Luka 3 - KNTP

Kusapwila kwa Yoano Mubatishi

¹ Mu mwaka wa bujikumi na butanu wa bufumu bwa kwa Tibeliusa Kesala, Pontiusa Pilato kasa aji ndamakyalo wa Yudea, ne Heloda naye kasa aji mfumu wa mu Ngalilea, ne mulongo wanji Filipa naye kasa aji mfumu wa mu kyalo kya Itulea ne Tilakonyitisa, ne Lisanyasa naye kasa aji mfumu mu Abilene,

² kimye ba Anasa ne Kaifasa bajinga bang'anga bakatampe, mambo a Lesa aishile kwi Yoano mwana Zakaliya byo ajinga mungye.

³ Kabiji Yoano wayile konse konse mu musezho wa Yodano, kasa asapwila lubatizhilo lwa lulapilo lwa lulekelo lwa mambo.

⁴ Byonka byo kyanembwa mu buku wa ngauzhi Isaya amba, “Jiwi ja umo ubijika mungye amba, nengezhezhai jimo jishinda ja Nkambo; ololai mashinda anji!

⁵ Bimpachiko byonse bikazhiikwa, tutumbatumba tonse ne mitumba bikakululwa panshi. Ne pakonkomana napo pakoloka, ne mashinda a bituntuju nao akalamba.

⁶ Ne bantu bonse bakamona lupulukilo lwa Lesa!”

⁷ Aye Yoano wiambijile mabumba aishile kwi aye na kubatizhiwa amba, “Anweba kisaka kya milolo! Ing'anyi wimujimuna amba, munyeme bukaji bubena kwiya?

⁸ Byonkabyo pangai bipangwa byafwainwa lulapilo. Kabiji kechi mulanguluke mu michima yenu amba, ‘Tuji na shetu Abulahama ne.’ Pakuba amiwa nemwambila namba, Lesa wakonsha kwalula ao mabwe ke baana ba Abulahama.

⁹ Kabiji ne pano kapasa bekakungika kala ku mizhazhi ya bichi. Onkao mambo bichi byonse bibula kupanga bipangwa byawama bebitema ne kwibitaya mu mujilo.”

¹⁰ Ponkapo bantu bamwipwizhe amba, “Lelo nanchi atweba tube byepi?”

¹¹ Ne aye wibambijile amba, “Uji na malaya abiji apepo wabulajo, ne uji na kajo naye obe byonkabyo.”

¹² Ne basonkeshi nabo baishile mu kubatizhiwa ne abo ba mwambijile amba, “Mufunjishi, leelo nga atweba tube byepi?”

¹³ Ne aye wibambijile amba, “Kechi musonkeshe kukila byo mwatongwelwa ne.”

¹⁴ Bashilikale nabo bamwipwizhe amba “Nga atweba tube byepi?” Ne aye wibambijile amba, kechi mwangate mali a muntu nangwa umo nalupata ne, nangwa pa kumubepela ne, bino sekelai na mfweto yenu yonka.

¹⁵ Bantu bonse baketekejile ne kwiipuzha mu michima yabo amba kampe Yoano ye Kilishitu.

¹⁶ Ponkapo Yoano wibakumbwile bonse amba, “Amiwa kine nemubatizha na mema, pakuba wankila bulume ubena kwiya. Mikanda ya makwabilo anji amiwa kechi nafikilamo kwiikasulula ne. Aye ukemubatizha na Mupashi Wazhila ne na mujilo.

¹⁷ Aye uji na kya kululwilako mu kuboko kwanji, kabiji ukatokesha bulongo pa kipujilo kyanji ne kubungizha kajo mu butala bwanji; pakuba makunzhi ukeasoka na mujilo ubula kuzhima.”

¹⁸ Byonkabyo Yoano wasapwijile Mambo Awama ku bantu ne kwibasashijila.

