Loma 8 - KNTP

Bwikalo bwa mwayila Mupashi

¹ Onkao mambo pano kechi kuji luzhachisho nangwa pacheche kwi boba baji mwi Kilishitu Yesu ne.

² Mambo muzhilo wa aye Mupashi wa bumi wankasulula mwi Kilishitu Yesu kuyewa muzhilo wa bundengamambo ne wa lufu.

³ Mambo Lesa wikyubile akya kyakankelwe kuuba Mizhilo na mambo a kunekena kwa mubiji wa buntunshi, byo atumine Mwananji mwine mu kipasha kya mubiji wa bundengamambo amba ekale ke kitapisho kya mambo, aye wibuzhachisha bundengamambo mu buntunshi.

⁴ Amba byaoloka byatongola Mizhilo bifikizhiwe mwi atweba, tubula kwenda mwayila buntunshi, twenda mwayila Mupashi.

⁵ Mambo aba baji mu buntunshi bo bata michima yabo ku bya buntunshi. Pakuba aba baji mu Mupashi bo bata michima yabo ku bya Mupashi.

⁶ Mambo kuta muchima ku buntunshi lo lufu; pakuba kuta muchima ku Mupashi bo bumi ne mutende.

⁷ Mambo muchima wata ku buntunshi washikwa Lesa mambo kechi unekenena Mizhilo ya Lesa ne, kine kechi wakonsha kwiinekenena ne.

⁸ Kabiji aba baji mu buntunshi kechi bakonsha kutokesha Lesa pa muchima ne.

⁹ Pakuba anweba kechi muji mu buntunshi ne poso mu Mupashi, umvwe Mupashi wa Lesa waikala kine mwi anweba. Kabiji umvwe muntu wabula Mupashi wa Kilishitu, kechi ye wa kwanji ne.

¹⁰ Bino inge Kilishitu uji mwi anweba, nangwa mubiji wafwa na mambo a bundengamambo, aye Mupashi bo bumi bwenu na mambo a bololoke.

¹¹ Mambo umvwe Mupashi wa yewa wasangwile Yesu mu bafu waikala mwi anweba, yenkawa wasangwile Kilishitu Yesu mu bafu ye ukapana bumi ku mibiji yenu ya lufu kupichila mu Mupashi wanji waikala mwi anweba.

¹² Byonkabyo anweba bakwetu, nangwa twi bazha, kechi twi bazha ba buntunshi amba tulonde bya buntunshi ne.

¹³ Mambo umvwe mwalonda bya buntunshi mukafwa. Pakuba umvwe mwaipaya na Mupashi byubilo bya mubiji, mukekala na bumi.

¹⁴ Mambo bonse mobavujila bo batangijila ku Mupashi wa Lesa bo baana ba Lesa.

¹⁵ Mambo kechi mwatambwile Mupashi wa buzha amba mube moyo ne; bino mwatambwile Mupashi wa bwana bwa bene, motutaachila amba, “Abba, Taata!”

¹⁶ Aye Mupashi mwine ushimuna pamo na mipashi yetu amba twi baana ba Lesa.

¹⁷ Kabiji umvwe twi baana, byonkabyo kabiji twi banswanyi ba Lesa, ba kuswana pamo ne Kilishitu, umvwe twamanama nanji pamo, amba tukatumbijikwe nanji pamo.

Lukumo lwa kulutwe

¹⁸ Mambo nalanguluka namba bya kumanama bya pa kino kimye kechi byafwainwa kwibyesakanya na lukumo loakamwesha kwi atweba ne.

¹⁹ Mambo bilengwa byonse bibena kutengela kasa byazanza meso na kupembelela kusoloka kwa baana ba Lesa.

²⁰ Mambo bilengwa byonse byaalwilwe ke byatu, kechi ku kyaswa muchima wabyo bine ne, poso ku kyaswa muchima wa mwine Lesa wikyubile, mu luketekelo.

