Luka 20 - KNTP

Byo bamwipwizhe Yesu mambo a luusa lwanji

¹ Juba jimo, Yesu byo afujishenga bantu mu Nzubo ya Lesa ne kusapwila Mambo Awama, kwaishile bang'anga bakatampe ne banembeshi ba mizhilo, baishile pamo na bakulumpe,

² ne kumwambila amba, “Tubuulai na ng'anyi luusa lomubilamo bino bintu? Nangwa ng'anyi wimupele luno luusa?”

³ Yesu wibakumbwile amba, “Lekai ne amiwa ne mwipuzhe kino. Pano mbulai,

⁴ nanchi lubatizhilo lwa Yoano lwafumine mwiulu nyi inyi ku bantu?”

⁵ Kepo baambang'ene abo bene na bene amba, “Umvwe twambe namba, ‘Lwafumine kwiulu,’ usa kwamba amba, ‘mambo ka o mwabujile kumwitabila?’

⁶ Kabiji umvwe twambe namba, ‘Lwafumine ku bantu,’ bonse bantu basa kwitwasa mabwe, mambo bonse baitabishatu amba, Yoano wajinga ngauzhi.”

⁷ Byonkabyo bakumbwile amba, “Kechi twayuka ko lwafumine ne.”

⁸ Kumvwa Yesu naye wibambijile amba, “Nanchi ne amiwa kechi nemubuule luusa lo ngubilamo bibye ne.”

Kishimpi kya bujimi bwa ming'anzang'anza

⁹ Ne aye watatwile kwibabula bantu kino kishimpi amba; “Muntu umo wajimine bujimi bwa ming'anzang'anza, ne kwibusha ku bakalama, wayile lwendo lwalepa ku ntanda ingi, wakabanjileko.

¹⁰ Kimye byo kyafikile, aye watumine kalume ku bakalama amba, akatambuleko bipangwa ku bamingilo. Pakuba bakalama bamupumine ne kumwimanya mabokotu.

¹¹ Kabiji aye watumineko kalume mukwabo. Bino aye naye bamupumine ne kumulengesha bumvu, ne kumwimanya mabokotu.

¹² Kabiji watumine ne wa busatu. Uno naye bamwashile ne kumutaya pangye.

¹³ Ponkapo mwina bujimi wa ambile amba, Lelo pano ngube byepi? Nsakutuma mwanami yenatemwisha, kampe bakamunemeka aye.

¹⁴ Pakuba bakalama byo bamumwene, ba ambile bene na bene amba, ‘Uno ye nswanyi. Twayai tumwipaye, pakuba amba buswanyi bwikale ke bwetu!’

¹⁵ Kabiji bamutayile pangye ya bujimi ne kumwipaya.” “Lelo nanchi awa mwina bujimi ukeboba byepi?

¹⁶ Aye ukeya ne kwibonauna aba bakalama, ne bujimi ukebupana ku bakwabo.” Byo ba umvwine bino, ba ambile amba, “Abyo ne!”

¹⁷ Bino Yesu wibatajile ne kwamba amba, “Lelo kino kyanembwa kyayila muka?” “‘Jibwe jo balengulwile bashimika, jo jaalukile ke mutwe wa jikonka.’

¹⁸ Yense ukaponena pa joja jibwe ukachimauka; pakuba awa ye jikaponena, jikamuvingakanya.”

Mambo a kupana misonko

¹⁹ Banembeshi ne bang'anga bakatampe basakile kumukwata pa kyonkakya kimye mambo bayukile amba, bo boatayila kino kishimpi, bino bachiine bantu.

²⁰ Kabiji bamusopelenga, ne kutuma bemwesheshenga nobe bakishinka amba bamukwate mu byambo byanji, bamone mwa kumufikizhizha ku ba bulume ne luusa lwa ndamakyalo.

²¹ Byonkabyo abo bamwipwizhe amba, “Mufunjishi, twayuka byo mwamba ne kufunjisha byaoloka, kabiji kechi mutala ku kilungi kya muntu ne, pakuba kine mufunjisha jishinda ja Lesa.

²² Kana kyawama kusonka kwi Kesala, nangwa ine?”

