiji wayile ne kwimana ku mwanya wanji ne kukambizha kikola kya mubiji mashika kumuleka. Ne aye wabukilwe, ponkapo waimene ne kwingila ke ebengijile.

⁴⁰ Pa kuzhika juba bonse bajinga na balongo babo bakolelwenga bikola bya misango ne misango bebaleetele kwi Yesu, ne aye wibatentekele maboko anji ne kwibabuka bonse.

⁴¹ Ne bademona nabo bafumine mu bantu bavula, kasa babijika amba, “Anweba mwi Mwana Lesa!” Bino aye wibakambizhe ne kwibakanya amba kechi bambe ne, mambo bamuyukile amba ye Kilishitu.

Kusapwila kwa Yesu mu mashinagoga

⁴² Ne byo bwakiile lukeelo, walupukile ne kuya mungyetu mwa bunke bwanji. Kabiji bantu bamukebele ne kwiya ko aji, ke basake kumukanya amba kechi ebashe ne,

⁴³ kepo aye ebambijile amba, “Amiwa nafwainwa kusapwila Mambo Awama a bufumu bwa Lesa ne ku mizhi ikwabo pamo; mambo kino kyo kyo bantumijile.”

⁴⁴ Kabiji wasapwijilenga mu mashinagoga a mu Yudea.