Luka 18 - KNTP

Kishimpi kya mutonyi ne mwanamukazhi wafwilwa

¹ Kabiji aye wibatayile kishimpi mu kwibabuula amba bafwainwa kulomba moba onse ne kukooka ne.

² Wa ambile amba, “Mu muzhi umo mwajinga mutonyi wabujile kwakamwa Lesa nangwa kunemeka muntu ne.

³ Kabiji mwajinga ne mwanamukazhi wafwilwa mu yewa muzhi waishilenga javula na kumwambila amba, ‘Banchibile mambo nayewa ye twikenda nanji!’

⁴ Pakuba aye mutonyi wakikainenga moba amo, bino panyuma wiambijile mwine amba, ‘Nangwa mbula kwakamwa Lesa, nangwa kunemeka muntu ne,

⁵ bino na mambo onka a uno mwanamukazhi wafwilwa wankatazha, nkamuchibila mambo anji, kuchiina amba wakankokesha na kwiyaiya kwanji!’”

⁶ Kabiji aye Nkambo wa ambile amba, “Umvwai akya kya ambile mutonyi wabula koloka.

⁷ Nanchi, aye Lesa kechi ake bachibile nsambu banji boasalulula bamujijila mute ne bufuku, nangwa wabanda kwibakwasha nenyi?

⁸ Nemubuula namba, ukebachibila nsambu bukiji. Bino Mwana Muntu byo akeya kana ukataana lwitabilo pano pantanda nyi?”

Kishimpi kya mufaliseo ne musonkeshi

⁹ Yesu watayile ne kino kishimpi ku bamo beketekejile bene amba, bo baoloka, ne kulengulula bonse bakwabo.

¹⁰ Amba, “Banabalume babiji bakanjijile mu nzubo ya Lesa na kulomba; umo Mufaliseo ne mukwabo musonkeshi.

¹¹ Mufaliseo waimene ne kulombatu byanji mwine amba, ‘Lesa, nemusanchila, mambo amiwa kechi nji pamo na bantu bakwabo ne, bangata bya lunkanankana ne, nangwa na babuula koloka ne, nangwa na bankende ne, nangwa na ye uno musonkeshi ne.

¹² Amiwa nzhikilwa na nzala jibiji mu mulungu umo, ndambula bifikizha mu bujikumi mu byonse byo mmona.’

¹³ Pakuba aye musonkeshi, byo aimene kwalepa, ne kusaka nangwa kwinuna meso anji kwiulu ne, wipuminenga pa kyaji kyanji amba, ‘Lesa, mungubile lusa, ne ndengamambo!’”

¹⁴ “Nemwambila namba, uno musonkeshi wabwelele kwanji ku nzubo kasa abingishiwa, kukila Mufaliseo. Mambo awa witumbijika mwine ukapelulwa, bino awa wipelula ukatumbijikwa.”

Yesu byo ebapesheshe baana bacheche

¹⁵ Kabiji baletele baana ba bacheche amba, ebabike maboko. Pakuba baana banji babwanga pa kwikimona bebakainye,

¹⁶ Bino Yesu wibechile ko aji, amba, “Balekai baana ba bacheche beye kwi amiwa, kwibakanya ne, mambo bufumu bwa Lesa bo bwabo baji bibye.

¹⁷ Kine nemwambila namba, awa wabula kutambula bufumu bwa Lesa pamo nobe mwana wa mucheche, kechi akatwelemo nangwa pachechetu ne.”

Mwanamulume munonshi

¹⁸ Kabiji umo ndamakyalo wamwipwizhe amba, “Mufunjishi wawama, nanchi ikika kyo nafwainwa kuuba namba ntambule bumi bwa myaka?”

¹⁹ Kumvwa Yesu wamwambijile amba, “Mambo ka mwantelela amba wawama? Kafwako wawama ne posotu yenka Lesa.