²³ Bino aye wamwene bujimbijimbi bwabo, ne kwibambila amba,

²⁴ “Aki mmweshai ndenali. Iji na kipasha ne kinembelo bya kwa ng'anyi?” Ne abo amba, “Bya kwa Kesala.”

²⁵ Kabiji aye wibambijile amba, “Nanchi panai kwi Kesala bintu bya kwa Kesala, ne kwi Lesa bintu bya kwa Lesa.”

²⁶ Kabiji kechi bakonsheshe kumona kyambo kya kumukwachila mu byo a ambile ku meso a bantu ne, kabiji bakuminye moebakumbwijile ne kuzhindama bazhindaminepo.

Kwipuzha pa mambo a lusanguko

²⁷ Basadusea bamo baishile kwi Yesu, bonka bakana amba kafwako lusanguko,

²⁸ kabiji bamwipwizhe jipuzho amba “Mufunjishi, Mosesa witunembejile amba, kana koloja muntu wafwa, washa mukazhi kwakubula baana ne, kyafwainwa nkasanji amusongole mukazhanji ne kubuusha lukunwa wa kolojanji.

²⁹ Pano kwajinga baana bankazhi batanu na babiji; mubeji wasongwele mukazhi, ne kufwa kwakubula baana ne.

³⁰ Ne wa bubiji wamusongwele awa mwanamukazhi,

³¹ ne wa busatu naye wamusongwele, byonkabyo bonse batanu na babiji, ne abo bafwile ne kusha baana ne.

³² Kyapeleleko ne mwanamukazhi naye wafwile.

³³ Onkao mambo mu lusanguko ukekala muka ng'anyi? Mambo bonse batanu na babiji bamusongwele?”

³⁴ Kabiji Yesu wibambijile amba, “Baana bamu ino myaka basongola, ne kusongolwa,

³⁵ pakuba aba bo baketaba amba bafwainwa kufika ku yoya myaka ne ku lusanguko lwa mu bafu, abo kechi bakasongola nangwa kusongolwa ne.

³⁶ Mambo abo kechi bakonsha kufwa jibiji ne, mambo baesakana pamo na bamalaika; kabiji bo baana ba Lesa, byo baji baana ba lusanguko.

³⁷ Bino mambo a bafu byo basanguka, ne aye Mosesa wamwesheshe byonkabyo ponka poanemba na mambo a kipuupu byo amutela Nkambo amba, Lesa wa Abulahama, ne Lesa wa Izaka, ne Lesa wa Yakoba.

³⁸ Pano aye kechi ye Lesa wa bafu ne, poso wa bomi, mambo kwi aye bonse bo bomi.”

³⁹ Banembeshi bamo ba ambile amba, “Mufunjishi, wa amba bulongo.”

⁴⁰ Mambo bachiine kumwipuzha mepuzho akwabo.

Kilishitu ye mwana Davida nyi?

⁴¹ Kabiji Yesu wibambijile amba, “Nanchi bamba byepi byo bamba amba, Kilishitu ye mwana Davida?

⁴² Mambo aye mwine Davida mu Buku wa Masalamo wa amba amba, “Nkambo wa ambijile Nkambo yami amba, Ikala ku kilujo kyami,

⁴³ poso ngalule balwanyi bobe ke kyakutulapo maulu obe.

⁴⁴ Byonkabyo Davida wamutelele amba, ‘Nkambo.’ Leelo kabiji ye mwananji byepi?”

Yesu wibajimuna na mambo a bafunjishi ba mizhilo

⁴⁵ Ne aye wibambijile baana banji babwanga bantu bonse kasa ba bena kuteleka,

⁴⁶ “Jimukai na banembeshi, batemwa kupitang'ana mu mikangyo yalepa, ne kutemwa lwimu mu bisankane, ne bipona bya buneme mu mashinagoga, ne bifulo bya buneme ku bijiilo;

⁴⁷ bo bangata mazubo a banabakazhi bafwilwa, ne na mambo a kwimwesha ku bantu amba bawama, balepesha milombelo yabo! Abo bakamona luzhachisho lwakila.”