Luka 11 - KNTP

Yesu byo afunjishe pa milombelo

¹ Juba jimo Yesu byo alombelenga kuntu kumo, pa kupwisha, umo wa mu baana banji babwanga wamwambijile amba, “Nkambo, tufunjishai kulomba byonka byo afunjishe Yoano baana banji babwanga.”

² Kumvwa aye amba, “Pa kulomba, mwambe amba, “Taata, jizhina jenu jizhile; Bufumu bwenu bufike.

³ Mwitupeko kajo ketu ka pa juba pa juba.

⁴ Kabiji mwitulekeleko mambo etu, mambo atweba bene twibalekela bonse betulenga mambo. Kabiji kechi mwitutwale mu lweseko ne.”

⁵ Kabiji aye wibambijile amba, “Lelo nanchi ng'anyi mukwenu uba umvwe uji na mulunda nanji waya ko aji pakachi ka bufuku, ne kumwambila amba, mulunda nami, mpaipo bashinkwa basatu.

⁶ Mambo mulunda nami wafuma pa lwendo wafikila kwami, nabula bya kumupa!

⁷ Kabiji uji mukachi wakumbula amba, ‘Kunkatazha ne! Nashinkako kala kinzhilo, nji pa mwanya na baana bami. Kechi nakonsha kubuuka na kwimupa ne’.

⁸ Amiwa nemwambila namba, nangwa wakana kubuuka na kumupa na mambo a bulunda, pakuba na mambo a kusakisha na mukooyo, ukabuuka ne kumupa byonse byo asaka.

⁹ Ne amiwa nemwambila anweba namba; lombainga mukatambula, kebainga mukekimona, konkoshainga bakemushinkwilako.

¹⁰ Mambo yense ulomba utambula; ukeba naye wikimona; ukonkonsha naye bakamushinkwilako.

¹¹ Ng'anyi nsemi uji na mwana, umvwe mwananji wamulomba shinkwa wamupa jibwe? Nangwa walomba jisabi wamupa mulolo?

¹² Nangwa walomba jike wamupa kaminye?

¹³ Byonkabyo umvwe anweba babi, mwayuka kupana byawama ku baana benu, nanchi aye Shenu wa mwiulu kechi akemukile mu kupana Mupashi Wazhila ku bamulomba nenyi?”

Yesu ne Belezebuba

¹⁴ Kabiji aye wapangilengamo mudemona mu muntu wajinga kamama, mudemona pakufumamo, aye kamama ke ambe, ne mabumba akuminye.

¹⁵ Bino bamo amba, “Upangamo bademona na Belezebuba, mfumu wa bademona.”

¹⁶ Kabiji bakwabo nabo pa kumweseka, ke bamulombe kiyukilo kya mwiulu.

¹⁷ Bino aye byo ayukile milanguluko yabo, wibambijile amba, “Bufumu bonse bwialukila bwine bonaika, ne kisaka kialukila kine kyonaika.

¹⁸ Kabiji umvwe Satana naye wialukila mwine, bufumu bwanji bukekala byepi? Byo mwa amba amba, mpangamo bademona na Belezebuba.

¹⁹ Kabiji umvwe mpangamo bademona na bulume bwa Belezebuba, nanchi baana benu bebapangamo na bulume bwa kwa ng'anyi? Onkao mambo kyo kyo basakwikajila ke ba mitonyi benu.

²⁰ Amiwa byo mpangamo bademona ku bulume bwa Lesa, nanchi pano bufumu bwa Lesa bwaiya pe anweba.”

²¹ “Inge kilobo wavwala byela byonse bya nkondo ne kulama nzubo yanji mwine, bintu byanji bikalatu bulongo.

²² Bino umvwe wamukila bulume waiya ne kumushinda, wamwangata byela byanji byonse byo aketekejilemo kabiji wibyabanya bintu byanji.”

²³ “Awa wabula wa kwami ye mulwanyi wami; kabiji awa wabula kubungizha pamo ne amiwa, ye upalang'anya.”

Mupashi wabiipa byo abwela

²⁴ “Mupashi wabiipa byo afuma mu muntu upitang'ana kwabula mema na kusaka pa kukokolokela, byo abula kwipataana, wa amba amba nanchi nsakubwela monka mu nzubo yami yo nafuminemo.

²⁵ Kabiji byo aiya watana bapyangamo ne kunengezhamo.

²⁶ Ponkapo uya nakuletelapo bapashi bakwabo batanu na babiji bamukila mu kubipa, kabiji batwela ne kwikala monka. Ne bwikalo bwapelaako bwa yewa muntu bwakila butanshi mu kubipa.”

Lusekelo lwa kine

²⁷ Byo a ambile bino bintu, umo mwanamukazhi wa mu jibumba wasanswile jiwi janji amba, “Jatokwa aja jivumo jimusemene, ne aa mabele o mwaaminweko!”

²⁸ Bino aye amba, “Batokwa bonkaba bomvwa mambo a Lesa ne kwialama.”

Kusaka kiyukilo

²⁹ Mabumba byo apwijilenga, aye watatwile kwiambila amba, “Kino kisemi kyatama kikeba kiyukilo, bino kafwako kiyukilo kyobakebapa, poso kyonkakya kiyukilo kya Yona.