²⁰ Anweba mwayuka mizhilo, kuuba bukende ne, kwipayang'ana ne, kwiba ne, kubepela mukwenu ne, nemeka bashobe ne bainobe.”

²¹ Kumvwa aye amba, “Abye byonse nebilaminenga kufuma ne ku bwanyike bwami.”

²² Yesu pakumvwa byobyo, wamwambijile amba, “Kuji kintu kimo kyo mwabulwa. Kapoteshai byonse byo muji naabyo ne kupana ku balanda, kabiji mukekala na nsabo mwiulu, kabiji mwiye mundondele.”

²³ Pakuba aye byo a umvwine byobyo, ne ku muchima bwi, mambo wajinga munonshi mwine.

²⁴ Ne Yesu pa kumutala wa ambile na bulanda amba, “Kyakatazha bingi banonshi kutwela mu bufumu bwa Lesa!

²⁵ Mambo kyapeela ngamela kupita mu jiso ja nguya kukila munonshi kutwela mu bufumu bwa Lesa.”

²⁶ Abo ba umvwine byobyo, ba ambile amba, “Nanchi ng'anyi wakonsha kupuluka?”

²⁷ Pakuba aye amba, “Bibula kukonsheka kubiwa ku bantu byakonsheka kubiwa na Lesa.”

²⁸ Kumvwa Petelo amba, “Talai, atweba twasha mazubo etu ne kwimulondela.”

²⁹ Ne Yesu wibambijile amba, “Kine ne mwambila namba, kafwako muntu washa nzubo, nangwa mukazhi, nangwa balongo, nangwa bansemi, nangwa baana, na mambo a bufumu bwa Lesa,

³⁰ ukabula kutambula byavula byakila mu kino kimye, kabiji ne mu myaka ikeya, namo bumi bwa myaka.”

Yesu byo a ambile jabusatu mambo a lufu lwanji

³¹ Ne aye Yesu wasendele ba jikumi na babiji, wibambijile amba, “Talai, tubena kuya ku Yelusalema, ne bintu byonse byanembelwe ku bangauzhi bikamufikila Mwana Muntu.

³² Mambo bakamupana ku Bangentila, ne kumwendeleka, ne kumuyanjisha, ne kumushipila mate.

³³ Kabiji pa kupwisha kumututaula bakamwipaya, bino mu juba ja busatu ukasanguka.”

³⁴ Bino baana banji babwanga kechi bebikwatakenye nangwa kimo ne. Mambo kino kyambo kyafyamikile kwi abo, ne kwikiyuka akya kyaambilwe ne.

Yesu byo abukile mpofu wa lulombo

³⁵ Kabiji ponkapo, byo afwenyenye kwipi na Yeliko, mpofu umo waikele ku jishinda saka alomba bintu.

³⁶ Ne pakumvwa jibumba kasa jipita, waipwizhe amba, “I kika kyo?”

³⁷ Ba mubujile amba, “Yesu mwina Nazala ubena kupita.”

³⁸ Ponkapo aye wabijikile amba, “Yesu, Mwana Davida, ngubilai lusa!”

³⁹ Ne abo batangijile kulutwe ke bamukanye amba azhindame. Pakuba aye wabijikishetu amba, “Mwana Davida, ngubilai lusa!”

⁴⁰ Ponkapo Yesu waimene, ne kwibakambizha amba bamuleete koaji. Kabiji byo afikile pepi, wamwipwizhe amba,

⁴¹ “Lelo ikika kyo musaka amiwa kwimubila?” Kumvwa aye amba, “Nkambo, nasaka namba mmone jibiji.”

⁴² Kumvwa Yesu wamwambijile amba, “Tambulai meso; mwabukwa na mambo a lwitabilo lwenu.”

⁴³ Kabiji ponkapotu aye watambwile meso, kamulondele na kutumbijika Lesa. Ne bantu bonse, pa kwikimona, batotele Lesa.