²¹ Amba byalengelwe bine bipokololwe ku buzha bwa bubole, ne kutambula bwana bwa bene bwa lukumo lwa baana ba Lesa.

²² Mambo twayuka namba bilengwa byonsetu bibenakubinza ne kumvwa misongo kufika ne buji leelo.

²³ Kabiji kechi abyo byonka ne, nanchi ne atwebatu pamo, nangwa twatambula Mupashi nobe nsomo, ne atweba tubena kubinza mukachi, kasa tupembelela kumweka kwa bu bwana bwetu, kokuuba amba, bukuuzhi bwa mibiji yetu.

²⁴ Mambo mo mulonka luno luketekelo mo twapulukijile. Pano luketekelo lwamweka kala kechi lolwa kuketekela ne. Mambo ng'anyi uketekela byo abena kumona?

²⁵ Bino umvwe twibiketekela byo twabula kumona, twibipembelela na muchima watekanya.

²⁶ Byonkabyo ne Mupashi naye witukwasha mu kunekena kwetu. Mambo kechi twayuka byo twafwainwa kulombela ne; bino aye mwine Mupashi witulombelela na mibinzo ya kubula kukonsha kwamba.

²⁷ Kabiji aye mwine ukebakeba mu michima yetu, yewayuka ne moayila muchima wa Mupashi, mambo aye wibalombelela bazhijikwa monka mwayila kyaswa muchima wa Lesa.

²⁸ Kabiji twayuka namba bintu byonse bingijila pamo mu kwibaletela byawama bamutemwa Lesa, bo boba baitwa monka mwayila kufuukula kwanji.

²⁹ Mambo abo boayukijile jimo, ibo bo atongwejile jimo amba bakapashang'ane pamo na Mwananji, aye aluuke ke mubeji mu balongo banji bavula.

³⁰ Kabiji aba bo atongwejile jimo, ibo boaita, ne abo boaita, ibo bo a bingisha, ne abo bo a bingisha, ibo bo atumbijika.

Butemwe bwa Lesa mwi Kilishitu Yesu

³¹ Pano tusa kwamba amba ka, na mambo a bino bintu? Umvwe Lesa uji ne atweba, ng'anyi uketwimena?

³² Aye wabujile kukana kupana Mwananji mwine, kabiji wamupaine na mambo a atweba bonse, akabule byepi kwitupatu bintu byonse pamo byonka byo etupeleye?

³³ Ng'anyi ukaleeta bya kwibashiina basalululwa ba Lesa? Ye Lesa ubingisha!

³⁴ Ing'anyi uzhachisha? Ye Kilishitu Yesu wafwile, kabiji ye wasangwilwe mu bafu, ye waikala ku kilujo kya Lesa, na kwitulombelela.

³⁵ Ng'anyi uketwabanya na butemwe bwa Kilishitu? Bya malwa nyi? Nangwa buyanji nyi? Nangwa lupato nyi? Nangwa nzala nyi? Nangwa bwamba nyi? Nangwa bya bulwanyi nyi? Nangwa mpoko nyi?

³⁶ Monka mo kyanembelwa amba, “Na mambo a anweba tubena kwipayiwa juba jonse; Twalamwa nobe mikooko yo basaka kwipaya.”

³⁷ Ine, mu bino bintu byonse twakila mu kushinda monka mwi aye witutemenwe!

³⁸ Mambo amiwa nayukishatu namba, nangwa lufu, nangwa bumi, nangwa bamalaika, nangwa bene bakatampe, nangwa bintu byakatataka, nangwa bintu bikeyako, nangwa bya bulume,

³⁹ nangwa bula bwa mwiulu, nangwa kuzhika kwa panshi, nangwa kilengwa kingi, nangwa kya byepi, nangwa kya byepi, kechi bikakonsha kwitwabanya na butemwe bwa Lesa mwi Kilishitu Yesu Nkambo yetu ne.