Loma 15 - KNTP

Tokeshai bakwenu pa muchima kechi anweba bene ne

¹ Kabiji atweba bakosa twafwainwa kwitwika kunekena kwa babula kukosa, kechi kwitokeshatu pa muchima atweba bene ne.

² Kana atweba bonse pa muntu pa muntu tutokeshe mukwetu pa muchina ne kumubila byawama bya kumukomesha.

³ Mambo Kilishitu naye kechi witokeshe mwine pa muchima ne, bino monka mo kyanembelwa amba, “Bya mwenga bya boba bemwambijile mwenga byamfikila amiwa.”

⁴ Mambo byonse byanembelwe kala byanembejilwe kufundwa kwetu, amba monka mu butekanye ne mulutundaiko lwa binembelo twikale na luketekelo.

⁵ Pano aye Lesa wabutekanye ne walutundaiko emupe mwakwikela na muchima umo anweba bene na bene monka mwayila muchima wa Kilishitu Yesu,

⁶ amba pamo na muchima umo ne na jiwi jimo mukatumbijike Lesa Shanja Nkambo yetu Yesu Kilishitu.

Mambo Awama ku Bangentila

⁷ Onkao mambo itambulai anweba bene na bene byonka byoemutambula Kilishitu mambo a lukumo lwa Lesa.

⁸ Mambo amiwa nemubuula namba Kilishitu waikele ke wamwingilo wa ba mu mukanda mambo a kumwesha bukine bwa Lesa, amba afikizhe milaye yoapaine ku bashakulu,

⁹ kabiji amba, Bangentila batumbijike Lesa na mambo a lusa lwanji. Monka mo kyanembelwa amba, “Onkao mambo amiwa nkemutotela mu Bangentila, ne kwijimbila ya kutota jizhina jenu.”

¹⁰ Kabiji aye amba, “Anweba Bangentila, sekelai pamo na bantu banji!”

¹¹ Kabiji amba, “Totai Nkambo anweba Bangentila bonse; ne bantu bonse bamutote!”

¹² Kabiji ne aye Isaya amba, “Wa mukisemi kya Yese naye ukeya ukebalama Bangentila, kabiji Bangentila bakaketekela mwi aye.”

¹³ Kabiji aye Lesa nsulo ya luketekelo, emuyuzhe na lusekelo lonse ne mutende pa kwitabila, amba luketekelo lwenu luyenga na kukomenako, monka mu bulume bwa Mupashi Wazhila.

Byalengejile Paulo kunemba nkalata na kuchinchika

¹⁴ Anweba bakwetu, ne amiwa mwine muchina wami wimuketekela bulongo namba, ne anweba bene mwayula byawama, mwayuzhiwa na maana onse, ne kuyuka mwayuka kwifunda anweba bene na bene.

¹⁵ Byonkabyo nemunembela bimo kasa nachinchika ne kwimuvulula, na mambo a bupe bonapewa kwi Lesa,

¹⁶ amba ngikale ke wamwingilo wa Kilishitu Yesu ku Bangentila, kasa ng'ingila mu Mambo Awama a Lesa, namba kulambulwa kwa Bangentila kwitabilwe, byo kwazhijikwa na Mupashi Wazhila.

¹⁷ Onkao mambo nji na bya kwitotela mwi Kilishitu Yesu mu mwingilo wami wa ku mwingijila Lesa.

¹⁸ Mambo amiwa kechi nkonshe kwamba bintu bikwabo ne, kana byonka byaingijilenga Kilishitu mwi amiwa mukuleeta lukookelo mu Bangentila, mu byambo ne mu byubilo,

¹⁹ monka mu bulume bwa biyukilo, ne bwa bya kukumya, ne mubulume bwa Mupashi wa Lesa amba, byonkabyo kufuma ku Yelusalema, ne mumande azhokolokako, kukafika kwine ne ku Ililikuma, nasapwilako Mambo Awama a Kilishitu.

²⁰ Kabiji nateshakotu muchima namba nsapwile Mambo Awama kechi koatelelwe kala aye Kilishitu ne, kuchiina amba na keya kushimika pa kitendekesho kya muntu mukwabo.

²¹ Bino monka mo kyanembelwa amba, “Aba babujilwe kusapwilwa mambo anji aye bakamona, kabiji aba babula kumvwa, bakomvwisha bulongo.”

Paulo byo a fukwile kuya ku Loma

²² Onkao mambo kino kyo kintu kine kyalengejile amiwa kubula kwiya ko muji.

²³ Pakuba pano, byo nabula mpunzha ikwabo kwa kwingijila mu ano mapunzha, ne byo nasakilenga mu ino myaka yavula kwiya ko muji,

²⁴ naketekela namba, ponka pa kukayanga ku Sipeni, nkemumona pa lwendo lwami, ne kutambula bukwasho kufuma kwi anweba bwa pa lwendo lwami, patanshi nkekala nenu bang'ondo bacheche.

²⁵ Pakuba pano mbena kuya ku Yelusalema, na kutwala bukwasho ku bazhijikwa.

²⁶ Mambo kibatokela ku muchima bamu Makedonya ne mu Akaya kupana bya bupe bya kukwasha balanda bamu bazhijikwa bamu Yelusalema.

²⁷ Kibatokela ku muchima; mambo kine baji na bikoloto kwi abo. Mambo umvwe Bangentila bashilang'ana naabo pamo mu bya ku mupashi, kabiji mo monka mo kibafwainwa nabo kwibakwasha mu bya ku mubiji.

²⁸ Byonkabya byo nkapwisha kino, ne kwibafikizhizha bino bya bupe, po po nkapita kwenu byo nkayanga ku Sipeni.

²⁹ Kabiji nayuka namba byo nkemwendela kwenu, nkeya kasa nayula na mapesho a Kilishitu.

³⁰ Pano nemusashijila anweba bakwetu, monka mwi Nkambo yetu Yesu Kilishitu, ne mu butemwe bwa Mupashi, namba mukwantankane pamo ne amiwa mu milombelo yenu yo mundombelela kwi Lesa;

³¹ namba nkapokololwe ku bamilengulwila baji mu Yudea, kabiji namba mwingilo wami yenaendela ku Yelusalema aketabilwe bulongo ku bazhijikwa.

³² Namba nkeye ko muji na lusekelo monka mu kyaswa muchima wa Lesa, ne kukokoloka nenu pamo.

³³ Pano Lesa wa mutende ekale ne anweba bonse. Amena.