Luka 10 - KNTP

Yesu wibatuma baana babwanga makumi atanu na abiji

¹ Pakupita bibye aye Nkambo watongwele banabalume bakwabo makumi atanu na abiji ne kwibatuma babiji babiji, kutangilapo kulutwe yanji ku mizhi yonse ne ku mapunzha onse koasakile kufika aye mwine.

² Ne aye wibambijile amba, “Bujimi bwa kunowa bwabayisha, pakuba bamingilo bakepa. Onkao mambo lombai ku mwina bujimi atume bakwingila mu bujimi bwanji.

³ Yainga! Talai, mbena kwimutuma nobe baana ba mikooko mukachi ka misuka.

⁴ Kechi musende kikwama kya mali ne, nangwa fukuta ne, nangwa makwabilo ne; kabiji kechi mwimune nangwa umo pa jishinda ne.

⁵ Kimye kyonse inge mwatwela mu nzubo, mukambe amba, ‘Mutende ekale mu ino nzubo!’

⁶ Kabiji inge mwana wa mutende mo aji, mutende wenu ukekala po aji. Bino inge ufwamo, mutende ukemubwelela anweba bene.

⁷ Kabiji mukekale monka mu yoya nzubo na kuja ne kutoma byo bakemumwena, mambo wamwingilo wafwainwa mfweto yanji. Kechi mutantauke ma nzubo ne.

⁸ Kabiji bimye byonse umvwe mwatwela mu muzhi kabiji bemutambwila, mukajenga byonkabya byo bemuletela.

⁹ Kabukai bakolwa baji mu yewa muzhi ne kwibambila amba, ‘Bufumu bwa Lesa bwafwenya pepi ne anweba.’

¹⁰ Bino bimye byonse byo mukatwela mu muzhi kana ne kwimutambula ne, mukaye mu mikwakwa yayo ne kwamba amba,

¹¹ ‘Nangwa lukungu lwa mu muzhi mwenu lwa kakachila ku maulu etu twimukunchilalo. Nangwa byonkabyo yukai kino amba, Bufumu bwa Lesa bwa fwenya pepi.’

¹² Nemwambila namba, bya malwa bya Sodoma pa joja juba bikakepako kukila bya yewa muzhi!

Mizhi yabujile kulapila

¹³ “Malwa obe, Kolazeni! Malwa obe, Betesaida! Mambo umvwe mingilo ya bulume yaingijilwe mwenu, inge yamwekele mu Tila ne mu Shidona, umvwe balapijile kala, ne kuvwala bisapi bya majilo ne kwipukula buto.

¹⁴ Pakuba bya malwa bya Shidona ne Tila bikakepako kechi bikesakana na byenu mu juba ja kije ne.

¹⁵ Ne obewa, Kapenama! Ukasuntulwa kufika mwiulu nyi? Bakakwikizha panshi.”

¹⁶ “Aye wimumvwa anweba waumvwa amiwa, ne aye wimukana anweba wakana ne amiwa, ne aye wankana amiwa wakana ne wantumine.”

Kubwela kwa makumi atanu na abiji

¹⁷ Kabiji aba makumi atanu na abiji babwelele na lusekelo amba, “Nkambo, ne bademona betukookela atweba mu jizhina jenu!”

¹⁸ Ne aye wibambijile amba, “Namwene Satana byo aponene kufuma mwiulu nobe kubeesha kwa mvula.

¹⁹ Talai, nemupa luusa lwa kunyanta milolo ne tuminye, ne kushinda bulume bonse bwa mulwanyi, kabiji kafwako kikemukozha ne.

²⁰ Nangwa byonkabyo kechi musekele mambo bademona bemukookela ne, sekelai mambo mazhina enu anembwa mwiulu.”

Kusekela kwa Yesu

²¹ Pa kyonkakya kimye Yesu wasekejile mu Mupashi Wazhila ne kwamba amba, “Nemutota anweba Taata, Nkambo wa mwiulu ne pano panshi, mambo mwibifiile bino bintu ku bamaana ne ku bamilangwe ne kwibisolola ku baana ba bacheche; mo monka, Taata, mo kimuwamina anweba bene.

