Luka 24 - KNTP

Lusanguko

¹ Bino pa juba jitanshi ja mulungu, kumakyamakya, bayile ku kilende, kasa basenda binunka bulongo byo banengezhezhe jimo.

² Kabiji bataine jibwe bejaalumunako kala ku kilende,

³ bino byo batwelelemo kechi batainemo mubiji wa Nkambo Yesu ne.

⁴ Byo baimene na kukumya na mambo a kino, talai banabalume babiji baimene ko baji mu bivwalo bibekauka.

⁵ Kabiji byo baubile moyo ne kukunyika bilungi byabo panshi, aba banabalume bebambijile amba, “Musakila ka mumi mu bafu?

⁶ Kechi uji muno ne, wasanguka. Vulukai byo emwambijile, byo akijinga mu Ngalilea amba,

⁷ ‘Mwana Muntu kyamufwainwa akasololwe ku maboko a babi, ne kupopwa kabiji mu juba ja busatu ukasanguka.’”

⁸ Kepo bavulukile byambo byanji,

⁹ kabiji bafumineko ku kilende, babwelele na kwibabuula byonse ba jikumi na umo ne bonse bakwabo.

¹⁰ Bano bajinga Maliya wa ku Magadala ne Yoana ne Maliya ina Yakoba, ne bakwabo banabakazhi bo bajinga naabo bo bakabujile batumwa bino bintu.

¹¹ Bino abya byambo byamwekele ku batumwa nobe byambotu, kabiji kechi bebitabile ne.

¹² Pakuba Petelo waimene ne kunyemena ku kilende; wabandamine na kusumbilamo, wamwene bisapi bya linenyi pa bunke; kabiji wabwelele ku nzubo na kukumya akya kyamwekele.

Lwendo lwa kuya ku Emasa

¹³ Kabiji talai, mu jonkaja juba babiji ba mwi abo bayilenga ku muzhi yebateela amba Emasa, pajinga mailoshi atanu na abiji kufuma ku Yelusalema,

¹⁴ kabiji besambilenga abo bene na mambo a abya byonse byamwekele.

¹⁵ Kasa ba amba ne kwisamba, Yesu mwine wafwenyenye kwipi kaye ne naabo.

¹⁶ Bino meso abo ashinkilwe amba, kuchiina ba kamuyuka.

¹⁷ Ne Yesu wibambijile amba, “Lelo ng'anyi misambo yo mubena kuya na kwisamba kasa mubena kwenda?” Kabiji baimene nzo, na bilungi bya bulanda.

¹⁸ Kumvwa umo jizhina janji Kileopasa amba, “Lelo anweba mwi mwenyi mu Yelusalema bunke bwenu byo mwabula kuyuka byalukutamo mu ano moba nyi?”

¹⁹ Kumvwa Yesu amba, “Ibika?” Ne abo ba mwambijile amba. “Bya Yesu wa ku Nazala, uno muntu wajinga ngauzhi mukatampe mu byubilo ne mu byambo kwi Lesa ne ku bantu bonse.

²⁰ Ne bang'anga bakatampe ne bandamakyalo bamuzhachishe amba, wafwainwa kufwa. Ne kupopa bamupopele pa musalabu.

²¹ Pakuba atweba twaketekejile namba, ye ukakuula bena Isalela. Kine, kabiji ne kikwabo, jino jo juba ja busatu kufuma mu juba jo byamwekele bino bintu.

²² Ne bamo banabakazhi ba mwiatweba betulengela kukumya; bajinga ku kilende lukelokelo,

²³ kabiji byo baji kubula kutanamo mubiji wanji, baji kwiya na kwamba amba, bamona kimwesho kya bamalaika bo ba amba amba, ye mumi.

²⁴ Bamo bakwetu botwajinga naabo baji kuya ku kilende ne ku kataana byonka byo ba amba banabakazhi, bino aye kechi baji kumumona ne.”

²⁵ Kepo Yesu ebambijile amba, “Anweba bilubi, ba michima ibanda kwitaba byonse byamba bangauzhi ba Lesa!

²⁶ Nanchi kechi kyamufwainwe Kilishitu kumanama bino bintu ne kutwela mu lukumo lwanji nenyi?”

