Loma 4 - KNTP

Abulahama ye wa kumwenako

¹ Nanchi tusa kwamba ka, namba Abulahama mushakulu wetu, i kika kyo amwenejile mu buntunshi?

² Mambo umvwe Abulahama wabingishiwe ku mingilo, nanchi uji na mwa kwitotela aye mwine, bino kechi ku meso a Lesa ne.

³ Nanchi kinembelo kyaamba amba ka? Amba, “Abulahama waitabijile Lesa, kabiji na mambo a lwitabilo lwanji Lesa wamutelele amba waoloka.”

⁴ Pano kuyewa wingila, mfweto kechi itelwa amba, ya bupetu ne, poso amba ya kwingijila.

⁵ Kabiji kuyewa ubula kwingila bino waitabila mwi aye ubingisha babula kwakamwa Lesa, lwitabilo lwanji lwamutelelwa ke bololoke.

⁶ Monka mwa ambila Davida mambo a kutokwa kwa yewa muntu ye baswa kwi Lesa amba waoloka, kwakubula ne mingilo, amba.

⁷ “Batokwa aba bobalekela bibi byabo, ne mambo abo avwetwa!

⁸ Watokwa awa yebakabula kuvulukila mambo anji kwi Nkambo!”

⁹ Nanchi kuno kutokwa ba ambilatu bonka ba mu mukanda nyi, inyi ne babula mukanda pamo? Twa amba namba, “kabiji Lesa wamutelele Abulahama amba waoloka na mambo a lwitabilo lwanji.”

¹⁰ Nanchi ng'anyi kimye kyo bamutelele Abulahama amba waoloka? Kasa akyangye kutwela mu mukanda nyi? Inyi kasa atwela kala mu mukanda? Kechi kyajinga kasa atwela kala ne, bino kasa akyangye kutwela mu mukanda.

¹¹ Aye watambwile mukanda ke kayukilo, nobe kateetesho ka bololoke bwa mu lwitabilo bo ajinga naabo, kasa akyangye kutwela mu mukanda. Amba ekale ke shanja bonse baitabila kwakubula mukanda, amba ebaswe ne abo pamo amba baoloka.

¹² Kabiji amba ekale shanja ba mu mukanda, kechi abo bajitu mu mukanda ne, kana bonka balondela mungayo ya lwitabilo lwa shetu Abulahama loajinga naalo kasa akyangye kutwela mu mukanda.

Mulaye wa Lesa utambulwa kupichila mu lwitabilo

¹³ Mambo awa mulaye, ye balayile Abulahama ne ba munkunwa yanji amba ukekala nswanyi wa pano pantanda, kechi walaijilwe mu Mizhilo ne, walaijilwe mu bololoke bwa mu lwitabilo.

¹⁴ Mambo umvwe aba baji mu Mizhilo bo banswanyi, nanchi lwitabilo lwa aluka ke lwatu, ne mulaye naye wa aluka ke watu.

¹⁵ Mambo Mizhilo yo yileta bukaji bwa Lesa, kabiji pabula Mizhilo kechi paji kuzhilulula Mizhilo ne.

¹⁶ Onka ano mambo oaikela mulaye pa lwitabilo, amba mulaye ekale pa bupe, mulaye akekale pa bonse ba mukisemi, kechi boba bonka bamu Mizhilo ne, nanchi ne kuboba bamulwitabilo lwa Abulahama shetu atweba bonse;

¹⁷ monka mo kyanembelwa amba, “Nakutongola ke shanja mikoka yavula.” Ku meso a Lesa yeaitabile, upana bumi ku bafu ne kutela bintu byabulwapo amba bikalepo.

¹⁸ Ye waitabijile mu luketekelo mwabujilwe kufwainwa kuketekela, amba ekale ke shanja mikoka yavula, monka mo kyamwambijilwe amba, “Byo ikekala nkunwa yobe.”

¹⁹ Kabiji aye lwitabilo lwanji kechi lwayilenga na kupwa ne, nangwa mubiji wanji wajinga nobe wafwa kala byo afikizhe myaka makumi jikumi, nangwa Saala naye wajinga ng'umba.

²⁰ Byonkabyo kechi wazhinaukile mulaye wa Lesa ne, wakosejile mu lwitabilo, kasa atumbijika Lesa.

²¹ Kabiji wayukisheetu amba Lesa wakonsha kufikizha akya kyo alayile.

²² Onkao mambo na mambo a lwitabilo lwanji “watelelwe amba waoloka.”

²³ Abino byambo bya kuuba amba, “watelelwe amba waoloka” kechi bya munembejilwetu aye bunke ne.

²⁴ Bino byanembejilwe ne atweba pamo bakatelwa amba baoloka, atweba baitabila awa wamusangwile Yesu Nkambo yetu mu bafu.

²⁵ Ye wasolwelwe pa mambo etu, kabiji ne kusangulwa na mambo a kubingishiwa kwetu.