Luka 16 - KNTP

Kalama wabula bukishinka

¹ Yesu wa ambile ku baana banji babwanga amba, “Kwajinga muntu umo munonshi wajinga na kalama, ye balobejilemo amba, ubena kutayaula nsabo yenu.

² Ne aye wamwichile ne kumwambila amba, ‘Lelo ikika kyo na kumvwina? Pano umbuule byonse bya mu bukalama bobe, mambo pano kechi usa kukikala kalama wami ne.’

³ Ne kalama wiambijile mwine amba, ‘Lelo ngube byepi byo asaka kumpanga nkambo pa mwingilo wami? Kechi nji na ngovu ya kujima ne, kabiji nji na bumvu pa kulomba.

⁴ Nalanguluka bya kuuba, namba byo bakampanga pa bukalama, bantu bakantambule mu ma nzubo abo.’”

⁵ “Byonkabyo, waichile umo umo bonse bajinga na nkongole kwi nkambo yanji, wa ambijile mutanshi amba, ‘Uji na nkongole inga kwi nkambo yami?’

⁶ Kumvwa aye amba, ‘Kitoota kimo kya bandundundu ba manyi.’ Ne aye wamwambijile amba, ‘Tambula kyete kyobe kya nkongole, wikale panshi bukiji ne kunembapo makumi atanu.’

⁷ Kabiji wa ambijile ne mukwabo amba, ‘Ne obewa uji na nkongole inga?’ Wa ambile amba, ‘Kitoota kimo kya masaka a kajo.’ Wamwambijile amba, ‘Tambula kyete kyobe, unembe makumi atanu na asatu.’”

⁸ “Kabiji nkambo yanji wamutotele awa kalama wabula koloka mambo waubile kya bujimuku. Mambo baana ba pano pantanda mukisemi kyabo bebakila kujimuka baana ba kyeya.”

⁹ “Kabiji nemwambila namba, lengai balunda na nsabo yabula koloka, namba byo ikapwa bakemutambwile mwa kwikala myaka.

¹⁰ Awa waikala wakishinka mutucheche ye waikala wakishinka ne mu byavula, ne yewa wabula kwikala wakishinka mutucheche ye wabula kwikala wakishinka ne mu byavula.

¹¹ Kabiji byonkabyo umvwe mwabula kwikala bakishinka na nsabo yabula koloka, ng'anyi ukemuketekela ne kwimupa nsabo ya kine?

¹² Kabiji umvwe mwabula kwikala bakishinka na kya ungi, ng'anyi ukemupa byenu anweba bene?”

¹³ “Kafwako muzha wakonsha kwingijila bankambo babiji ne, mambo ukashikwapo umo, ne kutemwapo mukwabo, nangwa ukepana ku umo ne kusuula mukwabo. Kechi mwakonsha kwingijila Lesa ne nsabo ne.”

Bimo bya ambile Yesu

¹⁴ Bafaliseo batemwa mali, byo baumvwine bino bintu byonse, abo bamwendelekele.

¹⁵ Ne aye wibambijile amba, “Anweba mwi boba bebingisha abo bene ku meso a bantu, bino Lesa wayuka michima yenu. Mambo akya kyanemekwa ku bantu kyokya bunya ku meso a Lesa.”

¹⁶ “Mizhilo ne bangauzhi bajingako kufika ne kimye kya kwa Yoano, kufuma ku kyo kyo kimye Mambo Awama a bufumu bwa Lesa abena kusapwilwa, ne bonse babena kutwela monka na mukoyo.

¹⁷ Kyapeela jiulu ne ntanda kupita kukila nangwa kakinshabu ka mu buku wa Mizhilo kaapita.”

¹⁸ “Awa ukana mukazhanji ne kusongola mukwabo wauba bukende, ne awa wasongola ye bakana ku mwata wanji wauba bukende.”

Munonshi ne Lazalasa

¹⁹ “Kwajinga muntu umo munonshi wavwajilenga bivwalo bichila ne bya linenyi wa wamisha ne kusangalala mu byawama moba onse.

²⁰ Ne umo mulanda jizhina janji Lazalasa watujilwenga pa kibelo kyanji, mubiji kasa akumbana bilonda,

²¹ wasakile kuja kutupona ku tebulu wa munonshi. Byonkabyo, ne bakabwa baishilenga na kumyanga pa bilonda byanji.

²² Mulanda wafwile kabiji bamalaika bamutwajile mu kyaji kya Abulahama. Munonshi naye wafwile ne kumuzhiika bamuzhiikile,

²³ kabiji monka mu Kalunga wainwine meso anji kasa amanama, ne kumona wamwene Abulahama kwalepa, ne Lazalasa mu kyaji kyanji.

²⁴ Kabiji wabijikile amba, ‘Taata Abulahama! Ngubilai lusa mutume Lazalasa atumpe nsongo ya munwe wanji mu mema ne kuntalazha pa lujimi wami mambo namanama mu luno lubeebe lwa mujilo!’”

²⁵ “Pakuba Abulahama wa ambile amba, ‘Obewa mwana, languluka byo wajinga mumi watambwile byobe byawama, kabiji byonkabyo aye Lazalasa watambwile byatama. Pakuba pano aye watekeneshiwa, ne obewa uji mu lumanamo.

²⁶ Kabiji kuji kikwabo, pakachi ketu ne obewa, paji kimbo kyazhika kyakatazha amba, basaka kufuma kuno ne kwabukila ko uji kechi bakonsha ne, kabiji baji kooko nabo kechi bakonsha kwabukila kuno kotuji ne.’

²⁷ Ne aye munonshi wa ambile amba, ‘Nanchi ne musashijila, taata Abulahama, mutumai ku nzubo ya bataata,

²⁸ mambo nji na balongo bami batanu. Namba ake bajimune, kuchiina amba ne abo bakeya muno mu lumanamo.’

²⁹ Bino Abulahama wa ambile amba, ‘Baji na Mosesa ne bangauzhi ba Lesa, bebomvwe.’

³⁰ Ne aye munonshi amba, ‘Ine, taata Abulahama, inge kuye umo wafuma mu bafu, bakalapila.’

³¹ Abulahama wa ambile amba, ‘Inge ne kwibomvwa ba Mosesa ne bangauzhi ne, kechi baketabizhiwa nangwa umo wasanguka mu bafu ne.’”