Loma 13 - KNTP

Kukookela bandamakyalo

¹ Bantu bonse bakookele bakulumpe balama kyalo. Mambo kafwako bukulumpetu ne, poso bufuma kwi Lesa, kabiji ne abo baji naabo bebatongola kwi Lesa.

² Onkao mambo aye ukosakena bakulumpe balama kyalo, ubena kukanya ne kyatongola Lesa; kabiji ne abo bakanya bibye bakeletelela bene lukabisho.

³ Mambo bandamakyalo kechi bobisha moyo awa wingila byawama ne, kana wingila byatama. Umvwe usaka kubula kuchiina ndamakyalo, abyo ubanga byawama, kabiji bakakutota kwi aye,

⁴ mambo aye ye kalume wa Lesa wakukubila byawama. Kabiji umvwe wauba kyatama, abyo chiina, mambo kechi usendatu mpoko yatu ne. Mambo ye wamwingilo wa Lesa, wa kukabisha boba byatama.

⁵ Onkao mambo anweba mwafwainwa kwibakookela, kechi na mambo onka a bukaji bwa Lesa ne, poso na mambo a jiwi ja mu muchima.

⁶ O ene mambo kyokyo mupaina ne misonko, mambo bandamabyalo bo bamingilo ba Lesa, kasa batesha michima ku kino kintu kyonka.

⁷ Kasa mupana ku bonse byonse bibafwainwa; musonko mupane ku bamusonko, kashitomo naye mupane ku ba kashitomo, ubai mushingi ku bafwainwa kubilwa mushingi, ne munema naye mupane ku bafwainwa munema.

Mingilo ya kwiingijila atweba bene na bene

⁸ Kechi mwikale na kikoloto nangwa kya muntu umotu ne, poso kwitemwa anweba bene na bene, mambo awa watemwa mukwabo ye wafikizha Mizhilo.

⁹ Mizhilo yaamba amba, “Kechi uba bukende ne, kechi wipayang'ana ne. Kechi wiba ne, kechi ukumbwa ne,” kabiji nangwa kuji muzhilo mukwabo, nangwa wa byepi, yonse yapwila mu kyo kino kyambo, amba, “Ukatemwa mukwenu byonka byo witemwa obewa mwine.”

¹⁰ Butemwe kechi buba byatama ku mukwabo ne; onkao mambo butemwe bo bufikizha Mizhilo.

¹¹ Kabiji kikwabo, mwayuka kimye byo kyafika kala kya kubuuka mutulo. Mambo lupulukilo lwetu luji pepi kechi luji kwaleepa pamo na byotwaitabijile ne.

¹² Bufuku bwapita kala; ke buye na kukya. Nanchi tuvuule mingilo ya mu mfishi ne kuvwala bya nkondo bya mute.

¹³ Twendenga bulongotu nobe mu mute, kechi mu kiwowo ne mu kupendwa ne, nangwa mu bya bulalelale ne bya bunya ne, kechi mu lutoobo ne mu kichima ne.

¹⁴ Bino anweba vwalai Nkambo Yesu Kilishitu, kechi mwimwene jimo nangwa mucheche mwakuubila bya lwiso lwa buntunshi ne.