²² “Bataata bampele amiwa bintu byonse, kabiji kafwako nangwa umo wamuyuka Mwana byo aji ne, kanatu bonka Bataata, nangwa wayuka Bataata byo baji ne, kana yenka Mwana, ne boba bantu bo aswa Mwana kwibasolwelaye.”

²³ Ponkapo Yesu waalulukijile ku baana babwanga ne kwamba bufyamfya amba, “Atokwa meso amona byo mubena kumona!

²⁴ Mambo ne mwambila namba bangauzhi bavula ne ba mfumu basakile kwibimona byo mubena kumona, bino kechi bebimwene ne, ne kumvwa byo mubena kumvwa, bino kechi bebyumvwine ne.”

Kishimpi kya mwina Samaliya wawama

²⁵ Kabiji ponkapo umo mufunjishi wa mizhilo waimene, na kumweseka amba, “Mufunjishi, nanchi ikika kyo nafwainwa kuuba namba ntambule bumi bwa myaka?”

²⁶ Ne aye wamwambijile amba, “Kyanembwa amba ka mu Buku wa Mizhilo? Nanchi mutanga byepi?”

²⁷ Kumvwa aye amba, “Ukamutemwa Nkambo Lesa wobe na muchima wobe yense, ne na mweo wobe yense, ne na bulume bobe bonse, ne na maana obe onse; ne mukwenu byonka byowitemwa obewa mwine.”

²⁸ Kumvwa aye amba, “Mwa amba bulongo; ubai bibye ne bumi mukebumona.”

²⁹ Pakuba aye, mambo a kusaka kwibingisha mwine, wamwambijile Yesu amba, “Nanchi mukwetu ye ng'anyi?”

³⁰ Yesu wakumbwile amba, “Umo muntu wakunkulukile kufuma ku Yelusalema kuya ku Yeliko; ne aye bamubelamijile ku batupondo, bamuvujile bivwalo ne kumupuma ke baye, bamushiile pepi kufwa.

³¹ Kabiji ng'anga umo wa Lesa wakunkulukilenga mu jonkaja jishinda; ne byo a mumwene wapichile kunsa ya jishinda.

³² Byonkabyo ne mwina Levi, naye byo afikile ponka ne kumumona, wapichile kunsa ya jishinda.

³³ Pakuba mwina Samaliya umo, wajinga pa lwendo, wamutaine uno muntu. Ne byo a mumwene wamubijile lusa.

³⁴ Kabiji wayile ko ajinga, wamupombele pa bilonda byanji, waichijilepo ne manyi ne binyu; wamubikile ne panyama wanji mwine, ne kumuleeta ku nzubo ya bwenyi na kumulama.

³⁵ Ne juba jalondejilepo wasolwele mali ne kupana ku mwina nzubo amba, mu mulame, byonse bikwabo byo ake mujiila, amiwa pa kubwela nkemulubwilabyo.”

³⁶ “Mwalanguluka amba, ng'anyi wa mu bano basatu wamwesheshe amba wa kwanji awa ye bapumine ku batupondo?”

³⁷ Mufunjishi wa Mizhilo wakumbwile amba, “Yenkawa wamubijile lusa.” Yesu kepo a mwambijile amba, “Nanchi yainga mubenga byonkabyo.”

Maata ne Maliya

³⁸ Byo bayilenga, aye watwelele mu muzhi umo, ne mwanamukazhi umo jizhina janji Maata, wamutambwijile mu nzubo yanji.

³⁹ Ne aye wajinga na mulongo wanji, jizhina janji Maliya, ye waikajile ku maulu a Nkambo na kumvwa byambo byanji,

⁴⁰ pakuba Maata watabankene na mingilo; kabiji waishile kwamba amba “Nkambo, kechi mwatako muchima aye mulongo wami byo andekela mingilo bunke bwami nenyi! Mwambilai eye ankwasheko.”

⁴¹ Aye Nkambo wamukumbwile amba, “Maata, Maata! Obewa wabambisha muchima ne kutabankana na byavula,

⁴² bino kujitu kimo kyafwainwa. Pakuba Maliya wasalulula akya kyawama, kabiji kechi kikamwangatwa ne.”