Loma 16 - KNTP

Lwimu lwa kwimuna bipwilo

¹ Na mulumbulula nyenga yetu Fibe, namba ye wamwingilo wa mu kipwilo kya mu Kenkelea.

² Namba mu mutambule bulongo mwi Nkambo mwafwainwa bazhijikwa, ne kumukwasha mu byonse byo akakajilwa, mambo ne aye naye wibakwashishenga bavula, ne amiwa mwine pamo.

³ Bemunai ba Pilisila ne Akwila, bakwetu bo ng'ingila naabo ba mwi Kilishitu Yesu;

⁴ bo baswile kutapwa na mambo a mweo wami. Kechi amiwa yenka mbena kusanta ne, nanchi ne bipwilo byonse bya Bangentila pamo.

⁵ Imunai ne kipwilo kiji mu nzubo yabo. Imunai ne mutemwe wami Epanetusa, aye ye kipangwa kitanshi kya mu Asha kya kwa Kilishitu.

⁶ Imunai ne Maliya, yenka wimwingijilenga kyakosa.

⁷ Bemunai ne ba Andelonyikusa ne Yunyiasa, balongo bami, botwakashilwe naabo pamo, bo bayukanyikwa bulongo ku batumwa, bo batanshi baitabijile mwi Kilishitu, amiwa kasa nkyangye.

⁸ Mwimunai ne Ampilyatusa mutemwe wami mwi Nkambo.

⁹ Imunai Ulabanusa mukwetu mu mwingilo wa mwi Kilishitu, ne Satakisa mutemwe wami.

¹⁰ Imunai Apelesa ye waitabilwa mwi Kilishitu. Imunai ne ba munzubo ya Alisatobulusa.

¹¹ Imunai ne Helodyona mulongo wami. Bemunai ne baji mu nzubo ya Nakisusa, baji mwi Nkambo.

¹² Bemunai ba Tilifena ne Tilifosa bengila mwi Nkambo. Imunai ne Pelesisi mutemwe, ye waingijilenga kyakosa mwi Nkambo.

¹³ Imunai Lufusa wasalululwa mwi Nkambo, ne inanji, ye waikala kwi amiwa ke mama.

¹⁴ Bemunai ba Asinyikilitusa, ne Felegonyi, ne Helimesa, ne Patilobasi, ne Helimasa, ne balongo bo baji naabo.

¹⁵ Imunai ba Filologusa, ne Yulya, ne Neleusa, ne nyenga yanji, ne Olimpasa, ne bazhijikwa bonse bo baji naabo.

¹⁶ Iimunai anweba bene na lwimu lwazhila. Bipwilo byonse bya Kilishitu bimwimuna.

Bya kwibafunda byapelaako

¹⁷ Anweba bakwetu, ne musashijila namba, batajishai aba baleeta lwabano ne bintu byabula kwesakana na mafunjisho o mwafunjile; mwabane naabo.

¹⁸ Mambo ba byonkabyo kechi bamwingijila Nkambo yetu Kilishitu ne, bengijila munda mwabo abo bene, kabiji na byambo byabo bya mulambisha ne kuwama beyongola michima ya babula kujimuka.

¹⁹ Mambo lukookelo lwenu lwaya nkuwa ku bantu bonse, byonkabyo nasekela bingi na mambo anweba. Kabiji nasaka namba mwikale bamaana mu byawama, kabiji mwikale babula bujimuku mu byatama.

²⁰ Ne aye Lesa wa mutende ukamuchakakanya Satana munshi ya maulu enu palutwe kacheche. Bupe bwa Nkambo yetu Yesu Kilishitu bwikale ne anweba.

²¹ Timoti mukwetu mu mwingilo wimwimuna; ne Lukiusa ne Yasona ne Sosipata, balongo bami, nabo bemwimuna,

²² Amiwa Teletiusa, wanemba byaamba Paulo, nemwimuna monka mwi Nkambo.

²³ Ngayusa, mwine ye nafikilako, ne kipwilo kyonse pamo, bemwimuna. Elasatusa, kalama wa muzhi, wimwimuna, ne Kwalitusa mulongo wetu pamo.

²⁴ Bupe bwa Nkambo yetu Yesu Kilishitu bwikale ne anweba bonse. Amena.

Milombelo yapelaako ya lutotelo

²⁵ Pano kwi aye wakonsha kwimukosesha monka mwayila Mambo ami Awama ne kusapwila kwa Yesu Kilishitu, mwayila lumwekesho lwa akya kyafyamikile myaka ya kala.

²⁶ Pakuba pano, kyasololwa, kabiji kyayukanyikwa mu binembelo bya bangauzhi, monka mwayila mukambizho wa Lesa wa myaka yonse, amba bonse Bangentila belukokele lwitabilo.

²⁷ Kwi Lesa, yenka wa maana, kwikale lukumo monka mwi Yesu Kilishitu, myaka ne myaka. Amena.