Luka 1 - KNTP

¹ Anweba Teofilusa. Bavula baesekele kunemba mo byalondankena abya bintu bya fikizhiwa mwi atweba.

² Monka mo betubujilebyo abo bebimwene na meso kabiji bamwingilo wa Mambo Awama kufuma ku ntendekelo.

³ Kabiji kyangwamijile amiwa, byo ne bilondelelondele byonse ne kumvwa bulongo kufuma ku ntendekelo, nalangulukile kwimunembela mo bya londankena anweba kinemanga Teofilusa.

⁴ Namba muyukishetu amba, abya byambo byo mwafunjishiwe byo bya kine.

Kwambilwa jimo kwa kusemwa kwa Yoano Mubatishi

⁵ Mu myaka yakwa Heloda mfumu wa mu Yudea, kwajinga ng'anga wa Lesa, jizhina janji Zakaliya wa mukipamo kya Abiya. Ne mukazhanji wajinga wa mu baana ba Alona, jizhina janji Elizabeta.

⁶ Bubiji bwabo bajinga baoloka ku meso a Lesa, ba endelenga kwakubula mambo monka mu mikambizho ne mu mizhilo ya Nkambo.

⁷ Bino kechi bajinga na mwana ne, mambo Elizabeta wajinga ng'umba, ne bonse babiji bajinga bakote.

⁸ Juba jimo Zakaliya waingijilenga mwingilo wa bung'anga ku meso a Lesa mukipamo kyanji mokyalondankena.

⁹ Monka mwayijile kisela kya bung'anga, aye wasalulwilwe na bubale amba atwele mu nzubo ya Nkambo na kusoka bya kufutumuna.

¹⁰ Ne jibumba jonse ja bantu jalombelenga pangye pa kimye kya kusoka bya kufutumuna.

¹¹ Ponkapo kwamumwekejile malaika wa Nkambo kasa aimana ku kilujo kya kyakusokelapo bya kufutumuna.

¹² Ne Zakaliya byo a mumwene malaika, muchima wanji walukuchile, ne moyo wamukwachile.

¹³ Bino malaika wamwambijile amba, “Zakaliya kechi ube moyo ne, mambo milombelo yobe yaumvwanyika, ne mukazhobe Elizabeta uka kusemena mwana wamulume, ne obewa ukamutumba jizhina janji amba Yoano.

¹⁴ Ne obewa ukamona lusekelo ne kusangalala, ne bavula bakasekelela pa kusemwa kwanji!

¹⁵ Mambo aye ukekala mukatampe ku meso a Nkambo. Kabiji kechi ukutoma binyu nangwa bipendang'ana ne, ne aye ukayulwa na Mupashi Wazhila kufuma munda mwa inanji.

¹⁶ Ne aye ukebalulwila bavula bena Isalela kwi Nkambo Lesa wabo.

¹⁷ Kabiji ne aye ukatangilapo palutwe ya kwa Nkambo mu mupashi ne mu bulume bwa kwa Elaija, na kwalula michima ya bashabo ku baana, ne bamilengulwila amba bende mu maana a baoloka, amunengezhezhe jimo Nkambo bantu bo ba lumbulwila jimo.”

¹⁸ Ne Zakaliya wamwipwizhe malaika amba, “Lelo kino nkekiyukila kuka? Mambo amiwa ne mukote, ne mukazhami naye wakota.”

¹⁹ Ne malaika wamwambijile amba, “Amiwa yami Ngabaliela, ng'imana ku meso a Lesa, kabiji natumwa na kwisamba ne obewa, ne kukubuula ano mambo awama.

²⁰ Kabiji tala, obewa ukekala kamaama ubula kwamba kufika ne juba jo bikamweka bino bintu, mambo kechi waitaba byambo byami ne, abyo bikafikizhiwa mu kimye kyabyo.”

²¹ Ne bantu bamupembejilenga Zakaliya, bakuminye byo abanjile mu nzubo ya Lesa.

²² Byo alupukile, kechi wakonsheshe kwamba naabo ne, kabiji bayukile amba wamona kimwesho mu nzubo ya Lesa. Ne aye wibakebawilenga kasa aji kamaama.

²³ Kabiji kimye kyanji kya mwingilo byo kyapwile, wabwelele kwanji.

