Loma 9 - KNTP

Lesa ne bantu banji

¹ Naamba kya kine mwi Kilishitu; kechi nabepa ne. Ne jiwi ja mu muchima wami jibena kungitabizha pamo ne aye Mupashi Wazhila,

² byonji na bulanda bukatampe ne musongo ubula kuchibika mu muchima wami.

³ Mambo inge kyakonshekele inge nasaka namba, mmfingwe mafingo ne kuchibiwako kwi Kilishitu na mambo a bakwetu, balongo bami ku mubiji bena Isalela.

⁴ Abo bo bantu ba Lesa bu bwana bo bwabo, ne lukumo, ne Milaye ne kupana kwa Mizhilo, ne mingilo ya ku nzubo ya Lesa, ne malayang'ano, byonse byo byabo;

⁵ ne bene bashakulu bo babo, kabiji mo mukisemi kyabo moaishijile Kilishitu kumubiji. Ye mwine wa byonse, ye Lesa utotwa pe myaka yonse! Amena.

⁶ Bino kechi kyayila mukuuba amba, mambo a Lesa a aluka ke atu ne. Pakuba bonse bamu Isalela kechi bo bene bena Isalela ne.

⁷ Nangwa na mambo a kusemwa kwi Abulahama kechi bonse bo baana banji mwayila mulaye wa Lesa ne. Mambo kinembelo kyaamba amba, “Bakasemwa mwi Izaka bo bakatelwa ke baana bobe” mwayila mulaye.

⁸ Ko kuuba amba, kechi baana bamu buntunshi bo baana ba Lesa ne; kana baana bamu mulaye bo batelwa ke nkunwa.

⁹ Pakuba kino kyokya ambile Lesa byo a mulayile Abulahama amba, “Pa kyonka kino kimye mwaka wiya amiwa nkeya, ne aye Saala kasa asema kala mwana wamulume.”

¹⁰ Kechi kyonkakyotu ne. Kabiji Libeka naye wasemene baana babiji ku muntu umo, yenka aye mushakulu wetu Izaka.

¹¹ Mambo baana banji kasa bakyangye kusemwa, nangwa kuuba kyawama nangwa kyatama ne, na mambo a kuuba amba, kufuukula kwa Lesa kwa kusalulwila jimo kechi kwikale na mambo a mingilo ne, poso monka mwayila kufuukula kwa mwine Lesa.

¹² Ba mwambijile Libeka amba, “Mukulumpe ukamwingijila nkasanji.”

¹³ Monka mo kyanembelwa amba, “Yakoba namutemenwe, pakuba Isao namushikilwe.”

¹⁴ Pano nanchi tusa kwamba amba ka? Lesa uji na bumbulwa koloka nyi? Ine kabiji akyo ne.

¹⁵ Mambo wamwambijile Mosesa amba, “Nkamubila lusa yenkawa ye nasaka kuubila lusa, kabiji nkamubila bulanda yenkawa ye nkobila bulanda.”

¹⁶ Byonkabyo nanchi kechi o mambo ayewa usaka ne, nangwa ayewa wingila ne, nanchi o mambo a lusa lwanji aye Lesa.

¹⁷ Mambo kinembelo kyamwambila Felo amba, “Onka ano mambo ona kwimenya namba, mmweshe bulume bwami mwi obewa, kabiji namba jizhina jami jiye nkuwa pano pantanda ponse.”

¹⁸ Byonkabyo aye umubila lusa, yenkawa ye aswa kubila lusa, ne aye ye aswa kukosesha muchima, ye ye akosesha.

Bukaji bwa Lesa ne lusa lwanji

¹⁹ Pano obewa usakung'ambila amba, “Nanchi mambo ka o akitushiina? Pakuba nanchi ng'anyi wimeena kyaswa muchima wanji?”

²⁰ Ine, nanchi obewa muntu wi ng'anyi, wishinawina na Lesa? Kyo babumba kimwambile wikibumba amba, “Mambo ka kyo wambumbila bibye nyi?”

²¹ Nanchi aye mbumbi kechi uji na luusa lwa pa buchimba lwakuuba, na mushinshi umo wabumba kibese kimo kijiilo kya kubilamo bya buneme, ne kibese kikwabo wabumba kya kubilamo byabula kunema nenyi?

²² Byepi inge Lesa pakuswa kumwesha bukaji bwanji, kabiji amba bulume bwanji buyukanyikwe, aye watekenye na kukooka muchima kukatampe na bijiilo byafwainwa bukaji ne lonaiko,

²³ pakuba amba asolole bunonshi bwa lukumo lwanji pa bijiilo bya lusa, byo a nengezhezhe jimo amba bya lukumo,

²⁴ ke ye atweba kabiji bo aichile, kechi mu Bayudea bonka ne, ne mu Bangentila pamo?

²⁵ Monka mo a ambila ne mu Hosea amba, “Amiwa nkebateela namba, ‘bantu bami’ aba babujilwe bami; Kabiji namba, ‘mutemwe,’ awa wabujilwe mutemwe.”

²⁶ “Kabiji ponka pa po kibambijilwe amba, ‘Kechi mwi bantu bami ne,’ Po ponka po bakatelelwa amba, baana ba Lesa mumi.”

²⁷ Ne Isaya naye ubijika mambo a bena Isalela amba, “Nangwa bena Isalela bavula pamo nobe musenga wa ku kalunga ka mema, bacheche bakapuluka;

²⁸ mambo Nkambo ukooba pano pantanda byo atongwele, ukebipwisha ne kwibichibikizha.”

²⁹ Kabiji monka mo a ambijile jimo aye Isaya amba, “Inge Nkambo wa Mabumba wabujile kwitushila nkunwa, inge twaubilwe ke pamo nobe Sodoma, kabiji inge twaalwilwe ke pamo nobe Gomola.”

³⁰ Nanchi tusa kwamba amba ka? Namba Bangentila, babujile bololoke, bebumwena mu lwitabilo;

³¹ pakuba bena Isalela byo balondejilenga bololoke bwa mu Mizhilo bakankelwe kufikizha Mizhilo.

³² Mambo ka? Mambo kechi bebukebele na lwitabilo ne, poso na mingilo. Kabiji betuntwile ku joja jibwe ja kwituntulako,

³³ monka mo kyanembelwa amba, “Talai, natuula mu Ziona jibwe ja kwituntulako ne mukunko wa kwibaponeshako. Kabiji awa wamwitabila aye kechi ukamona bumvu ne.”