Loma 3 - KNTP

¹ Nanchi Muyudea washukilwa paka? Nangwa mu mukanda namo umwenamo ka?

² Mwavula monsetu! Kitanshi kine, mambo bapelwe bukalama bwa byambo bya Lesa.

³ Nanchi inge bamo babujile kwitabila, nanchi kubula kwitabila kwabo kwakonsha kwalula bukishinka bwa Lesa ke bwatu nyi?

⁴ Abyo ne! Lesa ekale wa kine nangwa bantu bonse baikala ke ba bubela. Monka mo kyanembelwa amba, “Bemubingishe mu byambo byenu, kabiji mukabingishiwa pa kwiya mukije.”

⁵ Bino umvwe bumbulwa koloka bwetu bumwesha bololoke bwa Lesa, tusa kwamba ka? Lelo aye Lesa byo amwesha bukaji pe atweba wabula koloka nyi? (Naambatu mwambila bantu.)

⁶ Abyo ne! Mambo umvwe byonkabyo aye Lesa ukachiba byepi mambo aba pano pantanda?

⁷ Bino umvwe mu bubela bwami mo mumwekela kuvula kwa bukine bwa Lesa kwa kumuletela lukumo, mambo ka amiwa kyombena kuzhachishiwa nobe ndengamambo?

⁸ Kabiji mambo ka kyo twabujila kwamba amba, “Twayai tube byatama amba, byawama bimweke?” Byonka byo betubepela bamo amba, byo byotwamba! Byonkabyo kuzhatwa kwabo kwibafwainwa.

Kafwako waoloka ne

⁹ Nanchi byepi? Atweba Bayudea twibakila mu kuwama nyi? Ine, nangwa pachechetu ne! Mambo twibashiina kala bonse Bayudea, ne Bagiliki pamo amba bonsetu baji mu mambo.

¹⁰ Monka mo kyanembelwa amba, “Kafwako waoloka, nangwa umotu ne,

¹¹ kafwako wakwatakanya ne, kafwako ukeba Lesa ne.

¹² Bonse basenduka, bonse ba aluka ke batu; kafwako uba byawama ne, nangwa umotu ne.

¹³ Mijibu yabo byo bilende bya kyashi, ku njimi yabo bajimbang'enako, bulembe bwa mulolo kishipila buji munshi ya byatunwa byabo;

¹⁴ tunwa twabo twayula mafingo ne bululu.”

¹⁵ “Maulu abo aya lubilo na kwichila mashi;

¹⁶ mu mashinda abo muji bono ne malwa.

¹⁷ Ne jishinda ja mutende kechi bejiyuka ne,

¹⁸ kafwako moyo wa kwakamwa Lesa ku meso abo ne.”

¹⁹ Bino twayuka namba byonse byaamba Mizhilo ibambila baji mu Mizhilo, amba bulaka bwibashinke bonse ne ba pano pantanda bonse bafwe nao kwi Lesa.

²⁰ Mambo kafwako muntu nangwa umo ukabingila mu mingilo ya mu Mizhilo ku meso a Lesa ne; mambo mu Mizhilo mo muyukanyikilwa bundengamambo.

Bololoke bumwekela mu lwitabilo

²¹ Pakuba pano bololoke bwa Lesa bwamweka, bwa kubula mu Mizhilo, nangwa bwashimunwa mu ma buku a Mizhilo ne aba ngauzhi.

²² Bonkabwa bololoke bwa Lesa bwa mu lwitabilo lwa mwi Yesu Kilishitu ku bonse baitabila. Mambo kafwako wapusana ne.

²³ Mambo bonse balenga mambo, kabiji bapelelelatu ne kufika ku lukumo lwa Lesa ne.

²⁴ Pakubinga bebabingishatu ku bupe bwanji monka mu bukuuzhi bwa mwi Kilishitu Yesu.

²⁵ Ye a mwesheshe Lesa amba ekale mfuto ya mambo, ya mu lwitabilo lwa mu mashi anji. Mu kumwesha bololoke bwa Lesa bwa kulekela ao mambo a lengelwe kala, monka mu kukooka muchima kwa Lesa.

²⁶ Naamba namba mambo a kumwesha bololoke bwanji pa kyo kino kimye, amba mwine ekale waoloka, ne wakumubingisha awa waitabila mwi Yesu.

²⁷ Lelo kabiji kwitota kwetu kuji pi? Kafwako! Kabiji ng'anyi mambo? Na ng'anyi muzhilo? Wa mingilo nyi? Ine, poso na muzhilo wa lwitabilo.

²⁸ Onkao mambo atweba twa amba namba, muntu ubingila ku lwitabilo kwakubula mingilo ya mu Mizhilo.

²⁹ Nanchi aye Lesa ye wa Bayudea bonka nyi? Kechi ye Lesa wa Bangentila nabo nenyi? Ee kabiji, ne Bangentila nabo pamo.

³⁰ Kabiji byo aji Lesa umotu, ukebabingisha ba mukanda ku lwitabilo, ne babula mukanda nabo monka mu lwitabilo.

³¹ Nanchi atweba tonauna Mizhilo na lwitabilo nyi? Ine kabiji, abyo ne, twaikajika Mizhilo.