²⁴ Pakupita oa moba mukazhanji Elizabeta waimichile, ne kwifya wifiile mwine bang'ondo batanu amba,

²⁵ “Nkambo wangubila bibye mu moba o antala amiwa, wamfumya bumvu ku bantu!”

Kwambilwa jimo kwa kusemwa kwa Yesu

²⁶ Mu ng'ondo wa butanu na umo, Lesa watumine malaika Ngabaliela ku muzhi wa mu Ngalilea jizhina janji Nazala.

²⁷ Ku muzhike wakishinka wabula kusambakanapo na mwanamulume ye baipangwizhe ku mwanamulume jizhina janji Yosefwa, wa mu kisaka kya Davida. Ne jizhina ja uno muzhike wajinga Maliya.

²⁸ Ne aye malaika waishile kwi aye ne kwamba amba, “Mutende obewa watokwa bingi, Nkambo uji ne obewa!”

²⁹ Ne aye Maliya muchima wanji walukuchile bingi na bino byambo, ne kulanguluka amba, leelo luno lwimu lwayila muka?

³⁰ Ne malaika wamwambijile amba, “Kuuba moyo ne, Maliya, mambo waubilwa bibusa kwi Lesa.

³¹ Kabiji tala, ukemita mwana munda mobe kabiji ukasema mwana wamulume, ne obewa ukamutumba jizhina janji amba Yesu.

³² Aye ukekala ke mukatampe kabiji ukatelwa amba Mwana wa Mwine Wakila. Ne Nkambo Lesa ukamupa jitanda ja bufumu bwa shanji Davida,

³³ kabiji aye ukekala mfumu mu kisaka kya Yakoba myaka yonsetu, ne bufumu bwanji kechi bukapwa ne.”

³⁴ Ne Maliya wamwambijile malaika amba, “Kino kikamweka byepi, byo nabula kusambakanapo na mwanamulume?”

³⁵ Ne malaika wamukumbwile amba, “Mupashi Wazhila ukeya pe obewa ne bulume bwa Mwine Wakila bukakunyeng'amina onkao mambo awa mwana ukasemwa wazhila ukatelwa amba, Mwana Lesa.

³⁶ Kabiji tala, mulongo wobe Elizabeta naye mu bukote bwanji waimita mwana wamulume, ne uno ke ng'ondo wa butanu na umo yenkawa ye batelelenga amba ng'umba.

³⁷ Mambo aye Lesa kafwako kyo akankalwa ne.”

³⁸ Ne Maliya wa ambile amba, “Amiwa bano muzha wa Nkambo; kingubilwe amiwa monka mwayila byambo byenu.” Ne ponkapo malaika wamushiile ne kumusha.

Maliya byo amupempwile Elizabeta

³⁹ Mu onka a moba Maliya waimene kuya lubilo ku ntanda ya mu mintumba, ku muzhi wa mu Yuda.

⁴⁰ Kabiji watwelele mu nzubo ya kwa Zakaliya ne kumwimuna Elizabeta.

⁴¹ Ne Elizabeta byo a umvwine lwimu lwa kwa Maliya, ponkapo mwana wafunkiishe munda mwanji. Ne Elizabeta wayujilwe na Mupashi Wazhila,

⁴² ne aye wabijikile na jiwi jikatampe, ne kwamba amba, “Wakila mu kutokwa obewa mu banabakazhi, ne kipangwa kya munda mobe nakyo kyatokwa!

⁴³ Kabiji mambo ka kino kyaubiwa kwi amiwa, amba inanji Nkambo yami waiya kwi amiwa?

⁴⁴ Mambo tala, jiwi ja lwimu lobe byo jaji kufika mu matwi ami, mwana waji kufunkisha na lusekelo.

⁴⁵ Kabiji watokwa awa mwanamukazhi waitabila amba kikafikizhiwa akya kyaambiwe kwi aye kufuma kwi Nkambo!”

Lwimbo wa Maliya wa lutotelo

⁴⁶ Ne Maliya wa ambile amba, “Muchima wami wamutumbijika Nkambo;

⁴⁷ ne mupashi wami wasekela mwi Lesa, Mupulushi wami,

⁴⁸ mambo watala pa buyanji bwa muzha wanji! Kabiji talai, kufuma pa juba ja leelo ba mu bisemi byonse bakanteela amba watokwa

⁴⁹ mambo aye wa bulume ye wangubila bintu bikatampe. Ne jizhina janji jo jazhila,

⁵⁰ lusa lwanji luji pa boba bamwakamwa, kufuma ku kisemi ne kufika ku kisemi kikwabo.

