Loma 6 - KNTP

Kufwa ku bundengamambo bino kwikala na bumi mwi Kilishitu

¹ Nanchi tusa kwamba amba ka? Tutwajijilengatu na kulenga mambo amba bupe buvule nyi?

² Ine kabiji, akyo ne! Atweba twafwile ku bundengamambo tukikalemo byepi?

³ Nanchi kechi mwayuka nenyi amba, atweba bonse twabatizhilwe mwi Kilishitu Yesu, twabatizhilwe mu lufu lwanji nyi?

⁴ Byonkabyo twazhiikilwe nanji mu lufu monka mu lubatizhilo, amba byonka byo a sangwilwe Kilishitu mu bafu ku lukumo lwa Shanji, byonkabyo ne atweba twendenga mu bumi bupya.

⁵ Mambo umvwe twanungankana nanji mu kipasha kya lufu lwanji, kabiji byonkabyo tukekala ne mu kipasha kya lusanguko lwanji.

⁶ Kasa twayuka kino, amba buntu bwetu bwakala bwapopelwe nanji, amba mubiji wa bundengamambo angatwe bulume, kabiji amba kechi tukikale mu buzha bwa bundengamambo ne.

⁷ Mambo awa wafwa wakasululwa kala ku bundengamambo.

⁸ Kabiji umvwe twafwile pamo ne Kilishitu, twaitaba namba tukekala nanji pamo.

⁹ Kasa twayuka namba Kilishitu, byo asangulwa mu bafu, kechi ukafwa jibiji ne, lufu pano kechi luji na luusa pe aye ne.

¹⁰ Mambo alwa lufu loafwile, wibufwila bundengamambo jimotu kwapwa, pakuba abwa bumi bo aikala naabo, waikala naabo mwi Lesa.

¹¹ Byonkabyo ne anweba mwafwainwa kulanguluka amba, mwi bafu ku bundengamambo, kabiji mwi bomi kwi Lesa mwi Kilishitu Yesu.

¹² Byonkabyo kechi muleke bundengamambo bwikale na bunkambo mu mibiji yenu ya lufu ne, mwakakookela lwiso lwayo.

¹³ Nangwa kupanapana bya mibiji yenu ku bundengamambo amba bikale bya kwingilako bya bubi ne. Poso mwipane kwi Lesa nobe bomi basanguka mu bafu, ne bya mibiji yenu nabyo mwibipane kwi Lesa bikale bya kwingilako bya bololoke.

¹⁴ Mambo bundengamambo kechi bwafwainwa kwimunonka buzha ne, mambo kechi muji mu Mizhilo ne, muji mu bupe.

Bazha ba bololoke

¹⁵ Pakuba pano byepi? Byo twabula kwikala bamu Mizhilo ne, bino twaikala pano mu bupe tulengengatu mambo nyi? Ine kabiji, akyo ne!

¹⁶ Nanchi kechi mwayuka amba ko mwipana anweba bene buzha mu kumukookela, kwapwa mwi bazha banji ye mukookela, nangwa mwi ba bundengamambo bwa kumwenamo lufu, nangwa mwi ba lukookelo lwa kumwenamo bololoke?

¹⁷ Bino sante ekale kwi Lesa! Mambo anweba nangwa mwajinga bazha ba bundengamambo pano mwakookela na muchima yense awa musango wa lufunjisho lo mwatambwile.

¹⁸ Kabiji pa kukasululwa ku bundengamambo mwa aluka ke bazha ba bololoke.

¹⁹ (Naambatu mwambila bantu na mambo a kunekena kwa buntunshi bwenu.) Mambo byo mwapaine bya mibiji yenu nobe bazha ku bubipisho ne ku bubi mukuuba bubi. Byonkabyo pano panai bya mibiji yenu nobe bazha ku bololoke mu kuzhijikwa.

²⁰ Mambo byo mwajinga bazha ba bundengamambo, mwajinga bakasuluka ku bololoke.

²¹ Lelo mu akya kimye ng'anyi bipangwa byo mwamwenejilemo mu byobya bintu? Bimulengesha bumvu pano mambo kumpelo ya byobya bintu ke lufu!

²² Pakuba pano mwakasululwa ku bundengamambo ne kwaluka ke muji bazha ba Lesa. Bipangwa byo mutambula bimutwala ku kuzhijikwa, ne kumpelo ke bumi bwa myaka.

²³ Mambo mfweto ya bundengamambo lo lufu, pakuba kya bupe kyo a panatu Lesa bo bumi bwa myaka mwi Kilishitu Yesu Nkambo yetu.