Luka 22 - KNTP

Kukeba mwa kumwipayila Yesu

¹ Kimye kya Kijiilo kya Bashinkwa ba kubula Mbizho kya fwenyenye pepi, kyo bateela amba Kijiilo kya Lupitailo.

² Ne bang'anga bakatampe ne ba nembeshi ba Mizhilo basakilenga mwa kumwipayila, mambo bachiine bantu.

Yudasa byo aswile kumusolola Yesu

³ Ponkapo Satana watwelele mwi Yudasa yebatela amba Isakaliota umo wabajilwe mu ba jikumi na babiji.

⁴ Ne aye wafuminepo ne kuya na kumvwang'ana na bang'anga bakatampe ne bakulumpe ba bakalama mwa kwibasolwelaye.

⁵ Ne abo basekejile, kabiji baswile kumupa mali.

⁶ Ne Yudasa waitabile ne kusaka mwa kwibasolwelaye pabula jibumba.

Kunengezhezha jimo kijiilo kya lupitailo

⁷ Kabiji juba ja Bashinkwa ba kubula Mbizho jafikile, jonkaja jo bafwainwa kutapisha mwana mukooko wa Lupitailo.

⁸ Onkao mambo Yesu watumine Petelo ne Yoano amba, “Yainga muketunengezhezhe kijiilo kya Lupitailo tukaje.”

⁹ Kepo abo bamwipwizhe amba, “Musaka tukanengezhezhe kwepi?”

¹⁰ Kumvwa aye amba, “Talai, pa kutwela mu muzhi, mukasambakana mwanamulume wasenda mulondo wa mema. Kamulondelai kufika ne mu nzubo mo akatwela.

¹¹ Ne kumwambila mwine mwina nzubo amba, ‘Mufunjishi wa amba kwi anweba amba, nzubo ya bwenyi iji pi, mo nkajiila Kijiilo kya Lupitailo na baana bami babwanga?’

¹² Ne aye ukemumwesha nzubo ikatampe ya peulu yo banengezhezha jimo, monkamwa momo mukanengezha.”

¹³ Kabiji bayile bakataine byonka byo ebabujile, ne abo banengezhezhe jimo kijiilo kya Lupitailo.

Kijiilo kya Nkambo

¹⁴ Kabiji kimye byo kyafikile, Yesu waikajile kutebulu pamo na batumwa.

¹⁵ Ne aye wibambijile amba, “Naji kusakisha bingi kuja nenu kino kijiilo kya Lupitailo kasa nkyangye kumanama!

¹⁶ Mambo nemwambila namba, kechi nke kija ne poso byo kikafikizhiwa mu bufumu bwa Lesa.”

¹⁷ Ne aye washikwile katomeno, ne pa kusanta wa ambile amba “Tambulai kano mushilang'ene anweba bene na bene.

¹⁸ Mambo nemwambila namba kufuma ku ja leelo kechi nkatoma a bipangwa bya ming'anzang'anza ne, poso byo bukafika bufumu bwa Lesa.”

¹⁹ Ne aye washikwile shinkwa, ne pa kusanta, watebwile ne kwibapa amba, “Uno ye mubiji wami wimupainwa anweba. Kasa muba bibye mu kundanguluka amiwa.”

²⁰ Byonkabyo ne katomeno pa kupwisha kuja amba, “Kano katomeno lo lulayang'ano lupya mu mashi ami, emwichikila anweba.”

²¹ “Bino talai! Kuboko kwa ukansolola kuji ne amiwa pa tebulu.

²² Mambo Mwana Muntu uya monka mo kyafukwilwa, bino malwa kwiyewa muntu ukamusolola!”

²³ Ne abo batatwile kwiipuzha bene na bene amba, kana ng'anyi wa mwi abo waya obe kino kintu.

Kupachika na mambo a bukulumpe

²⁴ Kabiji mwabuukile lupata mu baana babwanga amba, ng'anyi wa mwi abo ye bafwainwa kulanguluka amba ye mukulumpe.

²⁵ Ne aye wibambijile amba, “Ba mfumu ba Bangentila be bobila bunkambo bantu babo, ne abo baji na luusa pe abo bebatela amba, ‘Bangubabiiya.’