²⁷ Ne kutatwila kwi Mosesa ne bonse bangauzhi, Yesu wi balumbulwijile mu binembelo byonse bintu byaamba pe aye mwine.

²⁸ Kabiji byo bafwenyenye kubwipi na muzhi ko bayilenga, Yesu waubile nobe ubena kupitaila,

²⁹ bino abo bamukainye amba, “Ikalai ne atweba, mambo ke mabanga, juba jaya kala.” Byonkabyo watwelele ne kwikala naabo.

³⁰ Kabiji byo aikajile ku tebulu na kuja naabo, washikwile shinkwa ne pa kupesha ne kumutebula wibapele.

³¹ Ponkapo meso abo alabile, ne kumuyuka bamuyukile, bino aye wazhimang'ene ku meso abo.

³² Kabiji ba ambang'ene bene na bene amba, “Nanchi michima yetu kechi yaji kutemanga munda byo aji kwisambanga ne atweba pa jishinda, ne byo aji kwitulumbulwilanga binembelo nenyi?”

³³ Ponkapo baimene pa kyonkakya kimye ne kubwela ku Yelusalema. Kabiji bebataine ba jikumi na umo ne bo bajinga naabo kasa bapwila pamo,

³⁴ kasa bamba amba, “Nkambo kine wasanguka, kabiji waji kumwekana kwi Shimona!”

³⁵ Ne abo babiji ba ambile byamwekele pa jishinda, ne byo a yukanyikilwe kwi abo pa kutebula shinkwa.

Yesu byo a mwekele ku baana banji babwanga

³⁶ Kabiji byo bakyambilenga pa bino bintu, Yesu mwine waimene mukachi kabo, ne kwibambila amba, “Mutende kwi anweba!”

³⁷ Pakuba abo bakakilwe bingi ne kubisha moyo kabiji balangulukile amba, bamona kipuku.

³⁸ Kepo aye ebambijile amba, “Lelo mambo ka kyo mwakatazhiwa? Kabiji mambo ka luzhinauko lwabukila mu michima yenu?

³⁹ Talai maboko ami ne maulu ami, amba yami iye. Nkwatai, ne kumona. Mambo mupashi kechi uji na mubiji wa nyama ne bikupa byo mwamona amiwa byonji nabyo ne.”

⁴⁰ Kabiji byo a ambile bino, wibamwesheshe maboko anji ne maulu anji.

⁴¹ Kabiji byo bakizhinaukilenga na mambo a lusekelo ne kukumya, wibambijile amba, “Mujipo na kajo ka kuja nyi?”

⁴² Kabiji bamupele kibese kya jisabi ja kukanga,

⁴³ ne aye watambwile ne kuja ku meso abo.

⁴⁴ Ponkapo wibambijile amba, “Bino byo byambo byami byo nemwambijile byo nakijinga nenu namba, kyafwainwa byonse bifike byanembelwa amiwa mu buku wa mizhilo wa Mosesa ne mu wa bangauzhi ne mu Masalamo.”

⁴⁵ Ponkapo wibashinkwile michima yabo amba bomvwishe binembelo,

⁴⁶ kabiji wibambijile amba, “Kino byo byo kyanembwa amba, Kilishitu wafwainwa kumona bya malwa ne kusanguka mu juba ja busatu,

⁴⁷ kabiji amba lulapilo ne lulekelo lwa mambo byafwainwa kusapwilwa mu jizhina janji ku mikoka yonse ya bantu, kutatwila mu Yelusalema.

⁴⁸ Ne anweba mwi batumonyi ba bibye bintu.

⁴⁹ Kabiji talai amiwa mwine nkemutumina akya kyalayile Bataata pe anweba. Pakuba anweba mwafwainwa kupembelela mu muzhi poso mukavwikwe na bulume kufuma mwiulu.”

Kutwalwa kwa Yesu mwiulu

⁵⁰ Ponkapo aye wibatangijile kuya na kufika ku Betani, kabiji byo asuntwile maboko anji wibapesheshe ne kwibapesha.

⁵¹ Byo ebapesheshenga, aye wa abene naabo ne kutwalwa watwajilwe mwiulu.

⁵² Ne abo bamupopwejile kabiji babwelele ku Yelusalema na lusekelo lukatampe,

⁵³ Kabiji bakelelwenga mu nzubo ya Lesa kasa batota Lesa.