¹⁹ Kabiji aye Yoano wamulengulwile Heloda mfumu na mambo a kwa Helodiasa, muka mulongo wanji, ne na mambo a bintu bikwabo byavula byatama byo aubile Heloda.

²⁰ Kino nakyo kyanungilepo pa byobya byonse kya kumutaya Yoano mu kaleya.

Lubatizhilo lwa Yesu

²¹ Pa kupwisha bantu bonse kubatizhiwa, ne Yesu naye byo abatizhilwe ne kulomba, ne jiulu ja shinkukile,

²² ne Mupashi Wazhila wa mwikijile mu musango wa mubiji wa bunkunda; ne jiwi jafumine mwiulu amba “Obewa yobe Mwanami ye natemwa, monamwena lusekelo.”

Bashakulu ba Yesu

²³ Yesu byo atatwile mwingilo wanji, wajinga pepi na myaka makumi asatu. Bantu balangulukilenga amba ye mwana Yosefwa ne Yosefwa naye mwana Heli,

²⁴ Heli naye mwana Matata, Matata naye mwana Levi, Levi naye mwana Meliki, Meliki naye mwana Yanai, Yanai naye mwana Yosefwa,

²⁵ Bino Yosefwa naye mwana Matatyasa, Matatyasa naye mwana Amosi, Amosi naye mwana Nauma, Nauma naye mwana Eshili, Eshili naye mwana Nagai,

²⁶ Nagai naye mwana Mata, Mata naye mwana Matatyasa, Matatyasa naye mwana Semeni, Semeni naye mwana Yoseki, Yoseki naye mwana Yoda,

²⁷ Yoda naye mwana Yoana, Yoana naye mwana Lehesa, Lehesa naye mwana Zelubabele, Zelubabele naye mwana Shalachele, Shalachele naye mwana Neli,

²⁸ Neli naye mwana Meleki, Meleki naye mwana Adi ne Adi naye mwana Kosamu, Kosamu naye mwana Elomodama, Elomodama naye mwana Ela, Ela naye mwana Yoshua,

²⁹ Yoshua naye mwana Elieza, Elieza naye mwana Yolima, Yolima naye mwana Matata, Matata naye mwana Levi,

³⁰ Levi naye mwana Shimeona, Shimeona naye mwana Yuda, Yuda naye mwana Yosefwa, Yosefwa naye mwana Yonamu, Yonamu naye mwana Eliakimu,

³¹ Eliakimu naye mwana Meleya, Meleya naye mwana Menana, Menana naye mwana Matata, Matata naye mwana Natana, natana naye mwana Davida,

³² Davida naye mwana Yese, Yese naye mwana Obeda, Obeda naye mwana Boaza, Boaza naye mwana Samona, Samona naye mwana Nashona,

³³ Nashona naye mwana Aminadaba, Aminadaba naye mwana Adamina, Adamina naye mwana Alanyi, Alanyi naye mwana Hezona, Hezona naye mwana Peleze, Peleze naye mwana Yuda,

³⁴ Yuda naye mwana Yakoba, Yakoba naye mwana Izaka, Izaka naye mwana, Abulahama, Abulahama naye mwana Tela, Tela naye mwana Nahola,

³⁵ Nahola naye mwana Seluka, Seluka naye mwana Leu, Leu naye mwana Peleka, Peleka naye mwana Hebela, Hebela naye mwana Shela,

³⁶ Shela naye mwana Kainana, Kainana naye mwana Apakasada, Apakasada naye mwana Shema, Shema naye mwana Nowa, Nowa naye mwana Lameki,

³⁷ Lameki naye mwana Metusela, Metusela naye mwana Enoka, Enoka naye mwana Yaleda, Yaleda naye mwana Malelela, Malelela naye mwana Kainana,

³⁸ Kainana naye mwana Enoshi, Enoshi naye mwana Seta, Seta naye mwana Adama, Adama naye mwana Lesa.