²⁶ Bino kechi byobyo kyafwainwa kwikala anweba ne. Aye mukulumpe wa mwi anweba wafwainwa kwikala nobe mwanyike, ne aye ntangi nobe kalume.

²⁷ Mambo mukulumpe ye ng'anyi, awa waikala na kuja, inyi yewa ubena kumwingijila? Kechi yenkawa waikala na kuja nenyi? Bino amiwa nji mukachi kenu nobe wamwingilo.”

²⁸ “Anweba mwi boba bakelwa ne amiwa mu lweseko lwami;

²⁹ kabiji nemutongwela bufumu, byonka byo bantongwejile bataata.

³⁰ Namba mukaje ne kutoma ku tebulu wami mu bufumu bwami; kabiji mukekala pa matanda na kuchiba mambo a mikoka jikumi na ibiji ya bena Isalela.”

Kwambilwa jimo amba Petelo ukamukana Yesu

³¹ “Shimona, Shimona, talai, Satana wimusakile bonse amba emululule nobe kajo.

³² Bino amiwa nakulombelela obewa namba, lwitabilo lobe kechi lupwe ne. Ne obewa, pa kwaluluka jibiji, ukoseshe bakwenu.”

³³ Kumvwa aye amba, “Nkambo, naswila jimo kuya nenu mu kaleya ne ku lufu!”

³⁴ Kumvwa Yesu amba, “Petelo, na kwambila namba, ja leelo shikombwe kasa akyangye kukookola usakunkana jisatu amba, kechi wangyuka ne.”

Kikwama, fukuta, ne mpoko

³⁵ Kabiji aye wibambijile amba, “Byo nemutumine ne kikwama ne, nangwa fukuta ne, nangwa makwabilo ne, mwakajilwe kintu nyi?” Kumvwa abo amba, “Ine.”

³⁶ Ne aye wibambijile amba, “Pakuba pano, awa uji na kikwama asende, ne uji nafukuta naye mo monka. Ne awa wabulabyo apoteshe kivwalo kyanji, apote mpoko.

³⁷ Mambo nemwambila namba, kino kyanembwa amba, ‘Ne aye bamubajile pamo na batupondo,’ kyafwainwa kimfikile amiwa. Mambo bintu byanembejilwe amiwa byafwainwa bifikizhiwe.”

³⁸ Ne baana banji babwanga ba ambile amba, “Nkambo, talai, mapoko abiji ano.” Kumvwa aye amba, “Byonkabyo kilekai.”

Lulombelo lwa Yesu pa Mutumba wa olivi

³⁹ Yesu walupukile mu muzhi, ne kuya ku Mutumba wa olivi, byonka byo akelwanga kuuba; ne baana banji babwanga bamulondejile.

⁴⁰ Kabiji byo afikile konka wibambijile amba, “Lombainga kuchiina amba, mwakatwela mu lweseko.”

⁴¹ Kabiji wibashiile waendeleko musinso pakonsha kufika jibwe ja kutaya; ne aye wafukamine panshi kalombe.

⁴² Amba, “Taata, kana anweba mwaswa, mwikamfumye kano katomeno. Byonkabyo kechi kyaswa muchima wami ne, poso kyaswa muchima wenu kyubiwe.”

⁴³ Kabiji kwamumwekejile malaika kufuma mwiulu na kumukosesha.

⁴⁴ Na bulanda bwine bukatampe aye kalombeshe ne kulombesha; ne masulwila anji a alukile nobe miso ikatampe ya mashi kasa inokela panshi.

⁴⁵ Kabiji byo aimene po alombelenga, waishile ku baana banji babwanga wibataine kasa balaala mutulo twabulanda.

⁴⁶ Ne aye wibambijile amba, “Mwalajila ka? Bukai lombainga kuchiina amba mwakatwela mu lweseko.”

Kukwatwa kwa Yesu

⁴⁷ Byo akyambilengatu, ponkapo kwaishile jibumba na yewa watelelwe amba Yudasa, umo wa mu ba jikumi na babiji, kasa ebatangijila. Kabiji aye wafwenyenye pepi kwi Yesu na kumufyompa.