⁵¹ Wauba mingilo ya bulume na kuboko kwanji; ne kupalang'anya betota mu milanguluko ya mu michima yabo.

⁵² Wibafumya ba mfumu pa matanda abo, ne kwi batumbijika bapelulwa.

⁵³ Baji na nzala wibekusha na bintu byawama, ne banonshi wibemanya mabokotu.

⁵⁴ Wamukwasha kalume wanji Isalela, byo avuluka lusa lwanji,

⁵⁵ byonka byo a ambile ku bashakulu betu, kwi Abulahama ne ba mukisemi kyanji myaka ne myaka.”

⁵⁶ Kabiji Maliya waikajile nanji pepi bang'ondo basatu kepo abwelele ku nzubo yanji.

Kusemwa kwa Yoano Mubatishi

⁵⁷ Pano Elizabeta ng'ondo wanji wa kusema mwana wafikile, ne aye wasemene mwana wamulume.

⁵⁸ Ne bo aikajile naabo ne balongo banji baumvwine amba Nkambo wamubila lusa lukatampe, ne abo basekejile nanji pamo.

⁵⁹ Ne mu juba ja butanu na busatu baishile kumuba mwana kisela kya mukanda. Ne abo bakebele kumutumba jizhina amba Zakaliya jizhina ja shanji.

⁶⁰ Kumvwa inanji amba, “Ajo ne! Janji Yoano.”

⁶¹ Kumvwa abo amba, “Kafwako mulongo wobe uji na jojo jizhina ne.”

⁶² Ponkapo bamwipwizhe shanji mu bu kamaama amba, “Mwasaka mwana ku mutumba amba ng'anyi?”

⁶³ Ne aye walombele kya kunembapo, ne kunemba wanembele amba “Jizhina janji Yoano.” Ne bonse bakuminye.

⁶⁴ Ne ponkapotu jiwi janji ja shinkukile ne lujimi wanji wakasulukile, ne kwamba wa ambile, ne kutota Lesa.

⁶⁵ Ne moyo wibakwachile bonse bo aikajile naabo kwipi, ne bino byonse bya ambilwe monse mu ntanda ya mitumba ya Yudea.

⁶⁶ Ne bonse bebyumvwine bebilamine mu michima yabo amba, “Lelo uno mwana ukekala wa byepi?” Mambo kuboko kwa Nkambo kwajinga pe aye.

Bungauzhi bwa kwa Zakaliya

⁶⁷ Ne shanji Zakaliya wayujilwe na Mupashi Wazhila ne kwaula amba,

⁶⁸ “Atotwe Nkambo Lesa wa bena Isalela, mambo wapesha bantu banji ne kwibakuula.

⁶⁹ Witwimenya lusengo wa lupulukilo mu kisaka kya kalume wanji Davida,

⁷⁰ Byonka byo a ambile pa kanwa ka bangauzhi banji bazhila kufuma kukala.

⁷¹ Amba uketupulusha kufuma ku balwanyi betu, ne kufuma mukuboko kwa bonse betushikwa.

⁷² Kumwesha lusa ku bashakulu betu ne kuvuluka mulaye wanji wazhila.

⁷³ Luchipo loachipile ku mushakulu wetu Abulahama,

⁷⁴ lwa kwitupa atweba amba, tupokololwe kufuma ku kuboko kwa balwanyi betu, tukamwingijilenga kwakubula moyo,

⁷⁵ monka mu buzhile ne mu bololoke ku meso anji moba a bumi bwetu bonse.”

⁷⁶ “Kine obewa mwana ukatelwa amba ngauzhi wa Mwine Wakila; mambo obewa ukatangila kulutwe ya Nkambo na kumunengezhezha mashinda anji.

⁷⁷ Na kwibapa maana a lupulukilo bantu banji mu kwibalekela mambo a bubi bwabo.

⁷⁸ Mambo Lesa wetu wa lusa, usa kwitupempula, byonka byo jiseela juba mwiulu,

⁷⁹ mu kwibasaamina abo baikala mu mfishi ne mu kimvule kya lufu, ne kutangijila maulu etu mu jishinda ja mutende.”

⁸⁰ Ne mwana wakomenenga kasa aya na kukosa mu mupashi. Waikajilenga mungye kufika ne juba jo akesolwele ku bena Isalela.