Luka 17 - KNTP

Byambo bimo bya Yesu

¹ Ne aye wibambijile baana banji babwanga amba, “Kechi kyaswishiwa bibwezha mu nyuma bibulenga kufika ne, bino malwa kwiyewa wibileta!

² Kyamufwainwa aye kumukashila jibwe ja kupelapo mu nshingo yanji ne kutayiwa mu kalunga ka mema kukila kulengela kamo ka mutuno twana twa tucheche kwitutuntwisha.

³ Onkao mambo iketai anweba bene!” “Umvwe mulongo obe walengamambo, umulengulule, kabiji umvwe walapila, mulekelai mambo.

⁴ Kabiji umvwe wa kulenga mambo jitanu na jibiji mu juba jimo, kabiji jitanu na jibiji, wabwela ko uji amba, ‘nalapila,’ mwafwainwa kumulekela mambo.”

Lwitabilo

⁵ Batumwa ba ambile kwi Nkambo amba, “Baishai lwitabilo lwetu!”

⁶ Ne Nkambo wa ambile amba, “Inge mwajinga na lwitabilo nobe ka jipeke ka Masitate, mwakonsha kwambila kino kichi kya malubenyi amba, ‘Zhujika, ujimbwe mu mema a mu kalunga,’ kabiji ki ke mukookela anweba.”

Mingilo ya kalume

⁷ “Ng'anyi mwi anweba uji na kalume ubena kujima nangwa ubena kulama mikooko pa kufuma ku majimi umwambila amba, ‘Iya ponka pano wikale uje?’

⁸ Ne kumwambila amba, ‘Nengezhai jimo bya kuja byami, uvwale ne bulongo, ne kung'ingijila byo mbena kuja ne kutoma, ne pa kupwisha bino uje ne kutoma?’

⁹ Kana umusanchila kalume mambo wauba byo akambizhiwa nyi?

¹⁰ Byonkabyo ne anweba, pa kupwisha kuuba byonse byo mwa kambizhiwa, mwambe amba, ‘Twi bakalume baatu, twaubatu byonkabya byo twafwainwa kuuba.’”

Kubukwa kwa bambumba jikumi

¹¹ Kabiji byo bayilenga ku Yelusalema, aye wapichilenga mu mupaka aku Samaliya aku Ngalilea.

¹² Kabiji byo atwelele mu muzhi umo wasambakene banabalume jikumi bambumba. Baimene kwalepa

¹³ ne abo basanswile mawi abo amba, “Yesu, Nkambo, tubilai lusa!”

¹⁴ Byo ebamwene wibambijile amba, “Yainga mukemweshe ku bang'anga.” Ne byo bayilenga babukilwe.

¹⁵ Ne umo wa mwi abo, pa kumona byo a bukiwa wabwelele, katumbijike Lesa na jiwi jikatampe.

¹⁶ Ne kupona waponene ku maulu a Yesu ne kumusanchila. Uno muntu wajinga mwina Samaliya.

¹⁷ Ne Yesu wa ambile amba, “Nanchi kechi bajinga jikumi babukwa nenyi? Pakuba batanu na baana baji pi?

¹⁸ Mambo ka uno ungi ye yenka wabwela na kupana lukumo kwi Lesa?”

¹⁹ Ne aye wamwambijile amba, “Imanai muyenga kwenu, lwitabilo lwenu lwimupulusha.”

Kwiya kwa bufumu bwa Lesa

²⁰ Kabiji Bafaliseo bamwipwizhe kimye kikeya bufumu bwa Lesa. Aye wibakumbwile amba, “Bufumu bwa Lesa kechi bwiya na bimwesho bimweka ku meso ne,

²¹ nangwa kechi bakamba amba, ‘Talai buji kuno!’ Nangwa, ‘Kokwa!’ Mambo talai, bufumu bwa Lesa buji mukachi kenu.”

²² Ne aye wibambijile baana banji babwanga amba, “Moba abena kwiya mo mukasaka kumona juba jimo ja Mwana Muntu, kabiji kechi mukejimona ne.

²³ Kabiji bakemwambila amba, ‘Talai, kokwa!’ Nangwa amba, ‘Talai, kuno!’ Kechi mukayeko nangwa kwibalondela ne.

²⁴ Mambo byonka byuba kubeesha kwa mvula byo abeesha kuntu kumo mwiulu kwamweka ne konse kukwabo mwiulu, byonkabyo ne Mwana Muntu byo akooba mu juba janji.

²⁵ Pakuba patanshi wafwainwa amone bya malwa byavula ne kumukana ku kino kisemi.

²⁶ Kabiji byonka byo kyajinga mu myaka ya kwa Nowa, byo byo kikekala ne mu myaka ya Mwana Muntu.

²⁷ Bajiilenga ne kutoma ne kusongola ne kusongolwa, kufika ne ku juba joatwelele Nowa mu bwato, ne muyuulo waishile ne kwibonauna bonse.

²⁸ Kabiji byonka byo kyaubilwe mu myaka ya Lota; bajiilenga ne ku toma, bapotelenga ne kupotesha, kujima ne kushimika,

²⁹ bino mu joja juba joafumine Lota mu Sodoma, kwa ponene mujilo kufuma mwiulu ne kibiliki ne kwibonauna bonse.

³⁰ Byo byo kikekala ne mu juba ja Mwana Muntu byo akamweka.”

³¹ “Mu joja juba awa ukekala peulu pa mutenge bintu byanji kasa biji mu nzubo, kechi akekile kwiya na kwibifumyamo ne, byonkabyo ne yewa uji mubujimi kechi akabwele ne.

³² Langulukai muka Lota!

³³ Awa usaka kupulusha mweo wanji ukamutaya, bino awa ukataya mweo wanji ukamulama.

³⁴ Nemubuula namba, mu bobwa bufuku kukekala babiji pa mwanya umo. Umo bakamusenda ne mukwabo bakamusha.

³⁵ Kukekala banabakazhi babiji bakapelanga pamo. Umo bakamusenda ne mukwabo ukashala.

³⁶ Banabalume babiji bakengilanga mu bujimi; umo bakamusenda, ne mukwabo bakamusha.”

³⁷ Ne abo baana babwanga bamwipwizhe amba, “Kwepi, Nkambo?” Kepo Yesu ebambijile amba, “Konka kuji mubiji wafwa, ko kukapwilakena makubi.”