⁴⁸ Pakuba Yesu wamwambijile amba, “Yudasa, nanchi usolola Mwana Muntu na kumufyompa nyi?”

⁴⁹ Ne abo boajinga naabo byo bamwene bisaka kumweka, ba ambile amba, “Nkambo, twibakampe na mpoko nyi?”

⁵⁰ Ne umo wa mwi abo wamukampile kalume wa ng'anga mukatampe kabiji wamukopwele ne kutwi kwa ku kilujo.

⁵¹ Bino Yesu wa ambile amba, “Byonkabya lekai.” Kabiji aye wakwachile ku kutwi kwa awa kalume ne kumubuka.

⁵² Byonkabyo Yesu wibambijile bang'anga bakatampe ne bakulumpe ba bakalama ba ku nzubo ya Lesa, ne bakulumpe, bonka baishile na kumukwata amba, “Mwaiya nobe mwaiya kulwa na kapondo na mapoko ne tukonkolo?

⁵³ Byo najinga nenu moba onse mu nzubo ya Lesa, kechi mwatanyikile maboko enu amba munkwate ne, pakuba pano kyo kimye kyenu ne kya luusa lwa mfishi.”

Petelo byo amukaine Yesu

⁵⁴ Kabiji bamukwachile ne kumuleeta mu nzubo ya ng'anga mwine mukatampe. Kabiji Petelo walondejilenga katwezhimina.

⁵⁵ Kabiji byo ba banzhile mujilo mukachi ka kipango, ne kwikala pamo, Petelo naye waikajile naabo.

⁵⁶ Ponkapo muzha umo kamwale pa kumumona kasa aikala mu kyeya kya mujilo, kamutajishe amba, “Uno naye wajinga nanji.”

⁵⁷ Pakuba Petelo wakaine amba, “Obewa mwanamukazhi leka! Kechi namuyuka ne.”

⁵⁸ Pakupita ka kimye kacheche ne mukwabo wamumwene, ne aye amba, “Ne anweba nenuwa mwi bamo.” Kumvwa Petelo amba, “Anweba bantu, aha, amiwa ne.”

⁵⁹ Kabiji byo papichile awala umo mukwabo naye wa ambile na lupata amba, “Kine ne uno naye wajinga nanji; mambo ye mwina Ngalilea.”

⁶⁰ Pakuba aye Petelo amba, “Anweba bantu, amiwa kechi nayuka byo mubena kwamba ne.” Byo akyambilenga, ne shikombwe wakokwele.

⁶¹ Kepo Nkambo waalulukile ne kumutala Petelo. Ne Petelo wavulukile byambo bya ambile Nkambo amba, “Ja leelo jino shikombwe kasa akyangye kukookola, usakunkana jisatu.”

⁶² Ponkapo walupukile, ne kujila bingi.

Kumanyikwa ne kupumwa kwa Yesu

⁶³ Ne aba banabalume bamulaminenga Yesu, bamwendelekelenga ne kumupuma,

⁶⁴ Kabiji bamuvwetele kisapi pa meso ne kumwipuzha amba, “Aulanga, ing'anyi wakupuma?”

⁶⁵ Kabiji bamunenenenga ne bintu byavula bikwabo ne kumuuba mwenga.

Yesu byo bamuletele ku kije kikatampe

⁶⁶ Byo bwakiile, kije kya bakulumpe ba bantu kyapwijile pamo, bonse ne bang'anga bakatampe ne banembeshi; bamutwajile mukije kyabo amba,

⁶⁷ “Tubuulai umvwe mwi Kilishitu.” Kumvwa aye amba, “Umvwe nemubuule kechi musakwitaba ne;

⁶⁸ kabiji kana nemwipuzha, kechi musakunkumbula ne.

⁶⁹ Pakuba kufuma pa kino kimye Mwana Muntu ukekala ku kuboko kwa kilujo kya bulume bwa Lesa.”

⁷⁰ Kumvwa bonse amba, “Anweba nanchi mwi Mwana Lesa nyi?” Kumvwa aye amba, “Monkamo momwa ambila yami iye.”

⁷¹ Kumvwa abo amba, “Nanchi kikwabo kyo tusaka kya kumushiina kika? Mambo twiumvwina atweba bene kufuma mu kanwa kanji mwine!”