Loma 5 - KNTP

Mutende na Lesa

¹ Onkao mambo byo twabingishiwa ku lwitabilo, tuji na mutende na mwine Lesa monka mwi Nkambo yetu Yesu Kilishitu.

² Monka mwi aye mo motwatwelejile mu buno bupe bo twaimanamo konka ku lwitabilo, kabiji twasekela mu luketekelo lwa lukumo lwa Lesa!

³ Kukilapotu, twasekela ne mu bya malwa byetu, kasa twayuka namba, malwa aleeta butekanye,

⁴ kabiji butekanye nabo buleeta kulumbuluka, kulumbuluka nako kuleeta luketekelo.

⁵ Ne luketekelo kechi luleeta bumvu ne, mambo butemwe bwa Lesa bebwitulwila mu michima yetu na Mupashi Wazhila, ye twapewa.

⁶ Mambo byo twakijinga banekena, mu kimye kyafwainwa Kilishitu wibafwijile babula kwakamwa Lesa.

⁷ Mambo kechi kyapeela muntu kumufwila waololoka ne. Kana muntu wa lusa kampe umo usakuchinchika ne kumufwila.

⁸ Bino aye Lesa witumwesha butemwe bwanji mwine bo etutemwa, mambo byo twakijinga bandengamambo, Kilishitu witufwijile.

⁹ Mambo pano, byo twabingishiwa na mashi anji, kine kabiji tukapulukila mwi aye ku bukaji bwa Lesa.

¹⁰ Mambo umvwe byo twakijinga balwanyi, twapwainwe ne Lesa mu lufu lwa Mwananji. Pano byo twapwana, kine kabiji tukapulukila mu bumi bwanji!

¹¹ Namo kechi monkamotu ne; twasekela ne mwi aye Lesa monka mwi Nkambo yetu Yesu Kilishitu, mo twatambwila pano bupwanyi.

Adama ne Kilishitu

¹² Byonkabyo, bundengamambo byo bwatwelele pano pantanda ku muntu umo, ne lufu nalo lwatwelele na bundengamambo, kabiji byonkabyo ne lufu lwakumbene ku bantu bonse, mambo bonse balengele mambo.

¹³ Mambo Mizhilo kasa ikyangye kupanwa, bundengamambo kasa bujipo pano pantanda; bino bundengamambo kechi butelwa bu mambo pakubula Mizhilo ne.

¹⁴ Kabiji byonkabyo kufuma kwi Adama ne kufika kwi Mosesa lufu lwaikajile mu bufumu, ne pa boba babujile kulenga mambo mwayila kuzhilulula kwa Adama. Ye wajinga kifwanyikizho kya yewa wasakile kwiya.

¹⁵ Bino kya bupe kechi kiji pamo na bubi ne. Mambo umvwe bavula bafwile na mambo a bubi bwa umo, kine kabiji bupe bwa Lesa, ne kyoapana mu bupe bwa mwi yewa muntu umo, Yesu Kilishitu, kyakijishatu kwi bakumbana bavula.

¹⁶ Kabiji akya kya bupe kechi kiji pamo ne kyokya kyamwekejile mu bubi bwa yewa muntu umo ne. Mambo bunchiba mambo, bwaishile pa bubi bwa umo bwaletele luzhachisho, pakuba akya kya bupetu, kyaishile pa mizhilulwila yavula kyaletele lubingisho!

¹⁷ Mambo umvwe na bubi bwa muntu umo lufu lwaikajile mu bufumu na mambo a yewa umo. Nanchi kine, ne abo batambula bupe bwavula ne bololoke bwa bupetu bakekalanga mu bufumu mu bumi monka mwi aye muntu umo, Yesu Kilishitu.

¹⁸ Byonkabyo luzhachisho byo lwaishile ku bantu bonse mu bubi bwa muntu umo, kabiji byonkabyo ne lubingisho luleeta bumi nalo lwaishile ku bantu bonse mu kyubilo kya bololoke kimo.

¹⁹ Mambo bavula byo ba alukile ke bandengamambo mu milengulwila ya umo, byonkabyo ne bavula ba kaluuka ke baoloka mu lukookelo lwa umo.

²⁰ Pano Mizhilo nayo yatwelele amba, kuzhilulula kuvule; bino pavujile bundengamambo, ne bupe nabo bwakijishetu kuvula.

²¹ Amba, bundengamambo, byonka byo bwaikajile mu bufumu bwa lufu, byonkabyo ne bupe nabo, bwikale mu bufumu mu kupana bololoke buleeta bumi bwa myaka mwi Yesu Kilishitu Nkambo yetu.