³⁰ Mambo Yona byonka byo a alukile ke kiyukilo kubena Ninevwa, byonkabyo ne Mwana Muntu naye byo akekala ku kino kisemi.

³¹ Mfumu wamukazhi wa ku kabeta ka ku bulenge ukemana mukije na bantu ba mukino kisemi, ne kwikizhachisha; mambo aye wafumine kwapela ntanda kwiya na kumvwa maana akwa Solomone; kabiji talai, aye wamukila Solomone uji ponka pano.

³² Banabalume bena Ninevwa bakemana mukije na kino kisemi, ne kwikizhachisha, mambo abo balapijile pa kusapwila kwa Yona; kabiji talai, wamukila Yona uji ponka pano!”

Lampi wa mubiji

³³ “Kafwako muntu uba, pa kwambula lampi wamutuula kuntu kwafyamika, nangwa munshi ya kilukwa ne, poso ponka pa kitulwapo lampi amba, batwelamo bamone kyeya.

³⁴ Jiso ye lampi wa mubiji. Kana jiso jobe jijitu ne mubiji wobe yense naye usakwikala mu kyeya; bino umvwe jatama, ne mubiji wobe naye uji mu mfishi.

³⁵ Onkao mambo ujimuke apo akya kyeya kiji mobe yo mfishi.

³⁶ Bino umvwe mubiji wobe yense watoka, kafwako ne poafichila ne, yense ukekala watoka, pamo nobe lampi byo asaamisha ne kukupa kyeya.”

Yesu byo ebanenene bafaliseo ne bafunjishi ba mizhilo

³⁷ Byo akyambilenga, umo Mufaliseo wamwichile amba aje nanji; kabiji watwelele ne kwikala na kuja.

³⁸ Mufaliseo wakuminye byo amwene amba kechi waowele kumaboko kasa akyangye kuja ne.

³⁹ Ponkapo Nkambo wamwambijile amba, “Pano anweba Bafaliseo movwatu pangye ya katomeno ne muchiba; pakuba mukachi kenu mwayula butanyi ne bubi.

⁴⁰ Anweba bilubi! Nanchi awa walengele bya pangye, kechi ye walengele ne bya mukachi nenyi?

⁴¹ Bino panai ku balanda abya biji mukachi, kabiji ponkapo byonse bisakutoka kwi anweba.”

⁴² “Malwa enu, anweba Bafaliseo! Mambo mulambula bifikizha mu bujikumi mu minti ne mu tuluu, ne mu misango yonse ya bishu, bino mwaleka bunchiba mambo bwaoloka ne butemwe bwa Lesa, mambo bino byo byo mwafwainwa kuuba, ne bikwabo nabyo kechi mwafwainwa kwibileka ne.”

⁴³ “Malwa enu anweba Bafaliseo! Mambo mwatemwa bipona bya buneme bya mu mashinagoga, ne lwimu lwa pa bisankanyi.

⁴⁴ Malwa enu! Mambo mwapashang'ana na bilende byabulwa kayukilo, ne bantu bapitapotu kwakubula kuyuka ne.”

⁴⁵ Ponkapo umo mufunjishi wa mizhilo wa ambile amba, “Mufunjishi, byo mwa amba byobyo mwitunena ne atweba pamo!”

⁴⁶ Kumvwa aye amba, “Malwa enu ne anweba bafunjishi ba mizhilo! Mambo mwatwika bantu bisendwa byakatazha kusenda, ne anweba bene ne kukwatako nangwa na munwe wenu umo ku byobya bisendwa ne.

⁴⁷ Malwa enu! Mambo mushimika bya pa bilende bya bangauzhi ba Lesa, bo baipayile ku bashakulu benu.

⁴⁸ Nanchi mwi batumonyi kabiji mwaitabizha byubilo bya bashakulu benu, mambo abo bebepayile, ne anweba mwashimika bya pa bilende byabo.

⁴⁹ Onkao mambo maana a Lesa a ambile amba, nkebatumina bangauzhi ne batumwa, kabiji bamo bakebepaya, ne kwibapata.

⁵⁰ Namba kino kisemi bakekikebela mashi a bangauzhi ba Lesa bonse aichikile ne kufuma ku ntendekelo ya pano pantanda,

⁵¹ kufuma ku mashi akwa Abela kufika ne ku mashi akwa Zakaliya, yenkawa wafwijile pakachi aku kyakusokelapo bitapisho aku nzubo ya Lesa. Kine, nemwambila namba, bakekikebela kino kisemi.”

⁵² “Malwa enu anweba bafunjishi ba mizhilo! Mambo mwafumyapo kii wa maana. Kechi mwatwelamo anweba bene ne, kabiji aba basaka kutwelamo mwibashinkijile!”

⁵³ Kabiji Yesu pa kulupukamo, banembeshi ne Bafaliseo batatwile kumuneena ne kumukanjikizha na mukoyo amba ambe byavula.

⁵⁴ Bamubelamijile amba, bakwate kyambo kisakufuma mu kanwa kanji.